12/28/2012

ang pagpalayo

ang pagpalayo
kon imong
susihon

mao baya
ang
makapadool
sa inyong
mga dughan

kay kon wala
na kini


di man usab
moabot ang
kamingaw

ug ang kamingaw
maoy
kahaw-ang sa
mga bukton
nga andam na
usab
nga mogakos
sa mga butang
nga gipalid kanhiay
sa hangin

ang gikan sa Dios nga Matood

giapuoran  kamo
aron walay magmahay
ang miabot
nangumbitay

kon kasakit man lang
ang imong nadawat
sa gihapon
magpasalamat

kay kana mao
gayod
ang gikan sa
Dios
nga Matood

12/25/2012

dula sa kinabuhi

sa mga dili nato
mahawiran
ato lang kining lantawon
palabyon
sa mga dili nato makita
ato lang kining
gibati
 sa mga dili nato maangkon
ato kining
buhian
sa mga dili nato malitok
sa hunahuna
sabakon

ingon ana ang kinabuhi
makamaong
modawat
sa dili alang kaniya
gihabwa
makanunayong
gawasnon
 hikyad sa mga hinikling
tak-om sa mga hinipos
limogmog
sa mga
makahubog
tulon sa mga
sulundon
tikwang sa mga
gawangwang
takilid sa mga
binaklid
pngko sa mga
linubo.

12/23/2012

phobia

mga kakulba di kamaong
mangatarungan
kahadlok nga walay mga
ngalan
makataranta

mobalikwaot ka
karon
asa na sila?

kaniadto man god
ikaw lang usa
ang nagdala sa imong
bunal ug
korona

12/22/2012

si Juan

sa usa ka pari
si Juan
usa ka amot
mas daghang Juan
mas dako ang
amotan

sa usa ka
poliltiko
si Juan usa ka boto
mas daghang Juan
mas daghang botohan

sa atong gobyerno
si Juan
usa ka buluhisan
mas daghang Juan
mas daghan
dako ang abot sa
buluhisan

pagkalooy ni Juan
gamay na lang kaayo ang
nahibilin
sa iyang
talad kan-anan

alang sa sanga sa usa ka kahoy nga karaan

mahimong nanimalos na kanimo
ang mga gugmang
wala matuman dili tungod kay
wa kay dakong gahom sa
paghigugma

lahi ang mga sugo sa mga papel
sa pamalaod dinhi

ang gugma usa lamang ka dalan
ug ang pagpangita sa laing mga agianan
dako kanang kalapasan

usa lang ang bulok sa sapot sa
ilang gugma
dili kini usa ka paypay
dili kini usa ka bangaw
itom ug puti kini nga bandera
sa karaang tulunghaan

ang misulay pagsupak hagbay
rang nangamatay
ug kadtong nahabiling buhi
nangandoy sa usa
ka hinanaling kamatayon

miingon kadtong nagtinga
"ikaw nga estranghero pa dinhi
gusto mo bang molantaw sa usa kanamo nga
nagmalipayon niining isla
sa kapiot?

andam ako nga mohatag kanimo sa usa ka
patayng lawas nga walay lungon
walay nagtikaw
ug walay mga kandila ug mga bulak"

sayod ako nga ikaw dili pa andam nga
mosabot niini
usa ikaw ka bata pa nga sanga sa
kahoy nga karaan
bunga ikaw sa usa lamang ka
punoan

nagpabiling makalanag ang imong
duga
unya ang imong balahibo
sama sa imong mga panglantaw
makaubo
sa mga kaliwat sa mga
nangamatay

12/21/2012

layag sa mga pagbati

gipauyunan ko ang
layag
sa pagbati

misakay ko
sa iyang baroto

gidala ako
kon asa ang iyang
giangayan
nga hangin

kon mawala kaming
duha
apil ako

kon malunod kami
sa mga unos
nga iyang
napili
oo, apil ako
niana

apan salig ako sa
akong mga bukton
mitoo ako
sa gahom sa akong
mga tiil

makamao akong
molangoy
balik sa
akong lig-on
nga kaugalingon

apan

ingon ka
walay mawala kon
ikaw motoo

tinood man

apan
adunay apan

mao kana ang
anaa

nga nakapawala
kanimo

ako mitoo
apan
dili na
kanimo

alang kang Jeff ug sa iyang mga kaliwat nga namakwit sa bukid sa Antulanga kaniadtong 21 sa Disyembre

wa matapos ang
kalibotan Jeff

sayang wa ka
kaapil sa party kagabii

pagkalamian sa kinilaw
nga bangus

maayong pagkalata
ang humba

pagkananam sa
beef steak

unya ang Queen's Lechon
pagka-crispy ang
panit

gabaha ang san mig beer
ug tanduay

napura ko
sa  buko-pandan
nga salad


sayang
nauwat ka nga
maglunop ang
kalibotan
unya mangamatay
kaming
tanan

unta dili kaayo danlog
ang dalan
sa Antulanga

unta dili mo madakin-as
sa inyong
pagkanaog unya
sayo sa buntag

kami nga wa
mitoo ( ug misalig
sa pung sa
Ginoo)

ania nagpaabot
lang gihapon
kaninyo.

sa dili mga pulong

ang atong mga pulong
mga batong atong gilabay
sa usa ka
suba nga atong gihimong
taytayan
sa pikas tampi

sa matag litok
kita moambak
sa matag patik
kita molagsik

kon moabot na kita
sa pikas tampi
sugdan na dayon
nato ang
pagsalo
ang pag-ambit
sa dili mga pulong

usa lamang ka nawong

ang tanan kanimo
usa lamang ka nawong

kalkag ang buhok
matang galutok
bungot nga walay
pul-ong
ngabil nga
naghipos sa
pahiyom

nindot pamation nga
ikaw
usa ka magbabalak

dili nako masulti kanimo
nga ikaw ang
kuwangkuwang

kon buhi pa unta
ang imong mga tiil
gisipa ka na unta
niini

kon wa nimo papasa
ang imong
mga kamot
gitamparos ka na unta
samtang
sayo pa

usa ka lamang nga
nawong
nga nawala sa
dan nga tarong

12/20/2012

ang kahaw-ang

aron malimtan ko ikaw
gitagbaw ko ang akong kaugalingon
sa imong
mga anino

ang imong mga anino
dili kamaong mahinumdom
dili sab kamaong
mosugid kanimo sa bisan
unsang akong gibuhat
tungod ug alang sa akong
gugma
diha kanimo

nahikatulog ako sa usa
ka paghandom
ug unya nahigmata na usab
ako sa
mga kahidlaw

mibanos ang kasakit
sa kalipayng tinipigan

giwala ko ang kasakit ug
karon ang
napuli kanako mao ang
kahaw-ang

kining kahaw-ang morag
lawas nga walay
bukton

morag langgam nga walay
mga pako

morag basong nanghambog
nga kuno siya puno

nga kon mangutana ka
ang andam nga tubag diay
mao ang
hangin

december 21, 2012

nalabyan namo ang mga
misaka sa habog nga
bukid sa
Malindang

disyembre 20 pa kadto
kusog ang ulan sa
Mahayag

lapok ang dalan
sa Josefina

gipetsahan ko kini ug
21
aron pagsulti kanimo
nga kami
nga gikan sa Pagadian
wala gayod
mitoo

ang matapos mao ang
tawo
dili kining gatuyok nga
kalibotan

 

ingnon ko ikaw

way makasulod
sa tungatunga sa
akong kalibotan

walay makatugkad
sa kalawmon sa
akong kadagatan

ang salag sa akong
mga hinungdan
ang gihulgan sa
akong nilugdangan

ako ug ako lang
gayod lamang

12/16/2012

sulat alang sa kaugalingon

gihimo kong
obligasyon
ang pagsulat
kanimo

aron ka lamang
mabuhi
sa sunod nga takna

gibasa ko kini
sa matag oras
alang kanimo

ikaw ang ako
ug ako ang ikaw

sa mga takna
sa hulaw sa usa ka
lawas ug usa ka kalag
sa usa ka tanlag
diha sa pagkahisalaag

