3/30/2011

usa ka paghandom sa gugmang hagbay rang naguba...

matag adlaw
adunay tagay ang kasingkasing

nagsandurot ang mga
paghandom sa mga kaagi
kabahin natong duha

didto sa suba
sa basakan sa kamalig
sa landahan

sa bungtod sa ilalom sa punoan
sa kamatsile

adunay mga hunghong
sa matag
kaadlawon

paaboton mo kuno ako
ugma damlag
sa laing hugna na usab
sa atong kinabuhi

hagkot ang akong mga singot
nagbasa ang akong
paa

paghimo og balak samtang ga chat

nganong hunahunaon pa man gayod kaayo
mawala na hinoon ang

spontaniety

isulat lang ang unang miabot sa hagdanan sa imong utok
pasudla sa pultahan
og palingkora sa imong bangko

ayaw na pangutan-a kon dis-a kini gikan
og naunsa kini
nganong napadpad siya sa balay sa imong panumduman

imbitaha nga matulog sud sa lawak sa imong kasingkasing
human sa usa ka panihapon

kon mahaluna na siya
padayon sa

chat sa imong mga amigo og amiga
nga ganiha rang gapaabot sa imong mga tubag sa ilang mga pangutana

asa na gani ta?

pamalihog sa usa ka nagluhod kanimo

tungod sa gugma
miluhod ako kanimo
og gihagkan nako
ang imong mga
tiil

gikaulaw ko kini
apan wala ako'y
nahimo

mipahiyom ka
nga naglantaw kanako

palihog
ipalong na lang ko
sa suga

ikaw lang ang makasabot niini

sa usa ka patay nga
dahon
sa silong sa mga sanga
nga uga
diha sa punoan nga
nakalabira
sa tumang kainit sa
kaudtuhon

daghan kag malad-ok
sa imong tutunlan

tunlon mo ang tanan
sa walay tingog

usa ka librohan

kahayag

kadtong mga bakakon
sayod ka
dili gayod kaharong sa
moabot nga
kahayag

imbis makakita
mabutaan...

ang imong kasakit

ang sakit sa dughan
gisulayan og kumot sa kamot
aron ang sakit
malimtan sa laing sakit

apan nagpabilin ang sakit
sa dughan

busa misulay ka og awit
diha sa silong sa bulan
giduyugan ka sa bugnaw nga
hangin sa kagabhion
mitayhop og apil ang dagat
sama sa usa ka taghoy


nadungog kini sa mga nahikatulog
nga mga gangis

gusto unta nilang moapil apan
nahingaw sila
nabati nila ang imong kasakit
og namati lamang sila

pagkaugma
pagkadaghan sa mga dahon sa naga
nga nangahulog
diha sa tiilan sa usa ka dakong lasang

pati gani ang mga
bitin
nalisang...

ang dili ug ang unta...

dili mapapas
sa kusog nga ulan ang
tunob diha
sa lapok

dili maguba sa panahon
ang mga tunob
nga mitaplak sa
bato nga
kasingkasing

unta kon diha lang
sa balason nga
baybayon

nalimtan ko na unta
ang tanan kanato
sa dayon...

kon mawa ka, akong adlaw...

naghisgot siya
sa pagkahulog sa tulo ka bitoon
wala'y nawala
daghan pang nahibilin sa langit

kagabii
nahugno ang iyang dughan
sa dihang
nahulog ang bulan didto sa
lanaw
nag-aso ang tubig
sa tumang kainit
dayog kawala
sa kahayag nga hinulman

karong buntag
wala mitunga ang akong adlaw

Ang tahas sa ulan

nagpabiling lig-on
ang balikong sanga
dihang gibanlasan
sa ulan ang lapukong
mga tunob

3/28/2011

kabahin sa kamingaw...

dili angay kahadlokan ang
kamingaw

kay kon mahadlok ka
sungog-sungugon ka man hinoon

bitad-bitaron niya ang imong tiil
og iyang kuso-kusohon ang imong buhok

apan kon imo kining hangpon sama sa usa ka amigo nga dugay na nimong wala makita
gakson, hagkan, amomahon, paimnon, palingkoron og imbitahon og katulog sa imong tupad sud sa napulo ka adlaw

nan, moingon ang kamingaw, " kining tawhana isog, adunay kalalom, dili mahadlok sa tumang
kahilom, dili malisang kon magdugo na ang kasingkasing..."

lantawon ka niya gikan sa imong buhok hangtod sa imong lapa-lapa og magpabilin sa iyang
kataposang pulong, " ikaw, makamao na nga mabuhi diha sa pag-inosara og busa si Bathala
misalig na sa imong kalig-on"

og dayon kinig biya sa imong balay
nga dili na gani mananghid og wala na kini maghatag kanimog mga timailhan nga ikaw
iya pang balikan

nalipay ka kintahay
apan sa pipila ka gabii miabot ang usa ka paghandom diha kaniya nga imo na
nga naandan....

