12/21/2013

balitok sa katarungan

buta ka nga nagsulat
bungol ka nga namati
amang kang misyagit
didto sa ngitngit nga
kahayag, ug ikaw ang
nagpuno ug tanang
katam-is diha sa kapait
kaabtik diha sa kahuyang
kaharuhay diha sa kasakit
ug nasabtan mo ang
pagkawalaypulos sa mga
gitawag nilag mga bahandi
ning kalibotan.

bisag ako dili ako
bisag gipuno na ang
kawanangan nianang
wala dinhi ug wala didto
busag kining akong gihambin
bug-at na gayod kaayo
ang kagaan niining
di matangtang nga
kahaw-ang

kini mao ang lawas
nga nagpakakalag
kini ang tawo nga
nagpakadiyos

nganong gusto ba gayod nakong mopasakit kanimo?

aduna koy pangutana nga mahimo nimong tubagon.
nga mahimo nimong bakakan sa pagtubag.
ug ako usab bisan unsang tubag akong tuhuan.
adunay maayong motubag, "unsa bay imong gustong madungog?"
unya ako sab, magpalingog-lingog, "kana lang gyong tinood"
unya kabalo kong di ka ganahang motubag niini,
unya ako sab, kunuhay mamugos nga unta imong tubagon,
bisag ang tanang gusto nakong madungog, ug ang tinood nga tubag nga
dili nimo gustong itubag, ania nang daan sa akong hunahuna
nga bisan unsaon pa nimog tuis, dili na gayod mausob.

ayaw kabalaka, nadungog ko na ang dili ko gusto madungog
apan sa kataposang bahin, ako lang usab baya dayon ang motubag niini.
nganong gusto ba gayod nakong mopasakit kanimo?
tungod ba kaha nga ako usab bisan kausa wala gayod nakatilaw
anang tinooray nga tubag sa kalipay?

12/20/2013

haskang layoa sa kamot sa akong kasingkasing

ingon ana ang Ginoo
bisan kapila ka kasala
mas labaw pa ang pasaylo

ang tawo sab bisag tualihon
mamakak,
kanunayng magpakasala
siging hangyo
bisag dili gayod angayang
itugot

si tony napandol
apan mibangon
si johnny nangilog sa iyang
hinuktang manok
busa iyang gidukong ang
iyang ulo
silot sa pagpangahok

ako namati
nangagho
nagpasalig nga ang Ginoo
kanunayng nagpasaylo
ug mopasaylo

daghan kog wa gisugid
nga nagpabiling mga tunok sa akong tilaok
di na kamaong motug-an ang akong baba sa tinood
hagbay ra kining nanglood

si tony
nagsigig kapandol
ug ako usab kanunayng
moagak

andam na kuno siyang
mapiang pag-usab

pasayloa, wa na koy nasabtan
naglutaw ko sa hangin
nagyamyam ug mga pangadye
nga haskang layoa sa
kamot sa akong kasingkasing

12/18/2013

tiguwang nga mamaligyaayg kandila sa kilid sa simbahan

lisod gayod diay ang
tinooray nga pagpakabuhi

wala mangambat ang tiguwang
nga namaligya ug kandila
didto sa pultahan sa simbahan
samtang ako kang
giingnan kabahin niini

kita nako hinoon sa iyang
baba ang iyang gihiktan nga
pahiyom
daw gustong mobiaybiay
kanako

ako nga bag-og sapatos
unya gagilak ang singsing
sa akong tudlo

unya ikaw sab
nagdalidalig pangurus
kay naulahi na kita
sa misa

kabag-ohan

kon magkita ta puhon
sa Colon
puti na nga karsones
akong suoton

putlan ko ang akong bungot
dili na kinahanglan
nako ang salaan
matag tungab nako
sa gabula nga beer.

12/15/2013

PAGDAHIK SA PARANOIA SA KILID SA DAPOG HUMAN NIMO KINI SUNUGA

sa abli mong bintana
gilantaw mo ang mga panganod
nga nag-usob usob sa ilang mga
panagway

malipayong panagway
nagpahiyom, nangatawa,
nanagdula sa kahayag
daw nagsabwag ug mga
buwak nga ilang gihakot
gikan sa langit

sa kilid sa imong balay
namulak na usab ang punuan sa mangga
nanghumot kini
nanghambog nga puhon
manghitik na usab ang mga bunga
nga plantigon sa mga
bata

nagymapungad ka sa usa ka
pangandoy
nga unta damlag wala na unta
kasubo sa kalibotan

nga unta ang mga dughan
maglisod na ug hambin
sa kalipay nga sa kadaghan
unya niini
wala ka na unyay
laing lugar nga kabutangan
niini
PARANOYA

ang hangin hapdos
kon modap-ig kanimo

pagkahuman ang kainit
sa adlaw daw kalayo nga midabdab sa imong dughan

ang tubig sa sapa kon imong tutukan
adunay migimaw nga ngipon sa higanting haw-an

kon mosugod kag lakaw
modagan sad ang bulan nga mora kag gigukod nga mora kag sad-an

paghikap mo sa taas mong buhok
mora kinig mga halas nga mamaak sa imong mga tudlo

ang imong mga tudlo mga limatok
unya ang imong baba morag sobre nga gipapilitan

selyado ang imong mga ngabil
busa sa dihang dunay nangutana kon nganong napuno ka sa kabalaka

igo lang misimag ang imong duha ka mga mata
kay wa kay ikatubag, dayog sirit nimo pauli sa inyoha

12/12/2013

hatsing

sa giugom-ugom mong
kaibog
nga imong gitago diha sa
imong tilaok
diin ang kakatol dili
na gayod maantos
tan-awa ug unsay gidangatan

migawas kini sa usa ka
hatsing

ang imong gugma
nakagawas man ugaling
apan anaa gipulpog
ra sa hangin

kitang tanan ako ra diay.

tagboon ko ang mga hungihong
bahin kanako
daghan kini sila ug ngalan
magkita ming tanan
nga morag wala lang
kadtong akong gisulayan
ug lipay kagahapon
mahimong maghatag ug pahiyom
kadtong wala madayon
diha sa saad-saad sa mga ugmang
walay kahumanan
hatagan ko usab ug tam-is
nga pahiyom tugbang sa
kapait sa ilang pagpangyam-id
niining among panagtigom
kuyog sa gidayandayan nga gamayng
salu-salo
mahimong puro kami mga
higala bisan ug adunay gitago
nga mga panagbingkil
kay kon mag-inom na ug mahubog
ug mawala sa among mga
gipangkubtan
makalisang hunahunaon nga
sa kataposan
kitang tanan
ako ra diay.

tintal

sa giwang sa bintana
nahulog ang kahayag
ug diha sa nawong sa
papel nga puti
ang anindot nga
lamdag
nanintal sa mga
pulong

ang tawo

sa kabugot
ang halas nangayo ug pakitabang sa baki
ang baki nanawag sa gangis
sa mga isda sa mga lamok

naghiusa sila diha sa kagubot
ug nabuntog kini

sa dihang nalinaw na
ug wala na ang gikahadlokan sa halas
sa hinay-hinay
gitukob sa halas ang baki

ang nahibilin nga baki
nanimalos sa mga lamok

ang mga lamok nanago
nahadlok na usab sa mga isda, ug sa halas

ugma moabot ang tawo
putlan ug ulo ang halas
nga maoy
gasugod sa kagubot


12/11/2013

unta

nagtagbo mi ni G. sa pultahan sa ikatulong undana sa habog nga tunghaan. Dala ang iyang bag nga itom
nakabarong siya.
sa duol na kami, nakita ko ang mga kunot sa iyang agtang. Nahug na ang iyang aping. Nasakit siya.
wa ko makatoo sa akong nakita. Lahi na kaayo ang iyang pamayhon ug panagway. Morag kalit ra pod kaayo
nga bisan ug ako wala makadeparar sa maong hitabo.

nakaingon kog, swerte ra ako gihapon  nga sa pipila ka katuigan, nga unta manghod pa man siya kanako og lima ka tuig, dili pa man gihapon makita ang akong mga uban, duha pa lang ka kunot ang milakra sa akong agtang, ug ang akong aping mihawid pa man sa bagon sa akong kilay.

managsama kami nga adunay mga kasakit. Nahisama lang ako sa iwon nga migana paglangoy diha sa tubig.
Bisag dili tubig. Bisan kalayo. Bisan gani nga ako dili iwon.

dahon lang ako nga misakay sa hangin. Apan siya ang sanga nga nabali. Unta, kon anaa pa ako'y panahon ako siyang suginlan sa gisugid kanako sa hangin. Sa gibilin kanako sa tubig.