ang akong mga sinulat
mao ang agianan
pagawas pasulod

ang imong pagbasa mao
ang mapa
sa akong padulngan
aron lang unta
hisabtan ko ang
tanan

kay ako ang ikaw
ug ikaw ang ako
ning hagit sa unos
sa atong kapalaran

minahal kong kaugalingon
pamalihog
ug dinhi sa kataposan
daghang
salamat

12/15/2012

ang akong estrella

daghang estrella

kaniadto siya ang
bazaar
pagkahuman sa
sunog sa 1963
siya ang estrellang
buang
nga naburos sa
pipila ka
bulan

pagkadaghan sa
estrella

estrelyang amazona
estrelyang puta
estrelyang madre
sa De la Estrada

apan usa lang ang
akong estrella sa
akong dughan

ikaw lang ang bitoon
sa akong
kagabhion

ikaw ang nagkumpayot
sa panganod sa akong
kasingkasing

kanunayng dag-om
 nga nabuntagan
ug inulan
alang sa akong
kagawasan

12/12/2012

sa sayong kabuntagon

walay kaligo ang
iyang kabuntagon

nagpabilin pa ug
mga muta ang
kagabhion unya

bahobahong pihot
pihot ang iyang
t-shirt nga naketsapan
sa guot nga videokehan
sa Pier Quatro

usual ang
mcdo alang
sa usa ka
instant pamahaw
aning tungura
dayog hiklad
sa mga headlines
sa libring
newspaper

ang headline:
nasikwate si
chief justice
ug migangnam gayod
ang sinaw sa  upaw
 ni binoy
sa kalipay

adunay tiguwang nga
miabot
gikan nag-walking
sa fuente

milingkod sa kilid
sa bintanang samin
diin migilak ang
unang adlaw

sa kamot nga kurog
giisa ang
kapeng barako

gihigop sa hinay
hinay
ang kainit

ugdayog  hungit sa pancake
nga gibasa
sa tam-is kaayong
syrup

di nako malikayang
molantaw

pagkamingaw ning
pagkatigulang nga
walay lingaw

milantaw sa matag
tawong milabay
sa sidewalk
dayog tutok sa
unahan

layo kaayo ang
giabtan
 dili na masukod

ambot ug unsa
kahay
hinungdan ning

lalom nga kahilom
sa taliwala
sa kisaw sa
nagkadaghang
katawhan

nagdali sab ko
ug wa na koy panahon
sa paghunahuna
kabahin anang
mga unsa ug mga
ngano



12/11/2012

ang mga bitoon

kanunay kong gipili
ang kahaw-ang apan

wala ko kini basoli
kay dinhi

kanunayng mamalik
ang mga bitoon


12/07/2012

sa dihang naputol ang kwerdas sa gitara ni Tiyo Miguel

makahinuklog ang
awit sa gitara

makasina ang gitik
sa mga
tudlo

hapit ako mahinanok
sa haploy sa
katulugon sa

dihang naputol ang
usa ka kwerdas

ug kadtong kalit nga
kamatayon

ni Tiyo Miguel ang
padayon nga nakapakurog

kanako nga morag ako
mismo

naputlan sa usa ka
ginhawa

unya nawala ang awit
nayabag ang

nagpabiling kwerdas
unya ang mga tudlo

mikaging morag mga
bato

nga nawad-an ug
kasinaw

sa subang naughan
unya ikaw nga mitaak

napaso sa hilabihang
kainit


circa 1967

gisulod sa sako
ang akong kalibotan
ni tatay

walay mitingog
hadlok

gibitay ni tatay ang
akong kalipay
gitagkosan

wala ko mitingog
nahurot ang akong
kahadlok

gitangtang ni tatay
ang pisi
gipagawas ni tatay
ang akong
kalibotan

walay mitingog
naandan


naandan ang
walay pagtingog

unya nanghambog
si tatay
nga ang amon kalibotan
malamposon
malipayon

walay lum-it
hapsay
linaw

ang kasuko usahay
malinawon
gisapnay sa kasingkasing
nga kubalan

kasingkasing nga
nanirado
morag pahiyom nga
hangtod sa pagkabungkag
sa kalibotan
wala gayod
makahinagbo ug
nawong sa
usa ka katawa

le charabia

ang akong mga mata
naghaguros sama sa usa ka
rural transit nga milabay
sa mga kakahuyan ug
kabukiran morag dakong
sawa nga mitukob kutob
sa unsay makit-an

mao nga wala ako'y nasabtan

apan kon nangutana ka pa unta
ako ka untang matubag kon ngano
ikaw lang ang akong gilantaw
ikaw lang ang akong gipaminaw

ning akong giantos nga kahidlaw.

12/05/2012

masamdan lang gihapon kining kasingkasing nga gikubalan

daghang dili malitok
dili lang mga pulong ang
malitok
daghang pang dili malitok
labi na
ang kamatuoran
nga naghatag ug
dakong linog
sa atong
dughan ug
utok

kabalo ka

apan unsa pa may
pus sa
paglitok niini? makabungkag
lang kini
sa atong mga
gitukod

kinsa ba ganahan
ang magbungkag sa atong mga
balas nga
palasyo sa
baybayon?

sa mga bata pa kita
mao kini ang atong kinaham
bungkag tukod
pista diha sa gukod
ug katawa

apan kining atong mga
bukog
lahi na
mora na kinig mga
basong dali moliki
sa ininit nga tubig

sakit ang paglabay
sa mga
buak
bisag diha sa tumang
pag-amping
sa paghipos sa tanan
masamdan
lang gayod gihapon
kining
kasingkasing
nga gikubalan

12/03/2012

Ang Mga Hut-ong

sa pikas tampi

sa pikas tampi
anaa ang balay nga imong tukuron

damgo lang
ang pikas tampi
nga ug
momata ka
mawala usab

sa pikas tampi anaa ang
dapog
anaa ang kalayo nga walay
pagkapalong
nagdilaab
sama sa imong dughan
dinhi

oo, damgo lang ang
pikas tampi
apan kon imong
piyongon pag-usab
ang imong mga mata
lapas
sa kabuntagon
mas tinood kini
bisan ug wala pa kini nimo
maabti

ang pikas tampi mao man
god ang imong padulngan
unya ang
panahon dili pa hinog
alang
niini

12/01/2012

pasalamati ang kamingaw

ang kamingaw
kanunayng kuyog sa mga
tawong sa kaulahian
magmadaugon

nga sa pag-abot sa
saktong panahon
pagakoronahan
sa usa ka kabantog
nga dili
mapapas.....