3/26/2011

ben thanh

ang bulingiton nga bata
mitutok sa usa ka dulaan

nga gihawiran sa tindero
og ikaw namili og ang mata

sa bata nga iyang kalibotan
naglirawliraw sa usa ka

damgo sa ala una sa hapon
wa nimo maantos mihirit ka

sa imong pitaka gipalit ang
maong dulaan og imong

gihatag sa maong bata og
sa usa ka hapsay nga pahiyom

gibati mo ang kinabuhi
nakita mo ikaw, kaniadto....
gitultol nimo ang lawak
sa usa ka kaadlawon og

gibuhat mo ang naandan
ang kalami nga dili kabayran

sa mga nagdilaab nga mga
pulong nga dili mo na gayod

mapalong sa mga pakiat sa
kangitngit diha sa umaabot nga

kahayag sa mga kitik sa damgo
diha sa imong dughan

pagkabuntag bation mo na
usab ang lahi nga katulugon.

pagmata nimo sa usa ka damgo...

adunay mga panghitabo
nga dili kapugngan

sama sa kamatayon sama
usab sa gugmang nagbaha

nga bisan unsaon nimog
kalimot sa adlaw motunga

lang gayod gihapon diha sa
imong damgo

naglagot ka apan usahay
mopahiyom ka kay bisan

unsaon lami lang gayod
gihapon.......

3/21/2011

sud sa kinamahalang kotse....




sakay sud sa kinamahalang kotse

misakay ang iyang lawas nga adunay duha ka lig-on kaayong mga kamot
nga nagmaneho sa manobela paingon sa
dakong syudad nga nagtimpla-timpla og daghan kaayong
lamian nga sala,

dili nimo makita ang sulod kay tinted ang samin nga bintana
og dili nimo maabri kay gihipos didto ang remote control
dili nimo maaninaw ang kalag nga nagdaot og laksot
nga kusog kaayong misyagit sa tumang pag-antos
sa kasakit nga gidulot sa tanang mga kaunuran,
kabukugan, og mga kaugatan...

ang kamatayon nahisama....




igo lang niyang giwahing ang
kurtina sa bintana og
nanirado siya sa pultahan sa iyang balay

mora lang siyag natulog sa
katre
wa siya masayod ko aduna pa
bay laing panaw
sila nga naglantaw kaniya
nangiyak
mikumpisal sa ilang gugma diha
kaniya
nga karon dili na niya mabati
og wa na sab niya
kinahanglana

sud sa kwarto...



gikapoy kog himog mga balak
sud ning kwarto
og aron ako malipay
gipalong ko ang suga og
mitupad ako kanimo

dili una kita matulog
palihog lang...
ang atong mga anino
bisag walay ikasulti

sa hilom suma sa iyang nabatasan
kanunay nga mag-awat-awat kanato
nga kon ambaton
makahatag og labad sa ulo

sakit sa mata
og aron mawala kay morag siging pangayo og tabang
pwes
kining sugaa nga maoy naghimo kanila
mas maayo pag
palongon natong duha...

ang gisulti sa iyang lover boy....(alang kang Dr. T.)


gusto niyang mahinumduman siya
sa usa ka tapot kaayo nga kihat
diha sa usa ka hawan nga bangas
sa buhok nga kalkag
sa mga balod sa iyang pilok
sa ilong nga tugsoy og hangad
sa sigarilyong iyang gikitkit sa iyang
ngipon

nga gisipitan sa duha ka init
niyang mga ngabil

akong gitutukan ang mata sa bata
samtang ang iyang amahan nagsudlay sa iyang buhok
isog ang amahan
ang bata napuno sa kahadlok morag kamalig nga napuno sa mga tipase sa humay nga basa kaayo

ang amahan usa ka bagyong Lelang
ang anak usa ka payag lamang

wala pa kaniya ang mga pulong
apan moabot ra ang panahon nga ang tuhod sa tatay malup-og
og ang mga bukton ni Dodoy managko, mabus-ok og malig-on

kon moduyog na gani ang pulong og ang lawas
magsulti na ang bata sa tinood
dili siya gusto nga sudlayan sa usa ka hinapay nga sama sa iyang tatay
baho ang pomada og ang lana sa lubi
og ang iyang sudlay haskang haita
sakit sa iyang ayuyok

moingon ang bata
tay dili ko nimo sudlay
anak mo ako
dili ko imo
anaa akoy akong kaugalingong hunahuna og kasingkasing
gikan ko nimo apan
dili ko maimo

mosulti pag-usab si Kahlil Gibran
mangamuyo pag-usab sa tigulang nga nagluya sa iyang higdaanan
nga maghandom sa anak nga wala na diha
kay nangita sa iyang kapalaran....
kon papilion ka
sa pagbasa ning balak
o mag-chat sa
facebook
sayod ko kon asa ang
imong pilion

ayaw og kataha
ayaw na ko ug sultihi
sama nimo
mao sab ang akong buhaton

di na lang taka sultihan
dili ta managsama
mas nabuang ko
diri sa balak

ikaw



ikaw ang ilang giawayan
duha sila
ang kalag og lawas

pilia ang maghatag kanimo
sa kinabuhing dayon
ayaw kalibog
ayaw na og pangutana kon ngano
pagdali
kay hapit na baya mapalong ang
upon mong kandila

batia ang sakit sa imong kutokuto
ayaw panumbalinga ang
gasakit mo nga pus-on

pakan-a kadtong
motilap sa imong kasingkasing
ayaw kadtong
mopaak sa imong kiting

ang tsunami og ang balak ni Basho...