paghikalimot kanimo sa dayon

karon nga wala ka na
pasayloa kaming nangabilin

dili na namo madungog
ang imong ubo

sa matag unya among
pamation ang gibilin mong kahilom

pagkahuman manirado kami
sa imong lawak

mogawas kami ug dayon
sa among pagpanaw giminaayo namo

nga ikaw sa dayon amo
na lang gayod nga hikalimtan

paghubad

hubara
ang akong balak

ang kwerdas sa gitara
ang tapi nga gibaid nga hiwa sa likod sa pawikan
ang tiguwang

ang kwerdas dili kwerdas
ang hiwa dili hiwa
ug ang tiguwang dili tawo

hubara pa gayod

usa lang ka kwerdas
nga putol ang moduyog sa
ubo sa tiguwang


goya

mas nindot
man gyod pamation
ang sugilanon
diin hangtod sa
imong pagkalibang
diha sa kabuntagon
di pa nimo
matukib ug matudlo
kon kinsa gayod
ang tinood
nga nagpatay
sa biktima sa usa
ka gugma

kon asa atong duha
ka amang
ang nagsulti sa matood

kon asa atong tulo
ka buta ang
nakakita sa tinood
nga nahigugma
sa babayeng hangtod
karon wa na igkita

kon asa sa upat ka
bungol ang
nakadungog sa pila
ka buto sa gaalburoto
nimong rebolber
diin ang mga simod
sa bala
anaa sa salog
nangalumping



kon asa sa lima ka
piang ang angayan
pa gayod nga
piangan aron dili na kini
makadagan
aron gukdon ang
gipatubo mong elepante
nga walay klaro
kon asa ang likod
ug atubangan

depaysement

kana bang pagbati
nga dia kos France
wakos pinas

jayus

dili kaayo
ayos nga pagkatustos
maong
makatawa ka sa
tambaluslos

pochemuchka

haskang samoka
gisapot ang yaya
sa batang di
mahutdan ug
mga pangutana

werdemon?
watismon?
wermaderis?
werpapayaya?

waldeinsamkiet

si samson
nawala sa kaugalingon
misulod sa
kakahoyan
sa iyang mga
kahigwaos ug
kalibog
siging panawag
sa ngalan
sa iyang inahan
nga hagbay ng
gisalohan sa mga
ulod didto
sa iyang lubnganan

komoreb

mga kuko
sa kahayag
mga taas nga
giway
sa adlaw
nga nanuot suot
sa
mga dahon sa
birhen nga
kagwangan

MANGATA

subayon
mo ang agianan
sa doña susana
diha sa dagat
nga gidayandayanan
sa bulawang
saya sa bulan
ning bugnaw kong
kagabhion

panapo'o

bisag walay
katol ang pahak
hala kalot

gustong
lukaton ang
nakalimtan
diha sa lubnganan
mong
utok

sobremesa

lami ang
init nga kan-on
sabaw sa
manok bisayang
tinolang gisagolan
ug hilaw nga
inabis nga kapayas
nga atong gisilian
ug kadto gayong
hinog

pagkahuman
nagpaaso kita
sa atong mga
balak ug sugilanon
samtang
nanilip kanato
ang bulan
sa kilid sa bintana

iktsuarpok

ning payag
sa pag-inosara
gipadaghan ko
ang nga bintana
aron dili ako
magpunay ug gawas
saka kanaog
sa hagdang
gubaon
aron lang paglantaw
sa unahan
kon ikaw na ba kana
ang mogawas
gikan sa
mga gapnod

cualasino

bisan unsa ka
pula ang lubot
sa imong baso
ning atong tagay

sa akong atubangan
usa lang gihapon
ang iyang gibilin
nga lama
ning walay hapin
tang pagpangga

diri sa duha ko ka mga palad

gikan ba god sa akong kasingkasing
ang mga balak?
dili sa tanang higayon

kasagaran gikan kini kanimo
samtang nagtukaw kita sa mga
sugilanon
kabahin kanato

ang balak mga buwak gikan sa
atong mga baba
pipila na ba ka kagabhion kadto?

nangahulog lang sa atong tiilan
og wala gayod nimo tagai ug pagtagad
bisan na lang sa paghatag ug dangga niini

nalooy ako, ug ako kadtong tigpamunit
nagduko, nag-amuma sa mga gihay
nga humot gayod kaayo

nga sa pipila ka oras lamang
mao ray dangatan ang ilang pagkalaya
diri sa duha ko ka mga palad

pagpaabot sa kahumot sa imong mga buwak

gipaabot baya gayod
ang imong pagpamulak

bisag wala pa diha
gidumdom na ang imong alimyon

sakto ang pagpisik sa ulan
ug ang kahayag sa mga adlaw

gilumutan na ang mga bato
natay-an na ang mga lansang

12/10/2013

kon nahibaw-an ko
pa lang
nga ingon ani
lang diay

wa na lang unta
ako misulod
sa tiyan sa akong
nanay

grrrr.
miabot ang kinaiyahan
nanglimpyo
sa hugaw nga gisabwag
sa katawhan

siya mismo
wala malipay
sa pagkadaghan
nga nangahapay

dili kini panimalos
dili kini gaba

wala nato madungog
ang hukom
ni Bathala

ang nahitabo
nahitabo na,

human sa pagpanglimpyo
sa kusog nga ulan
miiyak usab ang kinaiyahan

trabaho lang kini
walang personalan
maoy iyang sulti
sa malipayong wati.

12/09/2013

mosutoy tang tanan bisag asa.

ok lang
ayaw kabalaka
nagyamayama ka
atubangan sa dili
mo mga kaila,

ang bongbong,
ang pader,
ang salog, ang
batohong agianan

sabta nga
ikaw dili malipayon

sabta nga ako
magul-anon

sa lainlaing mga
katarungan

mosutoy tang tanan
bisag asa.

mao kuno kana ang tinood nga kalipay (alang kang J. nga naghisgot sa iyang pagkapraning gahapon)

mipaspas kog
sulat
adunay nagsunod kanako
gusto kong
magpalayo
kanang dili na gayod
nila ako maabot
bisan
lang gani
sa ilang pagbasa

namula ang akong mga mata
nangahulog ang akong buhok
nanginit ang akong lawas
ug dunay nangutana kanako kon
gusto ko na bang mamatay

gusto kong magpalayo
kanang dili na ako makita ug madungog

kamong nangabuang
palihog, hunong na kamo sa paggukod kanako

nasamad na ang akong tiil
nagdugo na ang akong kasingkasing

unsa ba ang gusto ninyong madungog kanako?
unsa ba ang ania kanako nga inyong kuhaon?

usa lamang ako ka hangin
usa lamang ako ka panganod

kon mokuyog kamo kanako
kon mosunod kamo

usa lamang ang atong padulngan
ang akong gihandom
usab kabahin kaninyo

mangawala ta ug dili na kita makabalik
ingon sila, kadtong gikan dinhi,
mao kuno kana ang tinood nga kalipay


malipayon na kaha kining iroa?

kining ako iro
dili kamaong mopatotoy sa iyang itoy

usa lang
usa lang gayod unta

gahapon mitikig ang
iyang usa ka itoy
kay dili gyod siya mopatotoy

karong buntag
iyang gipatong ang iyang suwang
sa akong tiilan
samtang gasulat ko kabahin
sa iyang kahimtang

malipayon na kaha kining
iroa?

si juan ug si san pedro didto sa langit

kinsay imong ngan?
ako si juan
taga-dis-a?
taga katipunan,
pilay edad?
trantay dos
unsay gikamatyan?
dengue
nganong wala mag-amping?
mora gihapon di na sab
ko ganahang mabuhi
ngano man?
wa koy kalipay?
nganong wala  sumpua nimo ang mga lamok?
ako silang mga amigo
ug aduna sab silay katungod nga mabuhi
wa ka bay gikawilihan?
wa
ang imong asawa?
bahala na siya
ang imong mga anak?
wa koy anak.
pasudlon mo na ba ako sa langit?
tagai kog panahon, ako pang hunahunaon.

pag-amuma

isulti ang imong
kahiubos samtang
mamati ko,
ako ang imong
trapo,
ako ang tigpauga
sa gabasa mo
nga hunahuna,
isulti pa ang tanan,
aron ka
mahuwasan,
malimpyo,
samtang ako
ang bag-ong
hugaw, ang basa
diha sa
kilid sa lamesa
diin ikaw
mangalisngaw
sama sa usa ka
baga sa oling,
dili ko masunog,
wa na sab ko
magdamgo nga
ako imong luwason
diha sa kalimpyo.

palami

nindot ang bulok sa yuta
nga abohon diha sa iyang
dughan, humot ang abo niini
init ang iyang inalisngaw nga
karon mihapohap sa imong
aping, milit-ad diha sa
gabasa mo usab nga ngabil,
sa kagilok nga gitunol sab
sa taas og lab-as mo nga
 dila.

paranoia

ang iyang inahan
namisita kaniya
gikan mipalit ug
isda sa merkado
aron ilang isud-an
ug pamahaw sa
iyang tatay, unya
dugay silang
hinagpanay hisgot
hisgot sa nanglabay
ug sa dihang
taas na kaayo ang
lakat sa orasan,
gipahimangnoan niya
ang iyang nanay kabahin
sa iyang tatay nga
nagtagad sa isda
aron ipanud-an sa
pamahaw
ug dayog iyak sa iyang
nanay kay ngano
kunong giabog siya
pauli sa ilaha.

