balak nga gisulat nga ang background music mao ang nocturne in G minor ni Chopin

usahay kulang ako
sa pagsabot
nganong ako
sapoton nga walay
bag-ong balak ang
akong higala
nga sama usab kanako
nangalap og pulong
aron himoong balak
sa usa ka kagabhion
diin ang bulan
napapas sa mga
itom nga panganod

lisod kaha ang
magtrabaho sa usa
ka call center
labi na nga ang
imong supervisor
dili nimo
igkasinabot

labi na nga imong
bation nga
mas daghan
ka pa og nahibaw-an
kaysa kaniya

labi na nga ang
imong utok
nauga sa usa ka
pangita nga dili
nimo trip

lisod mobalak
kon ang imong
tiyan hangin
na lang ang sud

lisod mobalak
kon ang imong
kasing-kasing
nahawla sa usa
ka kahaw-ang

walay kwarta
ang balakero
walay kita ang
balak
walay mopalit
og balak
walay bunga
ang mga balak

apan, sagdi lang
kay maoy
akong ganahan...