ang tsunami walay gipihig
tawo, babaye, lalaki, anak, amahan
awto, balay, basura, habol, katre,
koryente, barko, bagtok
kabayo, humay o pan
iyang dalhon
kan-on,gub-on, wad-on,
langkaton, ilubong,
buntugon, kawrason,
paakon, gision, lat-an,
lumpingon, kuso-kusoon,


lahi kaayo sa balak ni Basho
gipili ang
tumang kalinaw sa sapa
ang katin-aw sa tubig
ang kalunhaw sa mga dahon
sa mga kahoy
ang mga napalutawlutaw nga
mga water lilies nga durong
pamulak sa silong sa adlaw

og duna may gamay kasikas
wa nay lain
kadtong baki na usab nga
miambak sa tubig
usa ka nipis kaayong
kisaw
morag sapot nga seda....

morag wala lang...




pagkabigaon sa damgo

sa dihang nakat-on na unta ako
paghikalimot
nagpakita na man hinoon ka
nga gahubo sud sa akong
damgo
og sa dihang nahigmata ko
wala ka naman hinoon
didto

sayran ta ka
di ko moiyak
di sab ko mokatawa

3/19/2011

hubad sa balak ni milner

teyoriang gubot

giablihan nako
ang imong sulat

nangadto sila
sa karsada

didto sa Tunis

Cairo

Bahrain








hubad sa balak ni Rick

Og

ako ang pinulungan
nga gisulat sa bato
nga dunay sunog nga mga tikog
sa usa ka katuyoan
way makahinumdom.



and


by Rick Stansberger
I am a language
written on stone
with burnt sticks
for a purpose
no one remembers.

hubad sa balak ni Tikoy




wa ko nagkinahanglag tambal....ilad na

ako usa ka balakero
og alang sa kaayohan sa tanan
miundang ko og pakigpulong
sa publiko
og akong giputlan ang akong
mga kuko sa akong mga tudlo




i don't need medication...that's cheating

by Tiko Lewis


i am a poet
and for the good of all
i've stopped speaking
in public and cut my toenails

sayang ang mga bulak nga imong gidampas

gidampas niya ang
mga bulak
nahapay ang garden
aron lang niya
makit-an ang bitin
kay iyang tigbason

maayong pagkapusgay
ang mga yellow daisies
nga gikan pa tawon sa Davao
og kadtong mga
(ambot say ngalan atong
uban)
apan ang wais nga bitin
wa na jud
igkita

hubad sa balak ni t. lewis

definitely un-american
Tiko Lewis

klarong di-amerkano


gusto nako ang kinabuhi diin makainom ko og kape
nga wa nay kinahanglan og wiski
o arnibal

mao nga ayaw kog tawga sa akong first name
dili ko ganahan nga ako mahinumduman ana--
maoy iyang ingon, tul-id nga nagtindog
bawog gamay dapit sa likod
morag oten ni Gerald

sa tinood lang hangtod karon wa gihapon ako kasabot...



wala matuman ang
mga panaad sa gagmayng bata

mga bata man lang god
og kay mga bata wala gayod
silay mga sala

kay unsa ba ang saad?
ang nanay maoy nasayod

miingon ang batang babaye
ikaw ang magulang, ikaw ang mas nasayod
ikaw unta ang akong hawiran
nga haligi
ang akong tulay sa dakong suba
aron akong matabok
ang lubog nga baha
aron akong maabtan ang
karaang balay didto
sa usa ka isla

miingon ang batang lalake
ikaw ang akong inahan, asa ka man diay
niadtong naglibog ko?
asa ka man diay niadtong gikataw-an
ko sa mga tawo?
tungod lang ba kay tan-aw mo
nabusog na kami sa pamahaw
mahimo mo na kaming biyaan
sa tibuok adlaw?
sa dihang gisuntok ko sa akong kaaway
nganong wala ka man milaban kanako?
sa dihang miiyak ko
asa man diay ang imong panyo?

wala matuman ang saad sa usa ka gugma
ang pag-amuma usa ka idlas nga manok
nga ihalas

karon pagkalagyo na niining duha ka
gagmayng bata
mas layo pa kaysa
Autria og Sinuyak.