12/07/2013

anagon, pa gihapon.

oi, ana, anaa ka pa diay,
anay, ngangong anaa ka pa man diha ana,
abi kog
wala na ka diha
di ba, ana, anaa ka man usab diha
kaganina
kagabii
nag-atong anang anaa diri kanako
anay, gianay,
ngano ba?

kanay, ana, ania na sab ko
inanay nga gianay, anagon,
pa gihapon.

kawna

wa kang kabangon
sa buntag
kapoy, lami pang
ibalik sa mga
damgo
sa katulugon

apan kay kaihion
lagi
mibangon ka
samparay nga miadto
sa CR
gibuka ang karsonsilyo
miihi

piyong ang mata
pagkahuman
nabati mo ang
nabasa nga
karsonsilyo

sigi na na
di matuyo

nanimaho kang
anso
di ka ganahang
manglaba
o maligo karong
adlawa

balik kag katulog
sakit ang kalawasan
morag wala na
magsumpay ang
mga bukog
morag putol na ang
mga ugat
morag kulang na
ang mga kwerdas
morag

ambot, kapoy
na...

pwera komedya
balik tas tinood
ayawg tawga nga Ka

ang imong kaugalingon.
kawna, ayaw
na anang bakak.

sa ikaduha

si tony
nabyudo

karyot lamang
nauyab ang
usa ka
batan-on

puti,
hamis,

pila may
sugilanon

nanganak
ang batan-on

puti,
hamis,

sa puti
ug hamis

nagsugod
pag-usab
ang panahon
ni tony

dili sa una
kon dili
sa ikaduha

ay, pagkaaslom.

hapit sa
sa akong bukid

dunay koy gamay
nga tamnanan

dinhi gibutang
nila ang ilang mga
sundang
sud sa puluan

ang ilang mga hanting
gitagoan nila sa ilang
bulsa

hapit sa
gamay kong luna

mag-inom tag tuba
dinhi ang mga palaigit
nakat-on
nag katawa

ang ilang mga ginagmayng
kaguol ilang
gihiklad sa daplin
sa lamesa

dayon nilag hikap sa
baraha
ug gisugdan na
sab nilag
saksak ang ilang
tagsatagsa
ka kinabuhi

kon duna kay
ihatag nga paglaum
palihog
hiposa una

dili pa sila
andam niana

usa lang ka baso
ang ilang
tagayanan

ang ilang tuba
ayayay
kon imong
matilawan
ay, pagkaaslom.

kabahin sa tiguwang nga taas ug bungot nga kusog moinom ug beer

dunay mumho sa
pan ang iyang bungot
iyang ngipon
nagkagot

giwisik wisik niya
ang hugaw

samtang ang taas
nga bungot
nabasa sa foam sa beer
sige siyang
bagotbot

nagtanga ko nga
nagtan-aw
ug wa ko baya gikan
niadto
nasabti
ang kalibotan

12/06/2013

maestro

magnganga
ang mga baba nga mamati
kanimo

mangalisngag ang
ilang mga ilong

nangatangkag ang ilang
dunggan

gikamingawan mo
ang ilang kauhaw

gihigugma mo ang
ilang kakulangon

busa mibalik ka
sa imong agi

ug mitindog ka
atubangan kanila

mag55 na ako karong enero

gidamgo nako ang
numero 56

namatay kuno
kini sa sakit sa

pus-on  sama sa
5 og sa sakit sa

mibusdik nga tiyan
sama diha sa 6

dili ko motoo niini
maoy ingon niya

wala numero nga
mamatay

apan nagduda ko
sa kamatooran niini

mag55 na ako karong
enero

ug kanunayng gasakit
ang akong tiyan

ang iro nga imong gianad sa iyang kagawasan

ang iro nga kanunay
mong gikuyog sa simbahan

siging gipasakay sa motor
aron maligo sa baybayon

kon unya imong pakityon
sa iyang karaang hikot

sa kadena nga igo pa
gihapon sa iyang liog

natural, natural lang gayod
nga mosimag ang mga mata

mopaghot, mangisog,
malagnot, ug mopaak

labaw na nga dili makiglambigit ang espiritu santo

tulo na
ang misunod sa akong tunob
tulo na
ang namati sa akong
tingog

anaa na ang
sug-ang
sa akong dapog

anaa na ang
daghang
mga apog

anaa na ang nasunog
nga mga takong
ug mga lukay

anaa na ang kawa
nga naghimo sa
atong lana

ihinod nato puhon sa
atong buhok
sa atong unod ug
sa atong mga
bukog

tulo na sila

apan pasayloa
kay dili sila ang
anak
ang amahan

labaw na
nga dili makiglambigit
ang espiritu
santo


mao kini ang tawag sa kamatayon

ang tanan
nagtuklod kanato sa
pag-inosara

ambot ug nabati
mo ba kini?
nadungog mo
ba ang tingog
sa imong kaugalingon
nga didto sa
lapyahan sa
suba nagpaabot
nagpaanod anod
sa nagkadako
nga tubig
nga karon hapit
na nga mohalok
sa butay sa
lubing karaan?

ingon sila
mao kini ang
tawag sa kamatayon

kay kon imbitahon
mo ang mokuyog
kon nasayod man
kini
segurado ako
nga dili gayod
kini mounong kanimo

bisan gani sa pagkuyog
kon imong hawiran ang
iyang kamot
kini gayod siya
dili mo mabunlot

ako sa akong pagkaako

ikaw ako
ako ikaw
ako ikaw
ikaw ako

mantra nga
gibalik
balik nako
basin makatabang
kini sa akong
pagpanaw

apan bisan unsaon
mawala ang ikaw
sa ako

ug ako
ako lamang
ako ang ako
ako
ako ug ako
lang gayod
gihapon
gikan sa sinugdan
hangtod
sa kataposan

ang akong
gipaabot
mao ang ang
ako mapapas

basin puhon
aduna na
ang kalipay
bisan
wala na ako
dili na ako
nga ako sa
akong pagkaako

sa kalibotan nga wala na ang mga pulong

sa usa ka init
nga kaudtohon
gibasa mo ako
isip usa ka balak

nakita ko kini
sa imong mga
pagsunod kanako
wala ko na
ambata ang imong
mga tunob

nadungog ko ang
imong mga
panghayhay

gihilantan usab
ako sa imong
pagpamati
kanako

karong gabii
takigan ako sa
kabugnaw sa
imong mga panghayhay

akong dawaton
ako ang magsakit
ikaw ang molabay
lamang sa kadyot
lamang nga panahon


unta magkahibalag
ta puhon
sa kalibotan nga
wala na ang mga pulong

kon ikaw ug ako wala na

sa una,
miingon ka
bisag usa lang
bisag usa lang
sakto na kana
kanako

apan wala
bisag usa lang
wala

miingon ka
bisag wala
bisag wala
sakto na kana
kanako

karon
wala ugma wala
ang umaabot wala
ug miingon
ka,
sakto kana
alang kanako

wala ako
wala ikaw
wala ako'y
nakitang
kalibotan

dili ako alang
dinhi
ug ugma
sakto ka
wala na usab
ako dinhi

wala ang isda
wala ang dagat

wala ang tanom
ug busa
wala usab ang
yuta

unsay pulos sa
naa
kon ikaw ug
ako
wala na

pinakalit

nagsakit ang dughan
kinahanglang hupayon

kini, kini, kining mga pulong
gibungat mo dayon

wala ang bulan, wala ang
mga bitoon

wala ang hangin
kini, kini ang pinakalit

balak misiplit
morag pusil gikablit

walay migikan sa kanunay nga pagbabay

ang matag gabii
nahimong bugnaw nga kamingaw

nasabtan nato ang mga pulong
nga wala mabungat
nabati nato ang wala magdap-ig
nakaplagan nato ang mga anaa
ra dinha sa atong tupad

wala na kita magtinan-away
kay wala man usab kita mag-away
giwakli ta ang mga naandan
gilabay ta ang mga gihawiran

ugma, ugma, ugma damlag
puston na nato ang atong mga tanlag
ugma, ugma, ugma damlag
mao kanunay ang atong gipangsaad

sa tiilan sa mga kalag nga nagkatag

gilubong ko ikaw
kinse brasas
mitingog ka
nagpakitabang
nadungog ko
apan giunsa ko ba ikaw?

gipatay?

dili ka man mamatay
dili ka man mawala kanako
bisan ug nabungol na ako
ania
nakadungog gihapon kanimo
bisan ug nabutaan ako
ania nakakita gihapon kanimo

asa ba ako paingon?

nagtagad ang kamatayon
nagdala sa iyang sanggot
nagsaas nga ugma
mao na usab ang pagpangabis
sa sanggotan

mobuhagay ang tuba nga aslom
sa tiilan sa mga kalag
nga nagkatag

balak sa usa ka kabaw

panahon na sa pagtuna
kining atong pagkakabaw
usahay

mohulom sa lapok
moligid-ligid
maglunang

panahon na sa pagbaid sa
sungay
pagpanakla sa dila
pagkawala sa pisi
paglayas gikan sa silong
sa kamalig

panahon na sa dili mo pagkaikaw
kadtong limpyo, humot, ug sulundon
moingon ka, "kadyot lamang kini
ug inigkahuman niini
mobalik ako diha sa pagkapiniriso
pagkaulipon diha kaninyo"

pagkalig-on gayod unta sa kalag

sa samin
gilantaw mo pagbalik ang
imong panagway

ambongan ka

gilantaw mo ang imong lawas
maayong pagkahulma

daghan ang moluhod niini

gitutukan mo ang imong mata
nakaingon ka ug "sayang"

pagkalig-on gayod unta sa kalag
apan pagkagabok sa lawas

pagkamalinlangon sa panagway
nga sa sala walay pahulay

pahimangno nga balak gikan sa usa ka sawa

ayaw paduol kanako
palihog lang
lahi ako,
bisan ug hapohapon
mo ako
sa tumang pagpangga
mopaak gihapon
ako
kay mao kana ang
akong naandan

palihog
ayaw ako duluti nianang
imong gugma
kay bisan ug unsa pa kana
ka tinood
tukbon ko gihapon ikaw
sama
sa akong
tanang mga gihigugma
kaniadto

sa akong pagbalos
sa ilang pagmahal
aron dili na sila mawala
kanako
ako silang
gitago sulod sa akong
tiyan

pahimangno gikan sa libro sa kinabuhi

wala mahuman pagbasa
ang maong libro

nagbilangkad kini atubang
sa langit

nagpaabot nga imong sirad-an
o imo ba kahang padayonan

ugma kaha, imo na ba usab kining
sugdan sa pagbasa?