diha sa nagmalipayon nga mga kasingkasing

milabay ang mga katuigan
wala nato sabta ang mga adlaw
kay dili na kini kinahanglan

gilakat ta ang kadalanan
wala na nato pangutan-a kon asa ug
unsay ilang mga ngalan

kay dili na kini kinahanglan

gikatkat ta ang mga ang-ang
sa balay, sa simbahan, sa
mga pahulayan ug mga kahilayan
wala na nato maihap kon pila ug
ngano
kay dili na kini kinahanglan

natagboan nato ang mga
karon pa nato nahinagbo
nahimuot kita sa atong mga
nabati ug nakita
nakigduyog kita sa ilang mga
sayaw ug awit
nanglingkod kita sa ilang
talad-kan-anan
nakigsandurot
nakig-inom sa ilang mga ilimnon
nakig-ambit sa ilang kan-onon
ug nanglabay ang mga adlaw ug
gabii
wala na kita mangutana ug ngano
ug unsa
kay diha sa kalipay sa
atong mga kasingkasing
wala na kini nato giambat

kon pila ug unsa ug ngano
kay dili na kinahanglan

11/29/2012

ang tawag sa kamingaw

si nanay nagkugos nako
naglingkod siya sa bangko sa kilid sa among balkon
sa balay nga gialirongan sa daghang punoan sa mga pomelo

mahinumduman ko pa gihapon ang kabugnaw sa kabuntagon
nga gibulhutan sa hangin gikan sa baybayon
unya nakita nako ang mga dahon nga nangahulog

sa unahan nanglaba ang among sulugoon nga si minda
sa kilid niya ang karaang atabay nga hinimo pa sa akong lolo


ang mga  manok nagpasad
nanuktok sa mga tipasi nga mais
nga gisabod ni tatay

malinawon kaming namuyo sa maong balangay
walay madungog nga kisaw sa mga sakyanan

nindot pamation ang tinga sa baka nga nagsabsab
sa mga sagbot nga buhong sa kabasa sa tubig sa kilid sa suba

ang mga kagabhion puno sa awit sa kalanggaman nga mibatog
sa mga sanga sa kakahoyan
nangumbitay ang mga bitoon sa langit tupad sa bulan

pagkatam-is sa sikwate nga gituparan sa pilit nga budbod
kuyog sa mga katawa didto sa kilid sa balkon
sa balay nga kaniadto gihagoan ug patukod ni tatay
samtang ako kanunay nga gitangkil ni nanay sa iyang kiliran

kaniadto

oo, ang kaniadto nga nagpahimo kanatong magpabilin
nga malinawon sa atong pagkatawo

oo, ang kaniadto
ang kanhiay nga kanunayng nanambo sa atong mga panumduman
nanawag diha sa kamingaw

diha sa paghinumdom sa Ginoo

kon magsakit na gani ang akong mga mata
dayon balosan sa ngotngot sa kilid sa akong tiyan
unya
manghoyhoy ang akong abaga
ug mabati na nako ang mga dagom nga
morag nanusok sa akong mga tiil ug kamot
makahinumdom na dayon ako
sa atong Ginoo.

11/28/2012

Saksi


Sa pagtamparos 
Sa dakong balod
Sa agtang 
Sa dakong bato
Saksi ako 
Sa pagkahanaw
Sa alimungaw
Sa kalimot
Sa way katugkaran 
Sa kahiladman
Sa sinugdanan
Sa tanan.
 
Akoy
2012.11.28

11/26/2012

ang dakong bakak didto sa robinson mall, faura


sa dihang nagtagbo ang
atong mga tinan-awan
nakita nimo ang sayaw
sa kahilayan diri sa akong
dughan ug busa mihunog ka
aron pagsulay kon ako mosulod
ba sa imong hawla sa
usa ka umaabot nga awit sa
kalipay

misandig ka sa kilid sa
hagdanan
ug mihay-ad aron ipakita
nimo ang imong
naandang gipamaligyang
suwaw nga
 kaulag

sa kahadlok mipiyong ang
akong mga mata
nagpaaron-aron ang akong
mga pilok nga
daw katulgon

apan sayod ka sa akong
hagbay nga nga gipangita
ning layong dapit diin
ako morag gubang
barko nga
misagyad
ug misabod sa batoon
nga lapyahan

mipasiplat ka
nagpakita sa imong
mga mata nga andam
nga modawat sa akong
gipangagho

gihawiran ko ang akong
kamot
milantaw ko sa
akong mga tiil
mora kog bag-ong
barkong midunggo
sa usa
ka naandan nga
pantalan

gikuha ko ang akong
kumpas ug
mipadayon sa akong
panaw nga
walay klaro kon
asa dalhon sa akong
mga pangutana

gituntunan mo ako
sa imong tutok
ug ikaw nahimong usa
ka pasol
nga nawad-an sa
imong paon

ako ang nagpasalamat
nga karong
gabhiona
sa tungatunga sa dakong
lawod nga
katawhan
dinhi sa robinson mall
wala ka'y
kuha kanako

ako ang danlog nga
isda
nga makamao na nga
molikay
sa mga taga
sa kasakit

bililhon pa kanako
ang mga gutlo
nga dili angayan
nga magbasol
nianang
mabaw lang kaayong
kalipay
nga itugbang mo
sa akong
mga balod
sa kamingaw

fort ilocandia

makalibog

kinsa kaha ang
wa misunod?

alas dose trenta
na sa kagabhion
habit na ang
kaadlawon apan
wala gayod ako
duawa sa
katulugon

mihigda ko giatubang
ang kisame
wala kini nawong
ug wala kini kisaw

morag dakong unos
ang kasingkasing
morag mga halas ang
akong mga ugat
nga nanggawas sa
akong panit

milapad na pag-ayo
ang lawak
morag dako na
kaayo kining patag
unya ang tanom
puros init nga
balas nga gibulitan
sa gabaga nga
nga bato sa
akong tiilan

miikyas ako
ug midagan subay
sa usa ka
taas kaayong
langob nga dalan

sa unahan ang
pultahan sa akong
kagawasan
diin ako miginhawa
sa usa ka lalom
nga atabay

sud sa laing lawak
atua ang upat
nga nanigarilyo ang
mga tudlo
ug ang mga baba
misyagit sa usa ka
subo nga awit
unya mibula ang
bino sa ilang
mga tutunlan

ang kamingaw
diha sa pag-inosara
sa usa ka lawak


usa ka gubat diri
sud sa kasingkasing
diin ang
hunahuna gitumba
ug giyatakan

makamatay
ug busa aron mabuhi
lumsan ang
kabuang diha sa
pipila ka botelya
sa bino


ang dili mabuhat
buhaton
aron lamang
mabuhi ako
pag-usab
diha sa kabuntagon

ug tuod man
didto sa lamesa
anaa na
ang bag-ong
putahe
sa lain na usab
nga hugna

sa kinabuhi

11/14/2012

ang kasakit nga nagsunod-sunod kanako

dili ko madawat.
kining kasakit morag iro.
kon asa ko, kanunayng
nagsunod

kon molingkod ko sa
kilid sa pultahan
anaa kini sa ubos sa
akong tiilan
sa ikaduhang ang-ang
sa hagdanan

giawat ang akong
pagpanampiling

apan kamao sab kong
mamuyok
ang iyang buwak nga
laya
gisulayan kog
butang sa garapon nga
puno ug tubig

kamao kong magpaabot
kon kanus-a ang
mga laya nga buwak
mobukhad pag-usab

ang mga kahoy sa kalipay
nga akong gilabyan
napuno na ug mga salag
sa sayaw-sayaw

wala nako sirad-i ang
akong dunggan
ang akong mga kamot
wala manirado sa iyang
mga tudlo aron
sugdan ang paghimo
ug mga kumo

ang mga kasakit
gaukoy-ukoy kanako
kanunayng
gaatang sa
akong padulngan

apan ako na kining
gidawat
ug gihimong mga agianan

gitun-an ko pag-ayo
ang paglakaw
nga walay lingi-lingi
kanang
dili sab ko mapandol

mipahiyom ako
sa kagabhion
ug sama sa akong
naandan
ako lang kining
gikatulgan

11/12/2012

kabahin sa usa ka draft

nakuryos ko
naghinamhinam
kon unsa
kahay sulod
didto

imo kining
gisulayan
apan
wala mahuman

imong giabtan
ang limpyo kaayong
papel
seguro imong
gitutukan kaayo ang
pagkaputi niini
ang
pagkalunsay

seguro
nagduhaduha ka
pagtunob niini
basin
ug kini
mahugaw lamang

pagkadaghan
ba sa imong
gikahadlokan


sayran mo
nga ang atong
pag-abot dinhi
gikinahanglan
sa usa ka limpyo
kaayo ug
lunsay kaayo
nga papel

haw-ang kaayo kini
ug diha sa
kahaw-ang
bisan pa ug imo
kining
hugaw-hugawan
(diha sa imong
kahadlok)
ibalewala kini
niya