diha sa usa ka masusing pagtoon

usa gihapon kini ka kalibotan
dili matawag nga lahi
kay gani
alang kanako mao
kini ang kasagaran ang
kadaghanan

ngitngit ang palibot sa lawak
usa lang ang kahayag
diha sa flourescent bulb
nga morag mata nga
nag-atubang, mitutok
sa mata sa usa ka nagtuon
nagbasa
sa usa ka libro nga misaad
kaniya
nga langkaton siya sa kalisod
luwason siya sa
kamingaw
ang moibot sa mga lansang
nga nagtaop sa iyang lawas
ang motangtang sa
iyang korona nga tunok
ang mobayaw kaniya
gikan sa matag adlaw nga
kamatayon

ang balak sa kinabuhi
usahay
motabon sa dili na nato
maantos

hayagan ang kangitngit
ang gabii
bakakan kini niya
sa usa ka pula nga
tabing
butangan niya'g
adlaw ang kisame
usahay bulan
usahay bola nga
asul

kon mosakit na gani
kaayo ang mga mata
og kon ang kasingkasing
moingon na nga
sakto na

usahay
moabre ang bintana
og ang pultahan
mosulod ang hangin
aron siya
awitan

pagbati sa usa ka babaye ni pablo picasso...

morag usa ka exclamation point
nga pula ang tunga
actually bilahan kana sa usa
ka pablo picasso

ang mga bolbol sa kilid
morag buling sa uling

dali sabton nga ang babaye
naghubo sa imong atubangan
og ikaw iyang gibilangkaran

ang usa ka atngal morag hubag
nga kamatis
apan ang usa morag alom
ingnon ta nga kini
usa ka pasas lamang
sama sa pusod
nga morag itom nga butones

gilantaw ko ang nawong
ambot
ang akong gibati mao
man ang
usa ka kamatayon

in short
wala ko utgi
mora man hinoon kog
nahadlok
nga mogamit ning
klase sa
babaye.

tsk, tsk, tsk.

ang tigulang nga akong nailhan
palaampo, matag buntag atua gayod siya
sa simbahan, nagluhod, nagbasa sa nobenahan,
kumpleto sa putong, regular ang amot,
taas ang sanina, dagkot sa altar,
piyong sa mata, usahay gani magdupa
close sa pari, atendido ang mga
kapunungan

ang wala nila masayri nga
usa ka buntag niana
gisagpa niya ang iyang maid
didto sa kusina
tungod kay ang iyang kape
dugay kaayong giserbe.

3/17/2011

balak alang sa tawong walay pagkatagbaw

Mikanaog ka sa awto nga imong gisakyan
gisukna mo ang tawong nagpatunga sa karsada
nga hapit nimong naligsan
gipangutana og ngano, gusto ba nimong maghikog?
wa mitubag, og imong gipangutana unsay iyang ngalan og
asa diay siya paingon
og mitubag siya, ako ang tawong walay katagbawan
ako ang walay kalipay
og gusto ko nga mupahulay na unta
magpaligis sa ligid sa imong sakyanan
ayaw na ako og pangutan-a pa
og biyai ako, kay unta didtong lugara
basin og wala na akoy laing bation pa.

hubad sa balak ni Li Po




Sa tunga sa kabulakan, anaa ang tadyaw sa tuba
Kay ako ra man usa ang nagtagaytagay
Akong giisa ang baso og akong gidapit ang bulan
Giapil nako ang akong anino, maong nahimo ming tulo
Apan kay di man kamaong moinom ang bulan
Ang akong anino lang ang nag-awat-awat sa akong gibuhat.

Gihatdan kog anino sa bulan aron anaa koy kauban
Kining pagbansaybansay sa kalipay kinahanglang mosunod sa lakat sa Tingpamulak
Sa dihang mikanta ko, misayaw sab ang bulan
Mitindog ko, misayaw og ang akong anino milihok sa nga morag awing

Samtang di pa ko hubog magsadya tang tanan
Kay kon mahubog na gani ko mag-iyahay tag lakaw
Magbugkos ta sa kahangtoran ning lad-ang nga mga panaw
Manumpa ta nga magkita usab didto sa layong kaayong lugar.

SESSHU


Patay ang mga kahoy
uga ang mga bungtod
abog ang palibot
hait ang mga pangpang
bangkilan ang mga bato
gabaga ang mga balas
makasunog ang adlaw
giuhaw ang mga sapa
gigutom ang yuta

walay klaro ang dalan didto
padolong sa usa ka templo.

sa silong sa usa ka landong...

nabati mo ba
nga usahay mas
lami
kon ikaw anaa
lamang sa kilid
sa haligi
nagpahipi
naghambin sa
gugma nga
imong giamuma
nga dili mo
mahatag kang
bisan kinsa?

usahay
maghandom ka
unsa kaha kon
ako kining
gisalig sa usa
ka tawo?
kon ako kining
gipatilaw
kaniya?