ikaw, nagpaabot ka ba usab?
gihunahuna mo ba kon unsa ang sunod?

pagkadaghan sa basahon
makalibog ang kapilian

hangtod sa sunod nga hugna
sa sunod nga tagay sa sunod nga ikamatay.

mga balod sa kinabuhi

pagkadagko sa
balod sud sa tulo ka oras

nagpauyon-uyon ang
roro sa kagubot sa lawod

giilugan ang mga pasahero
sa dagkong mga dila sa

balod nga gustong motilap
sa ilang mga kalisang

tulo ka oras, tulo ka oras
lamang, nga ug kon mosipyat

mangawagtang gayod ang
tanang kinugihan sa kinaiyahan

mas lalom ang kahilom sa kalisang
walay bisag usa nga mitingog

oran-oran nakita na ang pantalan
sa dumaguete

midunggo na ang roro
ug giluwa na ang mga pasahero

pagtaak mo sa yuta
sugod na usab ang yugyog sa balod

sa imong kinabuhi
magpatambal ka sa usa ka masakiton

nga imong gimahal
ug dulom na ang mga panganod

kon kini siya lugwayan pa
sa pipila ka adlaw nga siya buhion.


12/04/2013

ang kagubot

ang mga nangahulog nga
dahon
nagpasad sa nataran sa
karaang balay

tungod sa kagubot (nga
gikaulaw ug dili na
masulti) giabogan na ang
mga lingkoranan sa
talad-kan-anan

sa likod atua pa gihapon
ang punoan sa mangga ug
sa iyang mga gamot anaa
ang mga pulak

sa una ang mga bata
malipayong namunit niini
sa kaadlawon

12/03/2013

ang limpyada nga walay nahot

pagkalimpyo sa iyang
nataran
apil na ang hardin
apil na ang veranda
apil na
ang sala

apil na ang lamesa
pagkalimpyo

walay plato
walay platito
walay kan-on
walay sud-an

ang nakaamgo sa iyang kinawatkawat nga kalipay

ganahan ko sa
punto diin
ikaw, kadtong ikaw
nga mokitik sa akong
kiting
sa akong ilok
sa kilid sa akong
kilid
ikaw nga kaniadto
makapaiyagak
kanako sa
kinawat kawat nga
kalami
unya karon
bisan pag
pakapinan ug
aguha
o bulawan nga
tibod
di ko na gayod
dawaton
kay ang kitik wa
na mikitik
ug ang gilok
wa nay gilok

salamat bathala
kay wa na ko
kapasipala

estatuwa ako
tunga sa plaza
labaw pang
rizal

akong mga suki


 i

suki
suki hala palit na
kamo suki
sa akong
mga piki


ii


suki
suki hala dali
na mga suki
basa na kamo
sa akong
mga balak
nga piki

BRINGHAUS

usa ka kawa nga
dukot

usa ka kalderohan
nga paklay

laing putos sa
mga bukog ug ugat

kamong nanghugas
kamong nagkiskis sa

itom nga lubot sa
kawa ug kaldero

kamong nanadtad
sa unog ug nagbuak

sa mga bukog, hala
hala, dalha ang tanan

ayaw ako bilini ug
mga sobra sa baboy

mga mumho sa bahaw
mga lama sa mantika.

sa usa ka mamistahay nga buros

asa ka diay
nagtrabaho,

sa Arvi's kol
naila-ila nako

kining tag-iya
sa akong

gisabak kol
nakalimot ko

wa koy
ganang magpakasal


kol, wa koy planong
akoy mobuhi

ning akong anak
ug iyang amahan kol

ning naabtan kong
bag-ong pagsulay kol

akong dawaton
naandan na nako kol

nga wa koy kalipay
wa ko kol, namatay


nakaplagang talagsaong kahilom

bansay bansay
sa bugsay

sakay sa
akong sakayan

bansay bansay sa
bugsay

ako lang usa,
karon, ugma ug

sunod ugma,
hangtod nga ang

bugsay ug ang
akong kamot

maghiusa na
diha sa pag-inusara

kalinaw sa
tubig sa akong

kagabhion, silong
sa bulan

silong sa bitoon
ang akong

nakaplagang
talagsaong kahilom

karon hapsay

ang pahiyom maoy
gilangayan

apan anaay tunok
ang dughan

giibot ang tunok
ug sa dayon

ikaw nga kaniya
tiunay

gikalimtan, gilabay
karon, hapsay.

unfinished business

pagkadaghan pa
pagkadaghan pa unta
sa dihang miabot
ka daghan pa gayod unta
ang humanon nga
tulomanon
apan pagkaanindot
mong miabot
sa iyang kinabuhi ug
busa
sa walay duhaduha
mikuyog ka ug imong
gibilin ang tanan
nga haskang daghana
nga karon
nagpabilin diha sa
ilang pagka
unta
lamang

12/02/2013

ang gugmang dili makaon

si petra nga mamaligyayg kamote
gimingaw ni pedro nga manuroyay og
ice candy

kon magkita silang duha matag
domingo lang didto sa taboan

si pedro nahigugma kang petra
apan dili kaingon
kay si petra mag-unauna mag
ingon nga ang gugma dili makaon

si petra usahay sa kagabhion
magbasol sa kahait sa iyang dila
ug sa kaadlawon misaad nga kon
magkita sila usab ni pedro
siya na mismo ang mopadayag
sa iyang tinood nga gibati

niadtong domingo nagkita silang
duha ug miingon si petra nga mopalit
siya sa ice candy ni pedro

gitagaan siya ni pedro ug dayog ingon
ganahan ka ba niini nga hilis na man kini?
ug si petra mitubag
wala na bay gahi diha?

wala na, wala na gayod, ug si pedro
milakaw palayo kang petra
kay alang kang pedro ang iyang
gugmang hilis sumala sa pulong ni
petra, dili, sama sa gugma,
kini makaon.

ikaw man diay kadto

ang dalagang ulay nga misulod
sa lawak unya durong gakos sa
kamingaw

akong gisundan.Misaka ko sa atop
sa iyang balay, ako siyang gisilip sa
kisaming akong gibuhuan.

Sa hinay hinay gikuha niya ang iyang
buhok, ang iyang ngipon, ang iyang
antipara,

gihubo niya ang iyang uniporme sa
eskwelahan, ang iyang kamison,
ang iyang bra, ang iyang pantilet,
ug dayon ang iyang puti
nga panty,

wa gyod diay ko masayop sa akong
pagduda,

ikaw gyod diay siya,
walay tuli, kunot ug
itlog ug adunay dakong
alom
dapit sa walang kandiis
sa lubot..

12/01/2013

sa usa ka nagtinga

sa dihang nagtinga na
siya ug hapit na mamatay
sa dihang nanangpit na siya
sa iyang hagbay rang
namatay nga amahan

mipalayo ka, gibati mo ang
kahadlok

mikurog ang imong mga tudlo
diha sa pagpangurus.

ikaw man unta ang gisaligan


dili ka bukag
nga daghang buho
nga pwedeng
sudlan bisag asa
ug pwede
gawsan
hangtod kanus-a

ambot ug ngano
ambot ug unsa

dili ka man unta
bukag
ug nganong
nalisngag dayog
kabungkag

anaa ang kananam diha sa hinayhay


tan-awa
sa kadaghan sa imong
gimugna

ikaw nahisama na
lamang sa mga balas
sa baybayon

nahimo kang ulan
nga mikatap sa atop
sa balay
sa kagabhion

bisan ug nagsiga
pa ang imong kalayo
bisan ug nangalimyon
pa ang imong
kahumot

wala na nila makita
ang imong kahayag
wala ka na mahisama
sa bulan ug
sa mga aninipot

giisogan na sila
sa imong kahumot
ug ang ilang mga
ilong
gisumhan

unta hinay hinay lang
inanay
sama sa paghikap mo
sa paa ni
neneng
sama sa paghalok mo
sa iyang mga
ngabil

anaa ang kahinam
diha sa kahinay
anaa ang kananam
diha sa hinayhay

11/30/2013

wa ko milantaw.

pagkapaspas gayod sa
panahon

morag kagahapon lang
gitaral-taral ni tessie ang
iyang duha ka anak nga
gagmay

kagabii misulod sila sa
akong klase sa
law school

ang akong gikalipay
pag-ayo nga ang among
mga nawong
mao-mao ra baya gihapon

adunay samin sa usa ka
lawak
wa ko milantaw.

11/29/2013

kabahin sa kahakog, ug sa wala pagpangilabot sa imong mga igsoon

kon giayo mo ug luya
ang imong lawas

mabaskog ka

kon imo kining gipangga
sa pagpahayahay

makulbaan ka man hinoon

sa kagabhion
nakigbugno ka sa katulugon

miabot ang mga bakukang
ug misulod sa imong dalunggan

kon imong gihipos ang
imong mga pagkaon sulod
sa imong aparador

atua ang mga balagtok
ang mga hulmigas
giunhan ka sa pagkaon.