gusto lang niyang
siya
mapuno
arong kini
siya mahingpit

gusto ka niya
nga siya
imong tumban
ug wiriswirisan
sa imong
mga tunob

nagpabilin ang
iyang kahaw-ang
ug ang iyang
mga kamot
walay gihawiran
ang iyang baba
walay dila
ang iyang nawong
walay mga
mata

ngil-ad ang
kahaw-ang
ug ikaw
ang naghatag
niya niini


basin ugma
ug paulanan mo kini
sa usa ka dakong
dag-om
sa imong mga
luha


ingnon ko siya
nga dili makawang
ang iyang
pagpaabot

kay dunay gustong hikalimtan


 
basin ug mao na kini ang
luna nga
imong gipangita: 
dili kaayo halayo diin ang
ang mga sugilanon kabahin lamang
sa pagpamalhin ug kabaw
ug pagtugway sa mga
baka
diin ang mga babaye
kuntento na lamang diha
sa pagpangita sa mga lusa
ug mga kuto
ug sa mabaw kaayong
kalipay sa mga
pag-irok niini

basin dinhi ka
magmalipayon
ug dinhi ka
mutonhay

dinhi mo ipugas
ang imong 
mga adlaw aron
manubo ang
pipila ka
mga katuigan

muhunong ka kadyot
ablihan ang bintana sa imong
sakyanan
ug mosuyop sa lab-as
nga hangin
sa mga kakugnan
ug mga kakahoyan

mopiyong ka
aron 
paghandom sa 
imong 
gustong likayan
sa imong
gigikanan

unya 
paandaron mo na usab
ang makina
sa imong
gisakyan

ug ingnon nimo ang
imong 
kaugalingon

nga ikaw sama
sa naandan
igo lang
molabay
kay aduna kay
gustong handomon
hikalimtan
apan 
pirming
balikan

alang sa kinabuhi

kon bug-at
kaayo ang
tigib sa imong
mga kamot
aron ikulit sa
bato ang
kinabuhi

sulayi ang
pagsulat niini
diha sa
papel nga hangin

pak-an ang
hangin
masinabtanon
ang iyang
mga balahibo

ug bisan
sa taghoy lamang
og kaha
ba mga
panghupaw

makamaong
motono ang iyang
dila
sa usa ka awit
alang
ug tungod lamang
sa usa
ka
pagpakabuhi

kon giunsa ko pagwala ang kakapoy

gihatagan ko
ang tanan

giapuran
ko ug mga lugas
ang tanang
kalamgaman

gihalaran
ko ug mga
buwak
ang tanang
lubnganan

gidagkoran
ko ang
mga kandila
diha
sa altar

gisabwag ko
ang
ang akong
mga pulong
sa
kawanangan

gitaghoy ko
ang awit
sud sa akong
kasingkasing
ug gilupad kini
sa hangin
sa kapupud-an

gamay ako nga
tawo
nga nagpakadyos
sa
usa ka
gingharian
 diha sa
gugmang
gikulit sa mga
tigib
sa akong
kasingkasing

gugma lang
kinuyugan
sa mga
paghandom
ug
pagtukaw

ug nawala
diri kanako
ang
tanang
kakapoy

nawagtang ang
tanang
kabalaka
sa mga umaabot
nga adlaw

diha sa gugma nga hardin

ang
lugas nga wa motubo
basin
kay wala kini nimo
gitisok
sa yuta

basin kon
ang imong mga
kamot
nahikalimot
na
sa kabugnaw
sa tubig

ayaw palupig
nianang
kalimot

mas gamhanan
ang kasingkasing
diha
sa gugma
nga hardin

ako ang hangin

ako ang hangin
namalihog kanimo
sa
pagginhawa

ikaw ang
yutang
gitan-ugan
diha
sa kalimot

ako ang
hangin
nga sa matag
buntag
maghatod kanimo
sa
kahomot sa
mga buwak

dili mo ako
makita
ug gani
usa ako sa
imong
gikalimtan

apan ako ang
hangin
magpabilin nga
hangin

luag ako
sa gahuot mo
nga dughan

maglapos
lapos ako sa
imong
panit

wa ko sukad
magakos sa
imong mga
bukton

ug busa
dili mo usab ako
bisan kausa
maangkon

11/11/2012

ang pag-gisi

dili masayon ang
pag-gisi sa maong sulat
nga gitipigan ko
sa pipila ka tuig

kadtong gitisok
nako nga lubi
namunga na
ug
pagkadaghan
sa lahing

labaw pa ang akong
gibuhat
kay sa tinood
gisunog ko ang
tanan

gustong hikalimtan
apan
gitago ko ang
mga abo

ug dinhi
sa usa ka ting-ulan
diin bugnaw kaayo ang
lawak

gisulayan nako
pagbati ang
kainit
sa usa ka dakong
sunog
kaniadto

pagwiwi

sa imong pagbakwi
tan-awa
misamot noon ug
kahiwi

sa imong pagtabon
midaghan ang
gabon
tan-awa
unsaon na lang
nato karon?

kon imong kab-oton
ang puhon
nawiwi na hinoon
ang ubos sa
tabon-tabon

ang sakto untang
buhaton
mao na lamang ang
pagtonton

sa usa ka panahon
ikaw hadlaon
moabot lang kini
ug gakson mo
dayon

11/08/2012

ang kalinaw sud sa atong dughan

adunay giwang
sa kalinaw
nga 
tinipigan

sudlon ko
kini
sa usa ka
pagkinto

ni kisaw
sa isda
dili ko
tugtan
nga ang
ania
sulod sa akong
dughan
matukaw

ni hunghong sa
hangin
bisan
ang kahayag sa
bitoon
sa akong kagabhion
dili ko tugtan
nga 
ako
matugaw

lantawon lamang
ang kalinaw
dili kini
pakigsultian

pagkahuman sa tulo ka adlaw

ang atong gibilin
akong gilantaw una
ako mipahawa

mga puthaw nga
lingkoranan
sa ibabaw sa
balili nga
pinutlan

akong gibati ang
dakong kahilom sa
ilang
pagpabilin

seguro gusto nilang
mobabay kanato

dili sila sama kanato
kay wala silay baba
wala silay mga kamot
puthaw sila
bugnaw kaayo diha
sa ilang
kalig-on diha sa
dili pag-ambat sa
atong
gibati

alang sa isdang nagtuyok-tuyok sa gamay kaayong aquarium nga lingin

gilantaw ko pag-ayo
ang pinirisong isda nga

pagkaanindot ug bulok
diha sud sa aquarium

nga lingin ug kini
nagtuyok-tuyok daw

gustong mogawas ug
magpalayo

sa akong pagpamalandong
niini ako usab nabuyong

ako usab nahisama sa usa
sa maong isda nga

gustong mogawas aron
unta makalingkawas

sa makabuang nga tuyok
tuyok ning gamay kaayong

aquarium sa kinabuhi.

11/02/2012

unsaon ba ang paghikalimot?

nalabyan ko
na ang
gugma

nga adunay
dakong
pensa

giambakan
ko na kini
ug gipalay-an

mituratoy ako
ug dagan
nga morag
baktin
nga di mo
madakpan

apan bisan
sa kalayo
ko na kanimo
ania
gadilaab lang
gihapon
kining kalayo
sa akong
dughan

sa kanunay
gisunog ako
sa imong
panagway

asa kaha ako
moambak
asa kaha ako
modagan

aron lang ako
mahikalimot
kanimo.

dili angayang tubayan

ayay

kining
gitawag
tang
gugma
usahay

ayay

mora kog
nahulog
sa atabay

ayay

kining
gugmang
guba usahay

mora kog
nalumos
sa ginamos

dili gyod
angayang
tubayan

makalumping
makapiang

pagdawat... sa mga pangutana

kon
higugmaon ko
ikaw
unsa ba usab
ang kalabotan
mo
kanako?

ug kon
higugmaon
mo ako
pananglitan
lang

mangilabot
kaha
ako
kabahin
niini?