anaa gihapon ang
kabalaka
basin og iya
lang kining
pasagdan og
dili ampingan
kon basin og
iya lang kining
kataw-an
og ipanugilon
nga walay
lami
maot, aslom,
pait
baho, pan-os
laksot

magkulismaot
gayod ang imong
nawong
sa tumang
kasakit sa usa ka
kahiubos nga
mas lalom pa
sa imong
gibating gugma
kaniya

og hangtod nga
ikaw mahimong
usa ka
kapungot
og dinhi mopuli
ang kasilag
og dili ka ganahan
niini

mahimo kang usa
ka balay nga
nasunog
og ang ilang
maabtan mao
lamang ang
imong mga
abo

og dili ka gayod
ganahan nga
mao kini ang
mahitabo sa
imong kinabuhi

busa, nakasabot
ako sa imong
pagpahipi lamang

mas malipayon
ka sa kilid sa haligi
sa silong sa atop
sa usa ka landong
nga bugnaw og
walay samok.

ang gitara ni c.

pagkamaayong mokitik
sa mga tudlo ni Cathy
sa iyang gitara
kon mamati ka pag-ayo
labi na sa gabii nga
gihayagan lamang sa bulan
dapit sa ikatulong ang-ang sa
hagdan
mosayaw gayod ang imong
kasingkasing
daw dunay upat ka tiil
nga mohagtik diha sa salog
nga tugas
mahigugma ka
mobalik ka sa sinugdanan
malimtan mo
nga ikaw adunay kataposan
mawala ka sa imong
kaugalingon
ibayaw ka sa langit
og ulahi na ang tanan sa
dihang hipalgan mo ang
usa ka patayng
lawas nga naghay-ad sa
nataran nga puno og mga
amorseco
mokalit og hulog ang
kusog nga ulan
masapawan ang musika
sa gugma
madungog ang iyagak
sa usa ka balo.
ang daan nga balay
ang sagboton nga nataran
ang abogon nga lingkoranan
ang mga dag-om nga panganod
ang balason nga yuta
ang nangamatay nga gapas
ang nangalaya na nga doldol
ang mga gusbat og hibat
ang labat nga wingig
kining tanan
angayan na nga
biyaan.

3/16/2011

sa kaadlawon
gidagkotan na usab namong duha
ang usa ka kandila
alang sa mga nangamatay nga
labaw sa napulo ka libo
didto sa Fugushima

dili namo kini palungon
hangtod na sa pagtak-op
sa adlaw

kining gamay nga kahayag
halad kini
sa usa ka ka kawanangan
nga kangitngit...
ang paak sa tanga nga
dagat
mitukob na usab sa
sobra sa
napulo ka libo ka

nga hapones

sa laing panglantaw...

ning larawan
nagtindog ka
taas ang imong
buhok
mipahiyom ka
nipis ang imong
lawas
ang imong mga
kamot
diha sa kilid
sa imong paa

sa tinood lang
mas ganahan ko
sa design sa
balay diha
sa imong
likuran...

asa kaha kining
lugara?
ang mga pula nga alibangbang
mibatog sa iyang buhok
mitabon sa iyang ulo og nawong

mabati mo kaha ang gibati sa mga alibangbang
nga naghugpong aron madimdim ang
katam-is sa gugma?

nectar ka sa akong hunahuna
alibangbang ko
sa akong pagkabuhi.

ang wala mapapas sa akong dughan...

usa kini ka pula nga bulak
sa kalachuchi nga akong napunitan
gikan sa tiilan sa iyang dakong punoan
sa daplin sa dalan
nga akong giagian kaganihang buntag
humot kini
sama kanimo

alang kini kanimo nga wala dinhi tupad kanako
bisag layo ka kanako
samtang nagtimpla ko sa akong kape
karong buntaga
kon akong lantawon na gani ang gihatag kanako
sa bintana
pinaagi lamang sa hunahuna
moabot ka kanako

taghoy ka sa akong kagabhion
tunob ka sa akong kagahapon

unang pag-abot sa gugma diha sa dughan...

sa kadaghang tawo nga migawas
gikan sa simbahan
niadtong Domingoha
ikaw og ikaw lang gayod ang
akong nakita....

ang duha ka babaye...

ang usa mao ang naa pirmi
sa akong hunahuna

ang ikaduha akong kadulog
sa matag gabii

silang duha
tambal sa akong kamingaw

pagamit sa x, y og z...