11/28/2013

tambag

wala kuno'y gahi
nga pan sa init nga kape

wala'y babayeng di
mahaylo sa lalaking
pasensyoso

kon ang pan
mahimong bil-ongan
walay mahimo ang
kape

kon ang lalaki
mas gahi pas lansang
akong tambag

ni inday, martilyohon
aron malubong.

ang babaye sa akong likod

sayong buntag sa
simbahan
nakita ko ang babayeng
niwang nga
nag-ampo

nagluhod
namula ang mata ug
iniyak

hugot gayod pag-ayo
ang iyang pag-ampo
ug ako nga naglantaw
morag
natuok

gugma sa kaugalingon



humot ang alisngaw
sa akong ilok

tam-is asgad pod
ang akong singot

kanunay kong mingawon
sa nabaklag nakong purol

ang kugang sa akong samad
nga akong gitangtang

sa ibabaw sa akong palad
lami kaayong lantawon

11/26/2013

paglubong

tungod sa akong
hilabihang gugma diha
kanimo

sa usa ka halok lamang
nagawsan na ako

sa usa ka hawid mo
lamang
milupad na ako

sa usa ka lantaw lamang
misubang ako

sa usa ka pagbiya
matag adlaw

gilubong ako
nimo sa makapito.

ang naandan

naandan ko na baya ang
pag-inosara

nahimo ko na kanang
kalipay

kanang maabtan sa
ulan ug dayog sayaw

kanang mabulad sa init
ug dayog awit

kanang ako ra sa lawak
ug dayog pista sa akong kahilom

kanang makamata sa kaadlawon
ug dayog lupad sa imahinasyon

kanang mabuntagan
unya sukad sa bugnaw nga pamahaw

kanang manghilam-os
mag-ilis, magpahumot
manudlay

unya walay klaro kon
molakaw ba o modagan

kon magpuyo lang
diha sa kilid sa bintana

ug manglantaw sa tanang
mga lumalabay

ang balak ang ang mibalak

ang balak mikiyod
ang nagbalak misakyod

diha ang kinabuhi
sa tunga

malipayon sa
pagbangga
bangga

mao man kini
ang dula sa kote

ang pompyang
sa duha ka kamot

walay lingaw ang
mga mata

nga sa kalami
nagpunay ug piyong

diha sa ilang pagbiya

kay imo mang giatbangan
pwes ila kang gibiyaan

wa sila kasayod nga ikaw
karon ang bag-ong bao nga

gilabay sa bugnaw kaayong
sapa, naglangoylangoy, miawit.

11/24/2013

didto sa usa ka lungsod nga akong giadtoan

pagkaanindot sa mga kabukiran
pagkahamis sa mga sapa
pagkabug-at sa mga sipi sa
hinog nga saging
nangumbabit ang mga marang
pagkahumot sa mga nangka
pagkalabong gayod sa mga bulahan

pagkalisod gihapon sa mga katawhan


nagtabisay ang laway sa usa ka batang
laagan nga nagtan-aw sa mga hiwa
sa litson nga pinutos sa dahon
nga atong gihay-ad
sa lamesang kawayan

pagkalisod gihapong mabuhi sa usa ka
lugar kon ikaw makontrahan sa usa ka kapitan

pagkalunhaw sa mga kakahoyan
pagkaasul sa mga kapanganoran
pagkabugnaw sa hangin
ug sa tubig

pagkainit sa politika, pagkawalay puangod sa mga midaog
pagkamadinumtanon sa mga napildi sa miaging eleksyon

11/20/2013

ang mga kaguol nga dili na makaguol

sa paglabong sa edad
sama sa usa ka dako kaayong kahoy
nga tugas
nga nagtubo sa kilid sa pangpang
sa ibabaw sa mga
dagkong bato
madugay ug sa madali
maandan mo ra ang tanan
ug moabot ka sa higayon nga
ang kalipay dili na makalipay
ug ang kaguol dili na makaguol
ug sama sa usa ka bata nga
gibiyaan sa iyang inahan
bisag kinsa nga mohangop kaniya
iya sang hangpon
piniyong ang mga mata
ug diha
unya mabati na ang mga
mabati nga sa ilalom morag
wala na lang
gayod ang
mapili.

11/13/2013

sama sa usa ka iro nga malipayon

gilantaw nako ang
akong iro nga itomon nga
nagdagan-dagan
sa plaza

dunay giduladulaan nga
wa nako makita

kini ang akong adlaw karon
sama sa usa ka iro
nga malipayon

sa tulo ka adlaw way gikaon.


sa dihang nakita mo ang tawong
nagbitbit sa electric fan, meat grinder,
frying pan,
chitchiriya,
mishagit ka, "mga kawatan!
mga unggoy sa lasang!"

"sus, tan-awa pagkabaga sa
nawong
walay kaulaw
gadiwalwal ang dila
sa mga kawatan!"

naghilom lang ko
kay bisan ug ikaw nga morag sa
akong lantaw
dakong sayop
wala usab ako'y katungod moingon
kanimo
nga

"bogo!!!!"

kay hangtod karon wala ka pa
gayod gihapon
makakat-on kon unsa ang tinood nga
kagutom, ang kauhaw, ang
pagkawagtang sa paglaom
ug ang mga sunod
pa nga mga pag-antos

og kon unsay angayng buhaton
sa mga tawong sa tulo ka adlaw
way gikaon.

mahitungod kanako ug sa atong katalagman


kini ang akong tagoanan
dinhi ko isulti ang dili ko masulti sa
akong mga suod nga
higala

dinhi ko mapahungaw ang
wala nako mahatod sa akong inahan
ug amahan

dinhi ko iladlad ang mga bulingon
nga gilabhan, gikusokuso ug giwaswasan
dinhi ang akong sablawanan

wala ang adlaw dinhi, apan ania
ang kagabhion
dala sa pipila ka mga bitoon

unta dili ka makatultol dinhi
unta dili mo kini mabasa

alang kini sa tanan,  basahon nila
magpabilin silang walay mahibaw-an
dili kini alang kanimo
kay ikaw nasayod na man kabahin
sa tanan
mahitungod kanako ug sa atong
katalagman

wala nay makakutlo niini ako lang.

karon sulayan kog
kalimtan ang
gugma

mosibay ko
atimanon ko ang akong
dalan

dampason ang mga
kakugnan
limpyohan ang
kasagbotan

ugma kon mahawan na
basin ug
tamnan ko na usab kini
ug mga bulak

wala nay makakutlo niini
ako lang.

ngano kaha nga nagsigi man og katawa ang maong bata?

sayong kabuntagon
didto sa simbahan
ampo sama sa naandan
milingi ko dapit sa akong
too
atua ang babaye nga
nabuang
kalkag ang buhok
bulingon ang sinina
kum-ot ang sayal
gatiniil
nga miampo sab

ang akong gikalibgan
ngano nga kining bata nga
kuyog sa inahan nga
posteryoso
dagkong aryos ang dunggan
nagsigi man ug
katawa atubang
sa buang
nga mora gyod ug gigitik
ang iyang ilok

gitakaw-an kaha niya
ang kalkag nga buhok
o basin ug kining
bataa
anak usab sa kaliwat
ug buang?

11/12/2013

ALANG SA TUBIG, UG SA UBAN PANG MGA TABANG



daghang mahimo
ang mga kalooy

mas daghan pog
mahatag ang mga pangadye

makatabang pod ang
mga tawag, ang mga pangumusta
ang mga pulong sa pagdasig
sama sa

tacloban bangon
roxas apas

moingon ang usa
dugangan pa ang pag-ampo

moingon ang uban
na tan-awa wa man god
kamo magbasol sa inyong
mga kasal-anan

gisilotan lang
ang mga nagkulang

sa tinood lang
kapoy ug pamati sa mga pulong
(apil na ang sa mga pag-ampo
ayawg kasuko...)

kay diha sa tilaok nga giuhaw
tubig lang unta ang ibugtaw
sa tiyang gigutom
kan-on lang ang iayom-ayom

ang mga pulong mag-unsa man
kon layo lang gihapon ang gipuy-an
sa atong binuhatan?

sa taliwala sa usa ka katalagman.

"They are taking everything, even appliances like TV sets.
These will be traded later on for food,"
said Tecson John Lim, the Tacloban city administrator.

Sa dihang nakita natong
giapil pagkawat ang tv, ang refrigeratior,
ug uban pang appliances
nga dili makaon, morag nakaingon
ta nga
sila ang mga kawatan

mga kawatan sa katalagman

sa unang panglantaw
madawat ang kawat kon kini
kutob lamang sa binotelyang tubig,
bugas, de latang sardinas,
pansit, bulad, ug uban
pang makahupay sa kagutom

ang wala nato makita sa ekwasyon
mao nga kadtong dili makaon
mahimo diayng makaon puhon

wala lang kaayo nato kini makita
kay basin ug nabutaan ang atong
mga mata
sa moralidad nga nag-atubang
sa TV

samtang nanihapon kita
kuyog sa atong pamilya
ug didto sa talad kan-anan
wa gani nato mahurot ang
lamiang hamonada
tupad sa usa ka bandihadong
kan-on nga nag-aso sa
kahumot
lapos sa atong atop.

wa na gani matandog ang
bugnaw nga fruit salad
kay nawad-an man lagi kaha
kitag gana nga nagsud-ong
sa mga "kawatan" diha
sa taliwala sa usa ka
katalagman.

MGA PANGUTANA



matudloan pa kaha
nato ang mga iring
kon unsay kasakit
sa mga bagtok?

matudloan pa ba
usab nato ang mga
iro kon unsa ang
mga kasakit sa
iring?

kon matudloan
unsa kaha ang mga
pamaagi?
ug kon anaa ang
mga pamaagi
kanus-a pa kaha?

padayon ang panaw paingon sa laing hudyaka.

padayon ang panaw paingon sa laing hudyaka.