10/30/2012

sa akong dakong kasaypanan

gidamgo ko ang dakong
bukid
gibati ko ang
pagtungas
ang ginhawang
giabtan sa tuhod ug
suwang

sa dihang miabot na
ako didto
nakita nako ang kalapad
ug kahabog sa
tanang
panghitabo kanako tali
sa kalibotan

nahingangha ako
pagkasayop ko diay
pagkadugay

diayng natulog ang akong
mga mata

ug ang mga kabukiran
mipahiyom kanako

ug ang mga panganod
nanglupad
daw mga langgam
diha
sa hangin

amen

adunay nagsunod kanako

dili ko kini anino ug dili
ko kini
mga tunob

wala kini makaila kanako

wala kini makakita kanako

nadungog ko lang siya
ug wa ko usab gani mahikap

pagkalayo kanamo

apan sa dihang gibasa na niya
ang akong

mga kagaskas
ang akong mga kasikas
sud sa
pipila ka mga kaadlawon

nahimo kaming mga higala
ug dinhi
nagsugod ang among mga
pagsaka

pagtungas sa umaabot nga
mga bungtod sa
among kinabuhi

nga gusto namong
masabtan
aron lamang unta
makab-ot
ang mga bitoon

nga hagbay ra usab
nga nangapalong

pag-abot sa usa ka pagpamilok lamang

kitang tanan
baya
nalisang

angayon gayod
kitang
malisang

dalhon kuno sa
umaabot diha sa iyang
gakurog nga
kamot ang mga
katalagman

nakatawa ako
sa akong hunahuna

kay inig-abot sa
takna
sa saktong takna

kinsa pa bay
makakita nga kita
nalisang

kinsa pa bay
makasulti kon giunsa
nga kitang
tanan
nangalisang

usa lamang ka
pagpamilok ang tanan
karon

kalisangan ba
kini?

ang pagkapandol

nadungog ko ang
mga tingog sa lagapak
sa mga tiil
sa daghan kaayong
mga kabayo

gihimo nila ang dalan
paingon sa mga kabukiran
nga
wala pa nato
masabti

ang atong nadungog
tabon lamang
sa usa ka dakong bato
nga diin
kitang tanan
inig-abot sa saktong
panahon

mangapandol

mapapas

daghang nagpakita
sa matag adlaw
nga wala mo sukad
makita

walay mga
ngabil ang uban
ang wa nako
masabti nganong
ang uban
mora na lamang ug
aso
nga mikuyog sa
hangin
nangapapas
lamang

ako nga nagtindog
sa silong sa itom nga
panganod
sa tunga sa dagkong
mga balod
miingon sa akong
kaugalingon

"wala ug dili na gayod
ako
mahadlok"

sa maong kasayoran
ako usab
mapapas

tigmo sa atong kinabuhi

ang batan-on mibasa
sa makadaghan sa sinulat sa
usa ka tigulang

ubay-ubay uyamot ang mga
nasulat
ug busa ang utok sa maong
batan-on
mikapakapa daw usa ka
isda nga mao pay
pagtuon ug
langoy

sa dihang namatay na ang
maong tigulang
midaghan ang basahonon
sama sa kabaga
sa mga lubnganan
ug sa mga
balas tupad sa nagpakahilom
nga bungtod
nga naglaray niining
kalibotan

mao lang gihapon
mao lang gihapon ang buhaton
sa mga bag-ong
natawo

ang mga nangamatay
wala na magpakabana sa
kawalay-pulos sa
maong
binuhatan nga walay
pagkausab
hangtod na kini sa
kahangtoran

kay sa pagkatinoon
gibuhat ang tanan aron lang
paghuman
sa mga umaabot kuyog
sa mga
mipahawa

tawo

kaniadto
layo ang imong panglantaw
nahisama sa kalayo sa
imong mga lakaw

sa dihang gikapoy ka na
gitamnan mo na ug mga bato
ang imong naagian

ang mga takna
mipahiyom
pagkaoran-oran
samtang misugod ka na usab
ug tikang
ug dayog tanom ug laing bato

ang mga takna
mibuhakhak ug pangatawa

sud sa ilang mga dughan
diin gitapion nila ang ilang mga kamot
mibati usab baya silag
kalooy kanimo

10/26/2012

TUG-AB ni Atty. J. F. Lobedica



Kini ang timaan, timailhan sa pagkabusog.
Magdala kini ug pasidaan nga mitugkad na ang gipasulod
Nakab-ot na ang katagbawan sa kagutom nga nagbuntaog.

 Kitang tanan'g busog  magmalipayon, magmapahiyomon
Dinhi sa talad kan-anan sa mga hunahuna’ng mabulokon.
Sugaton ta ang talan-awon ning manindot nga kabuntagon.

10/25/2012

DIYOSA SA KATULOGON ni Atty. J. F. Lobedica

matag tikyop sa kagabhion, atong makit-an
ang hulagway’ng  magpasidaan ug   katumanan,
adunay nag-aginod pa, mura’g nalimot sa paulianan
daghang singot gipatulo,  adunay  pipila usab nga naughan,
aron lamang ang mga mithi  ug tinguha  makab-otan.

sa tagsa-tagsa’ng panimpalad, adunay palaran
adunay pipila’ng  mahitumpawak sa kamot sa  kaalautan,
salamat na lang, kay matag latag sa  higdaanan,  
kon mosapigad  na ang hangin sa  mamingaw’ng kagabhion
andam kini natong sugaton ug dawaton,  pakatam-ison
 gakson ug pahiyom,  miabot na ang DIYOSA SA KATULOGON

Ako Ikaw



Ikaw
Akoang
Ginatan-aw
Gianinaw sud
Niining kalimutaw.
Ikaw nga hinulma sa
Akong galamhan, ikaw nga
Minugna sa akong hunahuna,
Akoa. Ako ikaw...Ikaw ako. Usa, 
Kitang duha, nahiusa sud sa panan-aw, 
sa hunahuna, sa atong galamhan nga tinipigan.
Bisan tuod ikaw nga akong matataw sud sa akong
panan-aw akong mugna, akong gama lamang...ug ang imong 
Gianinaw sud sa imong panan-aw imohang buhat lamang..., ikaw
Ug ako nahiusa ra gihapon sa atong tagsa-tagsa nga paghimatngon.
 
 
Akoy
2012.10.24

10/24/2012

PANAPO ni Atty. J. F. Lobedica


 kini ang buhat nga motabon, motago, mohatag
 ug salimbong sa butang nga inampingan, 
dili gayud pahayagan, dili ipadaylang,

likayan kini nga makit-an, 
bantayanan nga dili makahungaw 
aron dili masingo ang hinungaw,

pastilan ang pagpanapo, 
magsugod kini sa kabatan-on 
apan makalimtan kon maabot na sa PAGPANGAPO!!!



Galiad


Nabinat 
akong galamhan 
Sa dayag nga kaanyag 
Sa lawas mong 
Galiad.

 Akoy 
2012.10.24

Ang Dalan Sa Kalamposan


Nahagit na ko, nadasig na ko 
Nahanaw na ang kahadlok 
Mipuli na ang kaikag 
Andam na ko
Mosagubang sa kapakyasan 
Paingon sa kadaugan. 
Matud nila
nga malampuson:
 "Kapakyasan ang agianan 
Padulong sa hingpit nga kalamposan."

