2011/11/01

nag-inom ka ug beer, ikaw lang usa
sa tersena ni Maying, nga manirado na
tungang gabii na, gitungab mo na ang
kataposang botelya, nanamilit ka

naglakaw ka padong sa bukana aron
lantawon ang mga gagmayng suga didto sa lawod
mikiplat morag aninipog

nagpuyo kang ikaw ra usa sa gamayng payag
guot, ang mga bongbong mora kag gipiit
ang mga bintana lawlaw

migawas ka aron mohanggab sa hangin
mihangad ka sa langit nga gikampayotan sa
daghang mga bitoon

ingon ka "ako kining tanan ang langit ang mga bitoon
walay moilog nilang tanan gikan kanako"
ikaw lang usa ang manag-iya ning gatuyok nga kalibotan
walay utlanan ang kangitngit walay sangkuanan ang kahilom

ikaw lang, ikaw lang kay mibiya na siya kanimo.

Panginhas dire