"sana, tigilan na nila ang pagpost ng mga pictures ng mga namatay...
para kasing nasasalaula na ang mga bangkay..." (komentaryo sa usa ka magsusulat sa Facebook)

padayon lang gyod daw
ang salu-salo ug kanta-kanta
ug sayaw-sayaw sa imong adlawan
kay kuno ang mga
patay, patay na,
ug silang tanan
ipanglubong na
sa atong mga hunahuna

kita kunong mga nahibilin
utangan sa kalipay, sa katawa, sa sayaw
padayon ang
panaw paingon sa laing
hudyaka.

ang ksubo kuno
usa lamang ka lat-ang
sa usa ka hagdang
napiangan

ugma, ato gayod kuno kining
dali-dalion
sa paghulip
aron kadtong dili makabantay
dili sab
mangahulog ug
matikay-ang

mangita sab ug duyog.


kon kamao pa lang
unta akong mokuskos ug
gitara

bisan kadyot lang
akong pakantahon ang mga
kwerdas
sa pinakasubo nga
kutingkuting

ihalad ko kini sa mga
nahibiling tunob
ni yolanda

aron kon imo kining madungog
mohalad ka usab
ug pipila ka
luha

ang subo nga awit
diha sa iyang kamingaw
sama kanimo
mangita sab ug
duyog

kabahin ni Pidot nga para gasto lang...

naay ubang
kinabuhi nga para gasto lang

si Pidot pananglitan
walay pulos kay walay nakamaohan
kon paeskwelahon
mamayabas
kon padarohon
mamotong
madaro man og malapis
ang tanan
bug-at gayod alang
kaniya

pagkahuman nimog
lung-ag, prito sa isdang
palotpot
atua si Pidot
hapit na mag-abot ang
tuhod ug
suwang
nagbudlat ang mata
sa kakusog mokaon

bug-at siya
apan saon taman
igsoon man siya
ug maoy tugon sa imong
nanay
disir siya namatay

"ikaw na bahala kang
Pidot
kay para gasto lang
gayod kini siya"

sa laing bahin
ikaw ang magbuot
sa upat ka ektarya
nga basakan
ug unom ka ektarya
nga kalubian

wa pay labot ang
lapad nga punong
diin ang mga
bangus kanunayng
nag-ung-ong.

walay kapaingnan

mga hunahuna
nga mora'g mga kabayo 
nagdagan kusog kaayo 
sa dakong bukid
paingon sa pangpang dayon

nangahulog 
nagbilin og 
mga abog

11/11/2013

BALAK ALANG SA MGA KAWATAN



pagkahuman sa dakong bagyo
gipalid ang balay ni Pido
apil ang iyang duha ka anak nga
mga batang babaye
ug ang lola niini nga wala kabantay
sa paspas nga pagsaka sa tubig
daplin sa baybayon
ang iyang asawa
hangtod karon wa
pa igdungog kon naunsa
ug asa na kini
gipadpad sa iyang
kapalaran

dili lang siya ang nahitaboan sa ingon
pipila ka nila didtong dapita
parepareho ug kapalaran
nawad-an, namatyan, nag-iyak,
nangita, naghandom,
nanglagom ang mga mata
wala klarong katulog
ug walay klarong kaon

ang sunod nimong nadunggan
mao nga

dungan silag pangawat ug pan,
mga sapot, mga sapatos,
ug uban pa
sa usa ka tindahan
nga gibiyaan

nahimo kining estoryahan
sa mga nakakita niini sa telebesyon
ug nakadungog niining mga
taho sa
karadyohan

dunay miingon ang kawat bisan unsa
ug bisag asa ug bisan kanus-a
kawat gayod kana gihapon

magamay mang o madako
ang sala sala gayod sa mata sa
Dios ug sa mata sa tawo

kinahanglang dakpon ug ipabilanngo
aron silotan kay wala na silay
pagtahod sa kabtangan sa uban

kinsa ba ang imong ipabilanggo?

dili baya sila

ang imong gipabilanggo mao ang
mga tiyan nga gakutoy
ang mga tiil nga walay sapatos
ang mga lawas nga gitugnaw kay walay sapot

kon ipabilanggo mo sila
mausob pa ba ang katilingban nga gatinga sa dinagkong kawat sa uban?
magmalinawon ba kini?
mosamot ba kalig-on ang mga kamot sa balaod?
unsa man?

ah, kon mamati ka sa pinitik sa ilang kasingkasing
wala kay mabati
ug kon ipabilanggo mo sila wala usab kay
makuha gikan kanila

wala ba nimo ayohag tan-aw?

hagbay ra silang patay.

mga mensahe sa mga dahong nangatagak



Okey la kami ngadi pero usa ha amon an nagsarifisyo.
waray na be kua Junior na aro kami hin buhig ha enyo.
Kay waray na namon yana balay na gin uukyan.
naasa kami nga bubuligan neo kami...

Patay si Uncle Virgillo at Auntie Guada sa tidal wave, sara ang bahay. Ipapa mass burial sila

Patay na si Mommy at Daddy. Pakisabi sa lahat. Walang signal dito at kuryente.

Okay rako diri. Daghan kaayo patay. PArents ni Aaron patay na. Wala pako balita sa ato. Mouli ko dayun kung ok na ang kalsada.

I would like to inform my son Engineer Hermogenes Regis III na huwag mabahala sa amin iyong tatay, nanay at ate ay sa awa ng Diyos buhay at ligtas sa kahamakan

This is to let you know that we luckily survived Typhoon Yolanda.
Our house in Palo Villas was totally damaged.
We need your help. We thank God he saved us.

Don't worry we're all safe, except the wrecked house. Ging-Ging and Son was found dead. Please inform Mana, mano, Ed and Madayday.

Sina Marcos Fabi, Leds Fabi, Wenly Fabi, jairus Fabi, Genis Fabi, Rubelyn Fabi, Sandra Fabi, Jay, Ram, at Ramil, Francis Mendiola ay nakaligtas sa Bagyong Yolanda dito sa Leyte. Ikunalulungkot namin ipaalam kay Mana Corazon Fabi na sina Vito 'Butsoy' Mendiola ay patay na, si BJ Mendiola ay missing pa hanggang ngayon, Marcelo Mendiola ay patay na rin.

Salamat po.

unsaon ba paghikalimot si yolanda?



kadyot lang, gi-TKO ni
Donaire ang kontra
samtang si Ariela
mirampa ug hapit
makuha ang korona.

facebook kanunay
balak ginagmay

sa gabii karinyo
sa adlaw trabaho.

desire desire what have you done to me?

desire
desire what have you done to me?

nanipis ang akong sampot
mihapdos ang gasinaw kong panit

ang gikubalan kong mga pagbati
nangalangkat

desire desire
oft repeated, oft done, makes you feel
numb

makes you feel too small
loose,

makes you senseless, timid, dry,
like a stone stripped of its moss

mibaga ang akaong nawong
ug nabasa ang akong mga aping
ug ang akong mga luha mikaging

sometimes even watching it
after having done it

wala na gyoy effect.

"Tug-an ka nakong Lord"

ang mata sa bagyong
umaabot
akong gilantaw

morag mibahad
"ikaw na ang sunod"

mitutok kog balos
ug morag batang mitubag

"Tug-an ka nakong
Lord"

dedma

inig abot sa bagyo
alang niadtong mga walay
lig-on nga mga balay
sama nimo

intawon, mao kini ang
buhaton

miluko
mihawid sa duha
ka dalunggan

dedma.

sa usa ka nagpasiaw

kon ikaw kaha ang
napalid, ug nawagtang
kuyog ni
Yolanda paingon sa
Vietnam

dili na kana matawag
nga pasiaw

11/09/2013

alang sa keyboard sa computer

sahay
u get empathic
wid d keys

u stop pressing
d letters

sahay gusto nimo
rest

rest lang
gilantaw ang keys
nga hagbay

ra untang mosupak
nimo

apan hangtod
karon
walay guts.

11/08/2013

ang hangal

kong taas ra kaayong pader
sa imong balay
makapangutana ta
ug asa ba ang ganghaan
sa mga piniriso

kong aduna pa gayoy
taas kaayong tore
adunay himasa nga
makapangutana kon
si rapunzel buhi pa kaha?

gitago mo ang mga buwak
ang mga alibangbanga ug
ang mga aninipot
diha sa usa ka lugar nga
giayo mog himong
alimuot

hangtod kanus-a
pa ba makasulod ang
adlaw sa imong pensa?

ugma ang mga bakukang
managhan
ug ang mga wati manaka
sa imong hagdanan

tigomon sa mga aninipot ang
ilang mga kalayo aron daddaban
ang imong
pagkahangal

ang kinabuhi ni alfabeto

1. nasayangan ko ni L, M, N, O ug P kamao man untang mosulat
apan tapolan lang gyod.

2. tams up ko ni Q, R, S, ug T, di kamaong mosulat apan misulat
gyod. Morag mga piang nga gustong modagan, mga amang nga naningkamot
mokantag Bakit Ngayon Ka Lang,

3. kabahin ni U, ug V, kainggit, siging ps ps sa luyo sa dakong kahoy sa mangga
morag mga pawikan nga way ukang ukang,

4. ug kang X, Y, ug Z, ok lang, anaa kanunayng nagtakoban sa dili ilang mga ngalan ug mga avatar, gikula ang ilang mga kalag sa facebook,

5. balikan ta si A, B, ug C kaon sa kusina ang giatiman, mora bag ang kalibotan mahutdan na ug kan-on ug sud-an,

6. si D og E, plano ng magpakasal sa juez, kay dako na ang tiyan ni E,

7. silang F, G, H, I, J, og K, naningkamot nga makahuman sa law, kay hangtod karon
wa pa gihapoy mga trabaho. Puros sila licensed nurses.