Akoy
2012.10.24

10/20/2012

blanko ka sa imong palibot

sulaton ko kining
balaka
sa walay paghunahuna
kon asa
paingon kining
mga pulong

sama ako sa
panganod
puti
gaan
dili mahikap
sa ibabaw
sa
eroplanong
akong
gisakyan

layo ang panaw
sa usa
ka kamingaw

walay utlanan

gisulayan mo
paghikap ang sidsid
sa kawanangan
basin
anaa ang
kataposang
pinutlan sa tanod
nga gitangag
sa usa ka tayaon nga
dagom

wala'y mahikap
ning dapit sa
kamingaw

lapad kaayo ang
kahaw-ang
morag hangin nga
hakupon ang
tanan niyang
adtoan

gisusi ang tanang
mga utlanan
ang tanang mga lutsanan
gisubay
sa wala'y pagkakapoy

bisan asa milapos
ang pangagho
mora bag ikaw anaa
sa tumoy sa habog kaayong
pangpang
ug
unya
misinggit ka
unya gisuyop sa
mga panganod ug
kapudpud-an
ang imong tingog
nga nahilis
diha sa kawad-on
ug kalad-ang

unya ang imong
kataposang nakita
mao lamang
ang kahayag
sa likod sa usa
ka kahayag

unya dayon
nablanko ka
sa imong palibot

mas tunog

giabtan mo ang
usa ka
sirado nga
balay

kusog ang
ulan
nagkalanrakas
ang tingog
sa atop

basa ang imong
sinina
nasudlan ug
tubig ang
imong sapatos

gakurog kang
miabre sa pultahan
misulod
ug dali sa imong
lawak

sa usa ka lahi
kaayong
kalibotan

diha sa sud
sa imong dughan
madungog mo
ang tingog
sa tinahian
sa dagom

gisunod mo ang
panaw sa usa
ka tanod
diha sa kaugatan
sa imong
kasingkasing

mas kusog dinhi
ang tingog
sa tulo sa usa
lamang ka
luha

balak sa usa ka jerjer nga legal

tungod kay
obligasyon man lagi
pwes
antoson

mapugos ka
pagpagawas
bisan
dili moawas

sa usa ka yahong nga sabaw sa pagbati

mabati mo ang
kamabaw usahay
sa imong
gitindogan

magmala ang
imong
baba

bisan unsaon
mo ug
pabula
dili mabasa
sa imong
laway ang
imong baba

gusto natong
matugkad ang
kalalom
apan dili kini
masayonsayon

sulayi ug
ambak
ang lalom nga
lawod
sa kinabuhi

mabatian mo
ang
pagkalumos
sa imong
hunahuna diha
ra usab
sa galawod
nga hunahuna

usahay
bisan ug wala
kaayo
ang kalipay

mas maayo na lang
baya usab
nga magtampisaw
kita sa kamabaw

walay sakit
sa kisaw
kining sayon
ra kaayo
nga sayaw

wala pa baya usa
sukad
nahitabo nga dunay
tawong
nalumos
sa usa ka yahong
nga sabaw

ang asong dili makumkom

ang aso
dili makumkom

dili sab
mapriso sa
balay
bisan unsaon
nimog
panirado

kon sirad-an mo
ang bintana
ug pultahan
sa dapugan
di magdikidiki
ug
dagan ang aso
paingon
sa imong
gikatulgan

ug dinha
tuk-on ka
niya
diha sa imong
tutunlan


ang kiat

ang kaigat
kon sirad-an
ang pultahan
mokatkat

dayog
lupad
bisan
asa ipadpad
aron
lang
makabilangkad

kadtong
nagpasikat
lupigon
gayod
sa kiat

Katkat




KATKAT



Buhat nga mopataas
Magpasabot ug kakutas
Imong kusog maugtas

Kanunay’ng maghingotas
Ang mga mata manglurat
Kitang tanan, makakatkat.

Kon babaye ang mokatkat,
Bantayanan kay makabughat
Kon  bag-ong panganak, maahat

Adunay mga mahiligon
Ang katkat sayon-sayonon,
Mukatkat gayud, bisa’g gutom

Bahala’g  ang nawong lusparon
Agtang kunoton, buhok ubanon,
Dili mabangbang, kay buluhaton

Matapigas man  ug mahagbong,
Pakatam-ison, bisa’g may kahabogon
Kini katkaton, KAPAYAS  nga may gidak-on!!!  



Atty. JAMES F. LOBEDICA
Capitol, Cebu City

10/19/2012

ako, supak

mikiay ang imong kilay
sa dihang nahulog ang
mga dahon

sa hulaw ning atong
kinabuhi
sigig sayaw ang
mga abog
diha sa atong tiilan

sila lang ang malipayon
sa kilay mong kiat
sila lang ang nangagho
sa mga dahong
nangahulog

ako, wala, dili,
supak.

bisan kanus-a

kon imnon mo ako
palihog lang ug bilin
sa baso

kon kan-on mo ako
ayaw lang kulba ang
plato

kon anaa lang ang baso
dili mo ako
mahurot pagyarok

ug kon anaa lang gihapon
ang plato
nga nagtihaya kanimo

segurado akong
dili ko usab ikaw mahurot
bisan kanus-a

ang wala sugod matinood

kagabii
gidamgohan nako ang
mga anay
nga mikatap sa
akong
balay

ang akong
lawas
nahimong abog

ang mga anay
nahimong mga
langgam

ang akong damgo
nahimong mga
bukid

nakamata ko
sa kaadlawon

giuhaw ako
sa imong mga singot

nga nagtubod
sa imong dughan

sa imong
ngabil

sa imong liog
sa imong mga paa

gihigop ko
ang tanang kong
kahigwaos
kanimo

ikaw ang
akong damgo
nga wala
sugod
matinood

ako, ang akong anino ug ang bulan

sa kanunay mong panamilit
naandan ko na ang kamingaw

usahay gusto nakong
mawa ka na lang kanako

ako, kining akong anino, ug
ang bulan, malipayon na

sa among tagay sa among
kalipay

sa imong pagbiya pagkahuman sa usa ka halok

bugnaw ang akong mga kamot
sa imong pagbiya

akong gidapion sa akong dughan
aron mabati pa gihapon ang kainit

sa gadilaab kong dughan
nga imong gihagkan

10/16/2012

Tinghulog Og Dahon Pa Ba Karon?


Oktubre pa ron
Ngitngit na ang langit
Basa sa ulan ang dalan
Ug tugnaw na ang kilomkilom.

Apan nagkatag sa agianan ang mga dahon
Gapadayag sila nga tinghulog pa ron
Tinghulog og dahon pa ba gyod karon?

Akoy
2012.10.16


Kiay Sa Kilay


Giibtan  imong kilay
Gibadlis sa imong dagway
Anghel sa kaanyag ka man unta 
Inosenteng birhen sa  kabatan-on
Ngano man, kay uso ang sulondon?


Akoy
2012.10.16

Abog


Diin gikan ang mga abog
Nganong sa kwarto nakasulod
Gasamok-samok pa gyod!

Akoy
2012.10.16

10/15/2012

balak alang sa Adlaw

bisan sa
kabudlay sa
akong mga
pako

hapiton ko
gihapon
ang silong
ning kahoy

bisan wala
pa gani
miabot ang
adlaw

ako na kining
ampoan
awitan

pagkahuman
inig banagbanag
molupad na
usab ako

wa kong kabalo
kon asa
ang akong paingnan
apan
wa na ako'y
gikahadlokan


ang mga anay

miabot na usab ang
mga kugihan
sa hilom

tumpagon na
nila ang
imong
gipanghambog
nga dili
madutlan

DUDA

bisag wala
makita sa mata
himoan
sa hunahuna

ang nindot
nga hardin
gisabwagan
ug
mga binhi
unya nanubo
ang mga
tunok

dayog
singka sa baba
nga haskang
isuga

10/14/2012




Ang Kagahapon 

Gimingaw sa kanhiay nga pinuy-anan 

Usa ka handurawan na lamang ang nakaplagan 

Kay tinuod man, ang kagahapon wala nay  ulianan.