si x balod ra kaayog pilok
si y wala poy dughan
og si z
ambot mas kurat pa ni siya nilang
x og y
bisan sa kadugayon niyag puyo
wala gyoy
nakahibalo kon unsa siya

nagsulat siyag mga balak
ang tua didto
bato, hangin,
suba,

ang bato walay baba
ang hangin pak-an apan walay mga tiil
ang suba laagan

sa kabalod sa pilok ni x gihungihong kini nga
(bayot) og sa pagkapatag sa dughan ni z
gisumsuman kini nga usa ka (t-bird)

kadtong mga palahubog sa eskina durong
pangatawa
kay minyo baya kini silang x og y

si z ilang anak pero daghang nag-ingon nga
gisagop lang kining bataa
gibutang sa way puangod nga inahan sa kilid
sa pultahan sa balay nilang x og y

si z, hilomon, niwang, taas, luspad, og sa iyang
edad nga 15
ilang pasangil nga kining bataa sigig
lolo didto sa likod sa ilang kusina
nakit-an ni
Lucena.

si Lucena ilang katabang, nga gipaangkan nga gikapkap
usab kuno ni y.

si x, (makahadlok, gidungog nga kaniadto nakapatay og).....

dinhi ra ko kutob. sobra na ang tsismis...

3/15/2011

kalipay...

mga lunhaw nga
kasagbotan ibabaw sa
bungtod nga gituboan
sa usa ka karaang kahoy
sa unahan
sumpay ang bangaw
sa likod ang mga
asul nga panganod
og ang kapunawpunawan

sa tumoy sa pisi
nga gihikot sa sanga sa kahoy
mao ang ligid nga duyan

patas lang...

basta gani naagian na nato ang
agianan sa usa ka bakakon
bisan pa og tinood na ang lugar
nga iyang dalhan kanato
dili na gayod kita motoo

sahay man god pod
ato man pong patunhayon ang
atong kabugo.

3/14/2011

kahadlok

mao pa ang pagtugpa
sa mga dahon nga nangahulog
gikan sa patay nga kahoy

nangahadlok ang mga ulod
nga mipahulay una sa mga gamot

hubad sa balak ni David Harkins


Nag-iyak ka nga wala na siya
O mipahiyom ka kay nabuhi siya
Mopiyong ka sa imong mga mata og mag-ampo nga mobalik siya
o lantawon mo nga siya mipahawa na
ang imong kasingkasing haw-ang kay di mo na siya makita
o puno ka sa gugma nga inyong gisaluhan kaniadto
mahimo mong talikdan ang ugma aron puy-an ang kagahapon
o malipayon ka ugma tungod gahapon
mahinumduman mo lang siya tungod kay wala na
o mahimong amumahon mo ang handurawan og ipabilin kining buhi
mahimong moiyak ka og manirado sa imong hunahuna
manghaw-as og motalikod
o buhaton nimo ang iyang gusto
pahiyom, magmata, mahigugma og mopapadayon.

3/13/2011

kabahin sa atong balak

ayaw himoang gahi
ang balak
sama sa bato, sa puthaw
martilyo

hikapa ang humok sa
balak sama sa mamon nga
bag-o pang gihaon
sa oven
himamata ang
kainit niini sa imong
palad,


simhuta ang kahomot niini
sama sa ylang-ylang

o dili ba hinoon sa perfume sa imong
unang uyab kaniadto nga nakahatag og
talagsaong kagilok sa
imong ilok

panambo sa iyang mga
bintana og lantawa ang kaanyag
sa langit naghambin og
daghang mga bitoon

kay ang balak dili bato nga
ipukpok nimo
sa imong ulo hangtod nga
modugo kini
mokuyanap ang kasakit
gikan sa imong agtang
hangtod sa imong
kiting,
hangtod nga

hikalimtan nimo ang
tanang
nahitabo kanimo


kay ang balak dili pagtay-og
og pagsawan sa utok
dili kini kulata sa hunahuna
o bun-og sa imong
tanlag

duyan kini
sa usa ka laylay

salag kini sa usa ka
langgam

alugnan kini sa atong
mga kakapoy

awit sa mga langgam sa
kahaponon

huyohoy kini sa hangin
sa kabuntagon...

gugma

gisalikway ka sa
katilingban, pati imong inahan
wa na mosalig kanimo
puros na lang biay-biay
og panghimaraot
imong naangkon
wala na ang balay
hagbay ra nilang gisunog
wala na ang nataran
ila nang gilabat
wala na ang mga ganghaan
og mga pultahan
ila nang gipangsirad-an

asa ka man paingon?

ali diri,
ania ako hagbay rang
nagpaabot kanimo

katulog sa akong mga bukton
pamation ko ang awit sa imong paghinanok...

sayop nga pagpili

morag sayop
seguro ka aning imong
gibuhat,

misulod ka sa usa ka
langob
nagpapaak sa tanang
bitin

(tungod lang sa
bulawan didto
nga igo mo rang gihikap
og di ra ba pod
nimo mabitbit)

tan-awa ra god

milagom ka
mitikig.