WALAY LINGAW



nanudlay ra ko

nag-ilis ug karsones

nanaghoy gamay

wa koy lakaw

MISTER SWABE



Bahalag mabyaan ang kolon ang sugnod
ug bugas ug posporo ug tubig ilimnon

bahalag malimtan ang bulad, ang
nodols, og de latang sardinas

di lang gyod ang sudlay,
pomada ug pahumot

ang di niya ganahan nga mahitabo
sa iyang kinabuhi

kanang mabugkag ang iyang
humot nga pinahapay.

ANG WALI NI PADRE SA SAYONG BUNTAG



lahi na ang panahon karon
maoy unang bungat ni padre

ang bagyo, normal
abnormal, kon walay bagyo

abnormal ang kalinaw
normal ang kagubot

kita sab kon moreak, abnormal,
sa abnormal nga panghitabo

busa, bay, ayawg kabalaka
normal pa diay gihapon ta.

panagduyog


maayong pagkahulma ang
akong mga tiil diha sa balas sa baybayon

ang imo sang mga kuko nagbilin
ug pulo ka kawras sa akong likod

manggiulawon ang atong mga dila
walay gibilin nga timailhan sa atong mga ngabil

pagbati


mas ganahan ko anang
walay hapnig

mas lami ang walay
putos

ang walay hikot
ang walay pugong

walay makalupig sa
natural lang nga kalipay

ang tanang mabati
mabati gayod

romansa brutal


gipatong ko ang akong mga kamot
sa imong abaga

ang akong sampot sa imong duha
ka paa

ang akong dila sa imong baba
ug uban pa, ug uban pa.....

pagbuntog sa kahilom

ikaw lang ang nahadlok sa
kahilom gawas sa samin nga bintana

ingon ana baya ang mga kahoy  ug
mga buwak kon magpakahilom

walay lihok. Kon imong tan-aw
gihulga ka, panirado sa imong

bintana. Lakaw sulod sa pultahan
sa imong kasingkasing. Paminawa.

Mao ra ba gihapon ang tingog
sa kahilom? Kon gihulga ka

gihapon niini, duol ngari kanako
atong buntogon ang kahilom.

alang sa nakamenos natong duha

atong order
usa ka yahong nga lumi
upat ka pan de
leche
ug duha ka gagmayng
botelya
sa coke

kitang duha lang
sa kilid sa Chin Lam
hilom nga
naghupay sa kauhaw ug
kagutom

miabot ang upat ka
sabaan nangutana kon
nagsweldo na ba ta


ngano man diay unta?

nanudlay ra
ko

nag-ilis ug
karsones

nanaghoy
gamay

wa koy
lakaw

11/07/2013

kita usahay simang, kita usahay gustong matulog lamang

gihungihong ang imong pag-abot
gikan pa gahapon

gipasabot nila nga dili ka basta-basta
sa kakusog, sa kabangis,

gidungog nga kon malabyan nimo
ang balay, ang kabaw, ang kabayo,
ang sakayan, apil na ang mga kaldero
og mga punoan sa lubi
imo gyod ko nong dalhon
walay pasayloon

ang mga mananagna nag-ampo nga
kini matinood
kay ug dili
maulawan silang tanan

kami nga mahadlokon nag-ampo
nga unta dili modayon nga unta mosimang
paingon sa laing dalan

ang mga bata nga walay kalibotan kon
unsa ang mahitabo
nangatulog.

kita usahay simang, kita usahay gustong
matulog lamang


gana gana basta lang

gikan sa tumoy sa imong buhok
hangtod na sa tumoy sa imong pilok
hangtod na sa tumoy sa imong mga kuyamoy
sa imong kuko hangtod na sa matag
tumoy sa imong balahibo
ganahan ko nimo.

pangutan-a kog ngano.
ambot, wa ko kabalo.

Dili sayon ang pagmahal. Obligasyon sab kini.

dunay gipakatawong bogo
sakit. ang eskwelahan morag
ihawanan ug mga baboy,
pait. ang mga libro morag
gabukal nga tubig. Hapdos
gyos sa mata. walay ganahan
sa iyang kasipat. Ginganlag
maldito. Likayi, likayi.
ang mga anak kanunayng
nagpahimangno sa ilang mga
anak. Ayaw awata.

bogoy. Gwapo unta kaniadto.
apan sa kabogoy, daghang
ulat ang nawong ang kamot
ug ang mga tiil.
bisag unsang negosyo,
palpak. ambot ug unsa kahay
kapalaran ani niya.

dili angay patulan. Dili angay
pauyonan. Ang inahan inahan
gayod, sa paglaban.

Kon dili nako ni mahalon,
kinsa pa may magmahal kaniya?

maoy iyang pangutana kanako
ako, nga iyang igsoon.

hapit ko malumos. Makalumos
sad diay ning kaulaw sa atong
kaugalingon.

Mitamark ko. Sakto baya pod
siya. Dili sayon ang pagmahal.
Dili kini pilipilian, ug ihatag lamang
sa mga angayan, sa barogan,
sa utokan, sa kugihan, ug sa mga
boutan.


Obligasyon  kini.


11/05/2013

ang gianod, ug ang galutaw

didto sa suba nakita nato ang duha ka patayng kahoy nga
gianod

naglagyo ta sama kanila
nagpakahilom ta sama kanila

nindot ang duha ka kahoy nga patay
nga gianod sa sulog sa suba
diha sa lubog nga tubig

pareho ang ilang padulngan
paingon sa dagat ang ilang kapaingnan


mao kini ang atong kalainan
wala kita gianod sa tubig apan naglutaw kita sa hangin

ako ang itom nga uwak paingon sa bungtod
ikaw ang puti nga  tulabong paingon sa dagat

nakapangutana ko, nganong karon man lang nato
nasakpan ang maong tanghaga?

nakapanghupaw ko, nganong kaniadto wala ka
man nagsaba?

pipila ba ka tuig nga kitang duha nagpaaron-aron?

ako ang hangin ug ikaw ang akong dagat
ako ang imong adlaw ug ikaw ang buwak

dili pa man seguro ulahi ang tanan
iuli ko ang imong sapatos, ambi ang akong tsinelas

daghang salamat.

ug siya, ug siya lang gayod ang gitumbok nga sad-an

kon magsulat ka
hunahunaa nga adunay mobasa niini

wa ka lang masayod
adunay mibasa nga atoa nagtindog
sa ikawalong balay
himabaw sa usa ka habog nga
bungtod

nagtinood kinig sabot sa imong
gisulat
nga nakapatandog kaniya
ug pagkahuman niini
tungod sa pagbati nga imong
gipamulong diha sa napulo mo
ka mga linya

gibuhat niya ang gikalisangan
sa katilingban

miambak kini
sa taas niyang nahimutangan
nag-una ang ulo
nga maayong pagkabuak
diha sa
nagpasad nga mga
bato

wala kini manamilit kanimo
kay dili kamo kaila

misyagit ang mga tawong
nakakita
nalisang sa kadaghan
sa dugo nga miagas
gikan sa iyang buak
nga agtang

nakapanghesus
nakapangsantissima inahan
silang tanan

ug siya, ug siya lang gayod
ang gitumbok nga sad-an

makasasala (alang kang F. nga nangyam-id sa gugma)

gisulayan ko ug lanaw ang akong
kagahapon ug gipangutana ko kini
kon unsa  ba gayod ang akong gibuhat
sa gugma?

usa lang ako ka tigpamati nga
naglingkod sa kilid sa usa ka
abli nga pultahan

ang uban miadto na dapit sa dapogan
ug napaslot sa mga baga

wa makat-on misaka ug milingkod
sa tulo ka bato diin kusog ang kalayo
nasunog

apan bisag napaslot ug nasunog o
di ba namatay
didto sa ilang lungon gipakita ang
usa ka pahiyom
nga nagtug-an nga kuno sila
namatay nga malipayon

ako, kon nagtinood pa unta,
mas labaw pa ang akong mabuhat
kay sa pagpapaslot, pagpasunog
og pagkamatay

labaw pa sa pahiyom nga malipayon
ang akong ipakita sa akong nawong

kon mitoo pa ako nila, mas labaw pa
unta ang akong testimonya kabahin
sa gugma
sa gugmang labaw pa sa tinood

kay sa akong tan-aw ug pagtoo
ang gugma man god usa ka balaan
ug ang pagkabalaan mao man
ang pagkabathala

ug ang pagkabathala labaw sa tanan
makamao man kining mobalik gikan
sa lubnganan sa mga patay ug dayon
sa ikatulo ka adlaw mabanhaw

sa akong pagtoo, mabuhat ko usab
kini
kay ako, kon sa gugma na misunod,
usa man gayod unta ka bathala
alang sa nahigugma usab kanako

apan unsa ba ang akong gibuhat
sa gugma? ako kining gipatay
kanapulo ko kining gibangkaw
kanapulo ko kining gilansang
sa iyang krus

abi mo ug ako usa ka hilomon nga
tawo nga karon naglingkod sa kilid
sa pultahan ug usa ka tigpamati lamang?