Akoy
2012.10.14

10/11/2012

ang sugilanon sa atong kaminyoon



ang akong mga bintana
ning balay nga dako ug habog
nabutaan sa
kaguol

kadtong bangko nga
gilingkoran sa
kinaulahiang miiyak
mibakho

natakdan ang mga
banga
napuno ug luha

giilad kita sa mga
hunghong sa katuigan
nga nagpaila
sa ilang mga ngalan
nga malipayon

ang mga mugna sa
mga hadla
puros man lang diay
tayhop sa
hangin

unsa ba diay ang ikaupat?

secret

dili ko gayod
kana
ipanugilon
dinhi

unsaon ba
paglitok
ang
kahilom?

unsaon mo ba pagsulod ang elepante sa refrigerator??

una,
dakpa usa ang
elepante

pilia kadtong
taas ug
ilong

ikaduha
isulod ang
elepante
sa imong
palad

dayon
imo kining
kumkumon

ikatulo
ablihan mo
ang refrigerator

pag-abot sa
ikalima
ayaw silag
ambata

ayaw ug
lingi nako

masulod mo
na dayon
ang maong
elepanteng
taas kaayog
ilong
sud
sa refrigerator

diha sa imperyo sa kahilom


 
gitipigan ko ang 
dili mo gusto
 
kadtong mga puti
nga buwak sa kilid sa bintana
 
gipatara ko sa adlaw
sa tubig gihidlaw
 
sa yanong panginabuhi
wa ta kinahanglana ang pari
 
kon magbungol ta
walay miul-ol kanako
 
mapugos kita pagtingog
kay wala na kitay laing pang buhaton
 
kon magkasinabot pag-usab
mag-inom ta sa usa ka tasa
 
nga sikwati diin gipangita
mo na ang kapait kaysa 
 
naandang katam-is
ako nangandoy gihapon
 
sa mga hulmigas nga
naa sa imperyo sa kahilom 

Tubag sa imong pangutana: Unsaon pag-pitch og tent?

Una, pangita og dapit diin kini luwas. Tuod, sama pod ni sa pagpangita nako kanimo. Kon anaa ka, di ko mahadlok bisan pa naa ko sa kinatumyan sa bungtod o bisan unsa pa kataas ang pangpang.

Ikaduha, kuhaa ang tent ug ang tanang parte niini. Bunggaka kini aron mas makita nimo ang iyang gidak-on. Ibanabana ang puwesto, hinaya pagkupot ang rain-fly, poles ug pegs. Tuod, dili ko magduha-duha og pagkuha sa tanang sulod niining akong kasingkasing, apan dili kini nako kuptan pag-ayo, dili pod nako pugson sa paghatag dayon kanimo. 

Ikatulo, ibutang ang trapal, mas maayo mas daku ni kaysa sa imong tent. Ipiko pasulod ang trapal kay aron kon mag-uwan, di kasulod ang tubig. Tuod sa gugma, moabot gyod ang higayon nga mangita ka og paagi nga panalipdan nimo ang imong pagbati. 

Kataposan, sugdan na ang pag-porma sa tent. Kon lisod, mangita og tabang. Kon naglibog, pwede mangutana. Kon nasayop, mohunong ka, ug pag-sukod og balik. Kon unsay kinataposan nimong gibuhat, mao po’y kinaunhan nimong buhaton. Mao karon, pangita og dapit diin kini luwas.

balak alang kang J.


 
ang wala mabalibag
mao ang akong kasilag
 
mao kini ang akong gisuot
ang iyang baho mao ang
 
singot sa atong kagabhion
mao kini ang akong gipanulti
 
nga sukwahi sa mga dahon sa libro
ang mga bato nahilos sa ilang
 
gitindugan sa yuta
nangapalid ang balas 
 
dia ang tulay
nagpabilin sa duha ka tampi
 
mao kini ang atong mga abog
natawo sa atong kaibog
 
pagkaanindot sa atong pagbiya
walay dahong nalaya 

kitang duha kaniadto

hagbay ko ra ikaw
nga nakita sa akong
kasingkasing

apan pagkabut-an
natong duha
wala kita'y gisupakan
nga mga balaod
nila

nagmatinud-anon
kita diha sa
usa ka pagpugong

kutob lang kita sa
paghandom
sa mga umaabot
diha sa kilid sa
bintana

nanambo kita sa
kaugmaon
gihambin ta ang
hapdos nga
bunal sa kagahapon

ang karon nga atong
gihawiran
usa ka baso nga
ang sulod
mao lamang ang
hangin

anino

wa ko pa
matugkad ang
tanan

apan andam
na ako
sa imong pag-abot

gipapas sa kapalaran

ang sapa walay
gisugid
sa iyang nakita
natong duha
didto

dugay na
kadto ug ang
mga handumanan
sama sa mga
larawan nga
gisab-it ko
sa bongbong
unya
gianay

gibalikan ko kini
apan ang sapa
wala na

milubad ang
mga katuigan
bisan gani ikaw
gipapas
man sa
kapalaran




pagpangita sa preskong hangin

gusto mong
mohanggab
ug presko nga
hangin busa
milakaw ka
paingon sa
lapad nga
basakan nga
gialirongan sa
mga bungtod
nga puno ug
mga kahoy

mibuswak na
diay usab ang
mga kahumayan

naa pay yamog
ang mga
espadang
dahon

basa pa ang
kasagbotan
ug ang mga
gagmayng bato
sa dalan
nagsinaw

bugnaw ang
panahon
unya hinay hinay
nga misaka
ang adlaw sa
dughan sa mga
kabukiran

nagtindog ang
nanaop sa basakan
sa kilid
sa agianan
nagkalo ug buli
nagsuot og
sweater
nanigarilyo
nagpaaso sa
kabuntagon

sa unahan adunay
nagdaub sa ilalom
sa kamanggahan
 giabog ang mga
daotang insekto
nga makahulog
sa mga gagmayng
buwak sa mangga

gibitbit sa hangin
paingon sa imong
ilong ang aso sa
sigarilyo

gituok ka sa baho
sa aso 
sa gomang gisugnod
sa kalayo
aron mabugaw ang
mga insekto
sa ilalom
sa kamanggahan

wala na ang presko
nga hangin
nagsakit ang imong
hunahuna

ngotngot hunahunaon
nganong
gibugaw ang
preskong hangin
palayo kanimo

mao kini ang nilugdangan
sa pagkawalay pakisayod
kon unsa ang
makaguba sa kinaiyahan
kon giunsa pagpasakit
ang kalibotan
diha sa sayong
kabuntagon
 

gubat sa bag-ong kabuntagon

sayo pa lang sa buntag natagbuan nako ang usa ka babayeng tabonon, batan-on pa, taas ang buhok nga medyo kulong,
nagtagbo mi
ang labyog sa iyang lawas morag duyanan sa bata
hugot kaayo sa iyang bilahan ang iyang mubo kaayong maong nga "short"
puok
nangliki ang atubangan
nangandiis ang likod
taas ang iyang mga tiil
kita ang pusod mga morag pasas sa mamon
lalom ang iyang mga mata
maanyag
medyo kiat kon molantaw kanimo
kiay
ugdo ang nipis nga blouse
namintana ang atngal
gustong mamusil
morag nangayam ug manatad sa lasang
pula ang ngabil
morag rosa
morag gustong motam-os kanimo

igwad
ang sampot
tag-as ang mga tudlo
morag kuyamoy sa
kasag
morag butong ang
iyang dughan
giuhaw ka ug
gusto nimong
moinom ug
sabaw

kadyot lang kadto

mora bag miingon siya
nimo nga
ania na ang gubat sa
kabuntagon
ug ang iyang mga
hinagiban andam
na