3/12/2011

balak alang sa kalibotan...

gikahadlokan mo ang tanan
gikalimtan mo na ang kalami sa usa
ka katulogon

sud sa imong damgo
ikaw ang babayeng gigukod sa usa ka dragon
nga mibugwak og kalayo

gikahadlokan mo ang tubig
pati ang hangin nga imong giginhawa
imong gikalisangan

kagahapon
sa hungihong nga moabot ang tsunami
nagbukot ka sa imong habol
og wala na mogawas sa imong kwarto

buntag na
bangon
lantawa ang kalibotan
abrihi ang bintana

dili ba nindot ang mga kanaway
nga namatog diha sa dagkong mga bato sa dagat
dili ba usab nindot kaayo tan-awon ang
sakayan nga gipatongan sa mga bata
nga nag-ambak-ambak sa
malinawon kaayong dagat karon?

ang kalibotan
kamao usab nga maghunahuna kon unsa
ang makaayo og
makadaot kanato
iya kitang mga anak
mga apo sa tuhod
mga pag-umangkon
og mga ig-agaw
mga amigo

adunay sumpay ang atong mga
pusod
sa iyang kasingkasing

busa ayaw og kabalaka
kon milinog man
kana tungod kay gigil-asan ang
lawas sa kalibotan
kon mitsunami man
kana kay naligo lang ang
kalibotan
nanglimpyo sa iyang kagid
nanglugod sa iyang
mga buling
nanghilam-os
sa iyang nawong
nanarapo sa iyang mga tiil
og nanghinguko
sa iyang mga tudlo
namul-ong sa iyang
mga buhok



apan kadyot lang kana
pagkahuman niini
ang kalibotan mobalik
sa iyang naandan
mangabre sa iyang mga
bukton
kay iya na usab kitang
gakson

3/11/2011

ang wala diha og ang naa diri

bisan sa usa ka
tan-aw lamang
lahi gayod ang likod og
ang atubangan
lahi usab ang isulti
kon magkita ta
kaysa
wala kitang duha
kaysa wala
maghawid ang kamot
nako
sa kamot nimo

ang gugma sa kahanginan
mamahimong hunghong
lang kana
sa umaabot nga
katalagman

3/10/2011


nasabtan mo na ba kini?
nasabtan mo na ba ang imong kaugalingon?

giputol mo ba ang ang katre?
o imong ba hinoon giputol ang milapas nga tiil sa
usa ka babaye?


usahay wala ka sa katarungan,
usahay, ang kalibotan imong gustong isulod sa imong palad og sirad-an nga morag
usa ka lugas
sa bugas

sa tunga sa gahilang mong
ngipon

wala ako makasabot niini,
mao kana ang akong nasabtan....
sili na kon sili
halang man o mas halang pa
masunog man ang akong wait
sama sa usa ka sunog
sa mga nipa nga balay nga
gatapok

andama ang gatas

kay pagkahuman sa asdang sa gugmang
gisilian
masunog man kining dughan
andam na ang tanan

imnon ko ang imong gatas
tam-oson ko ang imong kaanyag

dili ko kini ibutyag
mao kini ang panaad

pakighilawas sa kasingkasing...

kon mosulod ka na sa akong pultahan
andam nang daan ang akong lawak

gihawanan ko na ang akong dughan
og mabati mo kon imo akong hagkan ang
kahaw-ang sa akong aping

kon hawiran mo ang akong mga kamot
samtang gitam-osan mo ang akong ngabil
mabati mo ang kagaan sa
bakhaw

mabati mo ang awit sa usa ka sulog sa suba
paingon sa baloron na dagat

kon mosulod ka na gani sa akong kasingkasing
makita mo nga walay tawo ang lawak

magpabilin nga kum-ot ang mga habol og ang
mga pundo maghisgot sa mga lama

sa mga laway nga nahulog og mitapot sa hanig sa
katre
manimaho kini apan dili ka na mag-ambat niini

mahikatulog ka sa usa ka damgo nga kuyog mo ako
nanakop sa mga alibangbang
nangutlo og mga bulak
mihay-ad sa balilihan og mipahiyom sa nawong sa
langit....

ash wednesday

ah, gikan ka sa abo
og busa mobalik ka sa abo

ah, lapokon ka
basa nga lapok
hugaw nga lapok
gusok usa ka ka gusok
og ikaw gusok usab nga gikan sa gusok

nakalimot ka nga gikan ka sa abo
misabod ka sa lapok og nagtoo ka nga ikaw usa gayod ka lapok
ah, sayop ka

abo ka, abo ka
tayhopon ka lamang
og mawala ka
malamog ka sa hangin
abog ka sa langit
og kon maghukom na unya ang gahimo kanimo
mamahimong ikaw

abog sa abog lamang.

pagsumpo...

