2009/11/13

alang kang Lou og uban pang mga Lulu sa kalibotan

ang pagsulat usa ka arte.
mas labaw nga arte ang pagsulat og balak.
nagkinahanglan kana og panahon.
daghan kaayong panahon.

sama sa panahon sa pagpaniid nimo
kon asa dapit gibutang ang itlog
sa tulabong.
kon asa ba gayod ang iyang salag.

sama sa pagpunay nimong yampungad
sa imong bintana aron lang motan-aw
sa tamsi samtang nanghinguto sa iyang
mga balahibo dapit sa iyang dughan
nga dalag sama sa usa ka piyapi

kadtong imong gibati nga kahingangha
samtang mikalit og kahulog ang bitoon
sa imong uluhan nga nagdalidali ka dayon
og bungat sa imong pangandoy
nga wala gayod matuman

daghan pa kaayong mga butang nga atong
tutukan nga sa atong mga kamot amomahon
apan sagad sa kanunayng mahitabo
ato na lang kining kalimtan

seguro dili kita ganahan nga mawala sa atong
kaugalingon
naagian ko na kana og daghan sa akong mga igsoon
ang mibakho
kay nganong ako nahimong lahi kanila
kon nganong wala ako misunod sa dakong panon
kon nganong misupak ako
sa tul-id nga linya
kon nganong nakita nako ang kaanyag nianang
mga balikog

ang dagan sa hunahuna lahi sa dagan sa kasingkasing
kay ang kasingkasing sigi gayong kadagma
sa iyang kadangag
apan ang iyang pagkadasmag
(ambot og motoo ka ba niini)
nakahatag baya usab og kahalang sa atong kalag
nahimong mas lamian ang sabaw sa kinabuhi
nga gisagulan sa pipila ka lugas nianang
mga luha og mga singot
og labi na nianang pipila ka tulo
sa dugo sa atong tudlo nga
gisamaran sa kutsilyo sa kapalaran


nagpakaaron-ingnon ako nga ang pagsulat mao lamang
ang pagtak-ang sa lamesa diin andam na ang piniriting itlog
nga sunny side up og ang kape nga init kaayo nga ang kahumot
sa iyang pagkakape misurop sa kahidlaw sa akong dila
tupad sa bag-ong pinalit nga pan de sal

diin ang tanan andam nang daan og
ako molingkod na lamang og

mokaon

dili baya.
sama sa gisulti sa akong lolo nga namatay sa sakit nga kanser sa iyang itlog,
matag lugas sa kan-on nga nahulog diha sa kilid sa lamesa
gihagoan kana gikan sa pagdaro sa basakan init og ulan
sa pagsabod sa mga binhi
sa pagpatay sa mga ulod sa pagbugaw sa mga maya
sa pag-ani sa pagbulad hangtod nga miabot na dayon ang init nga kan-on
sa talad-kan-anan
nagbilangkad sa tungang bahin
sa bandehado.


kapoy gayod. morag mahulog na ang akong mga mata gikan sa iyang lungag.
gikubalan na ang akong mga tudlo og hapyod nianang mga pulong.
nagsakit na ang akong tangkugo
og ang akong liog morag dili na kaila og unsa

ang kahahay diha sa kahumok sa alugnan.

apan lami ang akong bation pagkahuman.
nahimo ang balak og imong gibasa.
og ako gibayaw sa langit.
(pagkamabaw ra gayod diay sa akong
kalipay)

mihay-ad sa salog nga kawayan. mitan-aw sa buslot sa atop nga nipa.
nanilip na usab sa bitoon sa langit.

og dayon og piyong sa akong mga mata.
gusto na usab nga magdamgo

kanila.

kadtong babayeng akong gihimong amang sa akong balak
kadtong laing mubo og buhok nga akong gikabuangan nga wala gani
miambat kanako
kadtong hagdanan nga guba nga gipandolan sa akong mga tiil
nga gikahulgan sa akong sampot.

Panginhas dire