ikaw ang di pa
andam
gadali ka ug pauli
sa inyong balay

natagboan nimo ang
imong asawa

unya misulod ka
sa imong
kwarto
morag bomba
nga
nangitag
buthanan

10/10/2012

bulingon nga mga kamot

wala ako mag-ambat
kon madungog ninyo
ang akong
mga gipangyamyam
sa akong
kaugalingon samtang
ako nag-inosara
dinhi sa
baybayon

wala ako magbagolbol
kon wala kini ninyo
mahatagi ug panahon
wala kanako ang
mga pagbagotbot

kining akong panaw
panaw kini sa usa lamang
ka pulong
 sa baybayon
nga ang mamakpak
mao lamang ang mga
bulingon nga
mga kamot diha sa
balas ning
akong baybayon


ang akong gugma

hatagan ko ang
tanan
ug panahon

ihatag ko ang
tanan
kanako

walay magmahay
hatagan ko ang
tanan

pagtagad
mga pulong
isip mga
angayang
buhaton

aron walay
magmahay
isabwag ko
ang tanang
ania kanako
alang kini
kaninyong
tanan nga
ania dinhi
sa akong kiliran

apil na ang
mga halayo
kanako
ihatag ko ang
tanan kong
kahayag

usa lang ang
dili nako
mahatag
kaninyo

gisaad ko na
kini sa akong
kaugalingon

10/09/2012

Kalendaryo

Kanunay kong magtuo nga usa ka kaaksidente. Sama sa mga bag-ong dapit nga akong makaplagan tungod kay di ko mosalig og direksyon, o basin sama ka sa di magkapares nga tsinelas nga akong gisul-ob karon tungod kay kanunay ko magdali. Ikaw pod ang sayop nga tambal nga akong giinom kagahapon, maong naglabad ang akong ulo, nibikog ang akong tiyan, naglumbaanay og pitik ang akong kasingkasing ug adunay kabag-ohan sa akong pagginhawa. 

Usahay, sa dihang aksidente nakong matan-aw ang akong kaugalingon sa samin, naa ka. 

Hangtud karon, nagtuo gihapon ko nga usa ka kaaksidente. Sama sa pagkadiskobre sa penicillin o basin mao ni ang nabati ni Magellan sa dihang nakita niya ang mga isla duol sa Pasipiko. Kahinumdom ko, nasuwat nako ang imong ngalan sa akong notbok nga adunay daghang mga kalendaryo, mga petsa nga kinahanglan nako di makalimtan. Gisuwat nako didto ang imong ngalan, apan una na nahitabo. Nagbutang ko og mga tuldok nga walay hinungdan. Ug kon imong ning subayon, imo diay tong ngalan. Gisuwat nako imong ngalan uban sa mga kalendaryo, aron unta sa tunga-tunga aning mga petsa, aksidente kang magpakita.

ang dakong lingla sa kinabuhi

pagkadaghan sa angayan
pa untang sulaton

giingnan ta ka
nga kon imo kining mabasa
gihangyo ko ikaw
nga ayaw na lang tugkara

kay ang kalalom niini
nakalomos sa mga dili pa andam

ug wala na gayod sila igkita
gipapas sa kawanangan sa gilawmon
sa akong
kasakit

ang wala nako maingon kanila
mao ang mga ginagmayng kalipay
nga akong
gitanom sa akong kasingkasing

wala nako kini gisulat
kay sayod ako
nga walay bisag usa nga makasabot
niini


ang kalipay usahay
usa man god usab ka dakong lingla
sa kinabuhi

10/08/2012

pagkaparot paghikalimot pagkamatay

di na nako igsapayan
ang akong mga kahago
ang akong mga pagbago
dinhing dapita
dili na nila makita bisan
kanus-a pa

nagsulat ako ug mga sugilanon
aron ugma puhon
mabasa ug unya diha sa
pamasin
nga ang akong ngalan
dili mapapas
ug ang akong kinabuhi
mahinumduman sa
mga nangabilin

apan tagsa-tagsa kanila
aduna usa'y ilang mga panaw
nga mas layo pa
kaysa akong
kagahapon

busa mibalik ako sa
nanglabay
mga dahon nga gipalid sa
hangin
nga nangahulog
nga bulak
 ug unya
ang mga sanga
naghambin sa tumang
kamingaw
nangabali usab
sama sa mga
pangandoy
nato

nagabok ang lawas
nahagba
mibalik na usab sa iyang
pagkaabog


unya ang imong madungog
pagbalik  mao na lamang
ang haganas sa sapa sa daplin
sa atong dalan
ang hoyohoy sa hangin
ang mga taghoy sa
mga labong nga mga dahon
sa lapad nga
kakugnan

ang akong tinanom nga kahoy nga daghan kaayog bunga

ang dakong kasubo
sa kahoy nga akong gitanom
nga naghitik sa
iyang mga bunga mao
nga wala gayoy
bisag usa na lang ka
bata ang mikatkat
aron
pagkuha sa mga
hinog niini

anaa nangahulog
nangalata
gikulinitan sa daghang
mga langaw

10/04/2012

kitang mga tawhanon

ang mga bongbong
kada sulti nato
naminaw kanato

apan lahi sila
dili sama nato
nga kamaong
mobati

pagkahilomon
baya upod kining
mga bongbonga
morag mga
tugas nga
tig-a

naghisgot tag
kapait
nakaiyak kita
sa kahapdos
kining mga
balatian nga
tawhanon

lalom nga
kahiubos
gisapsap sa
mga kapakyasan
kining atong
mga dughan

usahay
mahikatulog kitang
gabasa sa luha
ang atong
mga alugnan
asgad na kaayo
ang mga habol
ug gitay-an na
man gani
pagsugod ang
mga bukton
sa atong
mga puthaw
nga higdaanan


sa dihang
nahilom na ang
tanan

way puangod
nga ang mga bongbong
nag-agik-ik ug
katawa
sa tanang natong
mga gihisgotan

way kalooy
siging panaway
natong
mga tawhanon

walay giabtan

ako natingala nganong
naghisgot kag
sakit

nakatawa ko kay
ang sakit
mao diay ang
imong dughan

unsa bay sulod diha
sa imong
dughan?

kining ako
haw-ang

dili sakit
wala kini maghatag
kanako
ug sakit

gianad ko kini
nga mabuhi
nga mahupong sa
kawanangan

kay diha sa kawanangan
anaa ang kahaw-ang
ug mao kana
ang tinood nga
tinubdan sa tanang
kalibotan

karon
sayod ka na
nganong
dako kaayo ang
akong kalibotan

ug ang kasakit
morag hangin
nga naglapos-lapos
lamang
sa akong
kanunayng abri
nga mga bintana

apil na niana ang
mga kalipay

mga bitoon sa
kagabhion

ang adlaw nga
misalop

ug ang
mga balod sa 
kadagatan nga
siging
panaw
apan walay
giabtan

dula sa panahon

kon moabot ka
magdula ta

dulaan ang
atong
tangag
tangag
ug dakop
dakop

kadyot lang
man god
ang panahon

pagkahamubo
ra sa
atong
panagdula

kalit lang
nato kining
putlon
kay taas pa
man god
ang atong
panaw

pagkahuman
magbulag ta
sa maayong
panahon

ako diri
ikaw didto

unsa bay
sakit ana?

gidulaan lang
kita sa
panahon
busa
ato lang pod
siyang
gidula-dulaan

mao kana
ang akong tawag
sa kalipay



 

9/26/2012

alang sa usa ka gamhanang mayor sa lungsod sa Corapcion

DILI dakong sala ang
pagpakaon sa
mga gigutom ug
pagpainon sa mga
giuhaw

Ang imong sala
mao nga
ang kwarta nga
imong gigamit
sa pagpalit sa mga
pagkaon
dili gikan sa imong
bulsa

gikan kini sa balaanong
kaban
sa kagamhanan

unya ang imong
gipainom ug
gipakaon
mao lamang ang
mga nagrehistro
aron makabotar
sa sunod
nga eleksyon