aron mawala ang sala
gipatay niya ang konsyensya nga nagpuyo
sa iyang agtang,

kaniadto nagpuyo kini sud sa
iyang kasingkasing apan iya kining gibugaw
tupad sa iyang bugan

naulaw ang bulog
nanirado sa iyang bulsa og mihangyo nga unta
mobalhin siya sa ilok

bisan gani ang ilok
nataha og busa mihangyo kini nga mosulod lang unta
sa ulo ipon sa utok

apan ang utok
gamhanan usab gihakot ang konsyensya og gipahimutang sa agtang

daghang singot ang nauga
daghang luha ang mitagak sama sa mga dahon sa patay nga ipil-ipil
sa dihang namatay ang
konsyensya kay wala na gayod niya pakan-a

karon nga patay na ang konsyensya
miingon siya sa iyang mga kamot og tiil
gawasnon na kamong tanan
mahimo na ninyong buhaton ang tanan ninyong gusto

apan miabot ang Ginoo og sa usa lamang ka pamilok
silang tanan
naunsa ba nga nahimo mang

abo.

sud sa eroplano...

pauli na sa
balay

sakay sa eroplano
anaa ka galutaw sa gitas-on nga
singkwenta mil ka
tiil

ang isla sa Aliguay
morag alom na lang sa aping
ni Koray

mitakilid ang eroplano
misamparay
morag tulabong nga
napaakan og
hulmigas

mitugpa
mibwelo sa preno ang piloto nga babaye
gimub-an dagway sa runway

morag motikay-ang ang eroplano
mireklamo ang babayeng kunot og agtang
"nauyog ang akong utok!"

hilom lang ang laing
pasahero nga nagdalag
pasalubong nga
Goldilocks cake

kaingon kog
patay na ko.

ang wais nga manggihatagon

miingon siya:>

ania ang init nga bingka
imo kini apan dili mo kini kaonon
lantawon mo lang
hangtod nga kini mabugnaw
bantayan mo kini
batok sa mga hulmigas og langaw
initon mo kini
sa matag adlaw
aron dili mabaho aron dili
amagon
oo, imo kini apan dili kini
para kaon
lantawon mo lang
sa gabii sug-an mo kini
aron dili tugdungan sa
lamok
mahimong ang iyang anino
maoy imong hiwaon
kana, kana mao lang ang imong
kan-on

kamatayon

kadyot ka lang dinhi
apan nanghakot ka

dili na maganap sa mga oras
ang kahakog sa imong mga kamot

nagsalimuang ang imong utok
gadamgo sa tanang bulawan

adunay nanuktok sa pultahan
ablihi

kuhaon ka
nga hubo.
mas hanap ang tanan
diha sa pagpangita sa dayag

dayag nga walay dayag
ning kalibotana

dawata ang mga hanap
diha ang matood

ang kusog nga ulan sa gawas
ang kasubo

mao ang pultahan didto sa
kahayag

3/08/2011

Ang Dag-om



Nganong gadalogdog sa kaudtohon
Nga galagiting man unta ang kainit sa adlaw?
Sa gawas sa pultahan gisusi ang kalangitan
Ug tuod man, didto sa unahan, dapit sa amihanan
Galagom ang dakong dag-om.

3/07/2011

Pasas II

http://www.youtube.com/watch?v=20CLOVmf5jg&feature=player_embedded


Naa pa ba kahay dugo nga moagay 
kon puga-on ang namalhan natong 
kasing-kasing?



Ang ilang inadlawng kasakit
sama usab sa atong inadlawng
kalipay nahimong pasas. 
Ang galamhan
nabanhod sa pipila ka subli
nikiyos, nikulo.
nahulog sa kahakog
nga daw haw-ang
nga way kinutuban

Na-andan natong
talan-awon sa matag adlaw
Nahumol,
nawala ang panudya
sa tanlag
nahanaw ang
paghimatngon
sama usab sa
ilang kasakit
nakubalan na ang atong
kasing-kasing

alang lang gihapon kini sa imong kaugalingon...

sa pagtug-an mo sa tinood
gihandom mo ang mahibalik kanimo
gipangayo mo ang sukli
kadtong makalipay
sa imong pamati
nagpili ka og usa og dayon nimog
lakaw palayo kanila
sakit sa una apan sa unahan
nagsumbagay ang
mga kalipay

kabahin ni Juvy...

giuhaw si Juvy
gabii, bugnaw ang hangin,
apan init kaayo ang iyang lawas
nag-awas-awas ang inalisngaw sa iyang dughan
busa miadto si Juvy sa sapa
gihubo ang iyang sanina og naligo
gihapuhap sa sapa ang iyang dughan
sa hinay-hinay nawa ang mga alisngaw
milangoy si Juvy paingon sa lalom
misalom
gibuka ang iyang mga mata
gipangita ang makatagbaw kaniya
gibuka ang iyang mga ngabil
miinom og tubig sa sapa
og karon natagbaw si Juvy
nawala ang kauhaw

mitunga si Juvy sa sapa
basa pa ang lawas
og gisul-ob balik ang iyang sanina
mibalik sa iyang balay
og sa basa pa nga buhok
mihigda og
nahikatulog sa kalipay

wala na niya lantawa pa
ang larawan sa iyang bana
nga karon iya nang gikulob
sa ibabaw sa lamesa