dili kana tinood, wala ka lang gayod
masayod. wala na bisag usa ka gugma
ang mabuhi pa sa akong kasingkasing.

dili ako gugma. Dili ako bathala.
Tawo lamang ako. Makasasala.

kabahin ni Pretpret

kining among iro nga si pretpret
kanunayng nagasunod kanako
bisan asa ko, anaa nag-atong

ako ang iyang ginoo
usahay makaingon ko

kon makasulti pa lang ang Ginoo
seguro makaingon nga unta

diha kaniya, ako unta usab si Pretpret
ako unta usab makalipay kaniya.

bahin kanato nga nahisama sa dakong punoan sa balite

ang dakong punoan sa balite
misamot ug kalabong

ang iyang mga dahon morag
gagmayng mga kamot sa bata

usahay sa akong kasub-anan
ang katawa sa puya akong madunggan

nga morag gihadla sa hangin
nanungog sa atong kabahin

11/04/2013

KABAHIN SA LAIN-LAING LAWAK



sa daklawak maigo tang tanan
makasulod ang tanan kay dili kini lawak-disidisan
o lawak higdaanan

unya manayaw ta humag pangaon
tsikahan sab
sa lawak imananan

kon ikaw ugaling ug unya kaihion adto lang sa lawak pahiyusan
basin ug matagboan mo pa ang sikat nga maniniyot gikan sa

lawak e-tsikahan nga sagad
atong bisitahan

kadtong wala kaayo makasinati niya

ang iyang tibook
gihimong sinsilyo

ang panahon
gihimo niyang

mga dahon
siging pangahulog

ang iyang kamot
gihimong mga

kumingking ang
iyang kasingkasing

karon mga lubnganan
sa mga walay ngalan.

ALANG SA IYANG ASAWA NGA MILAYAS SA ILAHA

wala niya ipha ang mga katuigan sa
kaminyoon
diha sa pipila ka mga lamba sa
pultahan

walay bisag usa ka plato nga milupad
gikan sa kusina paingon sa sala
wala say kape nga gihuwad diha
sa lamesa

ang iyang giihap mao ang dili maihap
nga mga halok
ang pila ka hugnaan nga paghapnig
sa mga habol ug pag-ilis sa mga
ponda sa alugnan

ang mga bag-ong putahe sa sud-an
ang kahumot sa bag-ong haon nga kan-on
diha sa imong porselana nga plato
ang kahalang sa kinilaw nga malasugi
diha sa imong platito
ang kainit sa tinolang pulag-ikog
diha sud sa imong yahong

ang mga pahiyom  nga hangtod karon
wala  gihapon molagom sa pipila ka dag-om

(karon nga anaa ka sa pagpanglood
ug dakong kasubo sagol sa dili nimo
mapugngang kasuko
gisulat ko kini balaka alang kanako.)

dugang sa maldisyon

 i

kadtong mga
matahom nga dili
nimo
maangkon

mangahimong
maot

kalit lang silang
tanan
nga miyam-id nimo
mangalaksot

ii

kon ako ang imong
hikapon
mahimo kong tawo

kon ikaw ang akong
mahikapan
mahimo kang
estatwa nga bulawan

iii

kon ako kang biyaan
maangkon ko ang kagawasan

kon ikaw ang mobiya kanako
mahimo kang lubnganan


iv

kon maghimo kog daghang
mga saad

makahimo kang usa ka banga
nga lana gikan sa

upat ka bukag nga mga potot
sa lubing balikog

v

kon manambid ka man lamang
nga mosulod sa akong lawak

manglupad ang mga uwak
ug mawad-ag gahom ang mga habak

maldisyon

kastong mga
matahom nga dili
nimo
maangkon

mangahimong
maot

kalit lang silang
tanan
nga miyam-id nimo
mangalaksot

balak sa mga pasalamat

ning kusog nga ulan sa Lunes

ako, ang piso,
sa usa ka inaan,
nga di katilaw ug
katugnaw
kay ang ulan dili
gayod makabasa
kanako

salamat balay
salamat bintanang nanirado
salamat hagdanan nga taas

ug dili sab ako magmingaw
kanimo

salamat iro sa akong tiilan
salamat sa wifi nga kusog ang signal
salamat sa mga balak
nga namumpong ug nagkutaykutay
salamat init nga kape
salamat piniritong sab-a
salamat antipara
salamat lingkoranan
salamat tsinelas

ug dili ko na usab ako mangitag
tabi ug libak sa talad kan-anan

salamat pag-inosara
salamat kalinaw
salamat kagawasan
salamat kalipay

ug kamong tanan ako na gayod nga biyaan

salamat kuting sa lingkoranan
salamat tuko sa bongbong
salamat mga lamok
salamat garapata
salamat sa mga buak nga bildo sa platito
salamat sa mga platong imong gihugasan

adios
adios

ayaw kabalaka
mobalhin lang kog lingkoranan

ang dili ganahan makigkita nimo

ang akong pangutana
gitubag mog usa ka pangutana

"asa ka diay karon?" nangutana ang kabalaka
"nganon man diay?" mitubag ang gaduda.

"nia mi karon sa SM, puede ka kasalikyat?' misulay ug hangyo
"importante ba gyod na?" misulay sag balibad.

"duna man goy gitugon si Papa nimo?" morag sekreto
" unsa man diay? " walay panahon, maoy iyang punto.

gisulayan lang

nakita ko ang pagkalaglag
sa tore nga garing

gasunod lamang ako sa
litaniya sa panahon

pagkasulondon sa tig-a
nga linog

gasunod lamang siya sa
usa ka sugo nga dili niya mabali

gisulayan lang niya ang kampana
nga iyang gipahalok sa yuta

kon kini kamao pa ba gihapong
moawit pagkahumad sa pagkamumo

ang balak ni Lolo Doning

para sa mga anak nga wala
mitungha
ug sa mga apo nga wala kadungog
para sa mga masamong
nga nagpakabutabungol
daghang salamat
karon wala na ako'y gikawilihan
tungod kaninyo
naangkon ko na ang kagawasan
sa usa ka tigulang

11/03/2013

tuyom sa mabaw nga tubig

akong hangyo
kanimo sa dihang
galakaw tang duha
sa daplin sa baybayon
nga unta mas lalom
kita sa pagsabot
sa kalalom sa dagat

sayod ko nga lisod
kining himoon
apan gusto mo
ba nga  samdan ka
sa nga tunok sa
tuyom diha sa
ibabaw sa tin-aw
nga tubig?

para nimo ni

sa imong tigmo
ikaw ang motubag

kay ikaw ang
misulod
kamao ka sang
mogawas

ikaw ang mokaplag
sa imong
pagkawala

sa mga ihalas
ikaw ang moanad

sa mga hukot
ikaw ang mohubad

sa imong kauhaw
pangitaa ang tubig

atua ang kalan-on
sa imong kagutom

wala ako'y katarungan
nganong di ka nako saligan.

sa usa ka piknik

ihan-ay na ang mga dalhonon
paingon kita sa baybayon, ang pala

ang bara, ang sundang, ang bukag,
ang kaldero ug bugas,

ang salbabida, ang bulad, ang tukog
nga silhig, ang sugnod, ug ang
posporo

magpalagaylay ta
isugba ang bulad, lung-aga ang
bugas, panguha ug botong,
panilhig sa kamalig, itaod ang
duyan, inig abot sa kangitngit
pagdaob,

sa silong sa langit, sa ibabaw
ang bulan
sa atong tunga ang dakong
kalayo
ug kitang tanan mag-inom
og manayaw

unya kon mahubog na kamo
ug kapoyon ug mangita na
sa katulogon

mosibat ko kadyot, dala ang
pala ug ang bara
magkutkot kog lalom nga
buho
kay didto iyagyag ko ang
mga tipaka sa akong kagahapon
ug ang tanan
ako kining ipanglubong.


ang gidalang katarongan

kon pinaagi sa
pagkutlo sa maong bulak

gipatay ko kini aduna akoy
gidalang katarungan

king patay mong gugma
kanako unta mabanhaw

paghinumdom kang lola pacita

hagbay rang patay
na si lola Pacita

kadtong miduaw
ko sa iyang lubnganan

gibantayan ko gihapon
ang akong gipamulong

ang akong gipangbuhat
morag madungog ko gihapon

ang iyang kahait: diha sa imong
tunob

mailhan ko kon kinsa
ikaw.

DUHA KA BERSYON

 ANG UNANG BERSYON SA  KALIMOT

walay nagsugo
kanako sa pagsulat
og balak

wala say nagsugo kanimo
sa pagbasa niini

wala nato kini matuyo
nahitabo lang


ANG LAING BERSYON NGA TINOOD

dili morag buslot sa
bukag ang
atong kaulag
busa palihog ayaw
basola ang
gahom sa kalimot

pamati zarathustra

zarathustra
sakit ang akong
abaga

masahii na

zarathustra
kay wa pa man kita

nila pamatya
despwes
pamatia!

ang mangingilad ug ang dakong kabaw

sa tumoy sa pisi sa imong
pagpakaron-ingnon
imong gitaral ang dakong
kabaw
nga unta sungayan man

nagpaguyod
intawon bahalag ihawon
puhon

matilapan lang ang mong
asgad nga
aping.

awit sa tamsi

ang mga pirok-pirok
malupigan gayod sa mga
tamsi

dili sa kaabtik ug
kasirok

ah, masayran mo kini
diha sa kasubo

sa ilang awit
sa kabuntagon
lisod ang
pagpalayo

ikaw lang usa
ang
manambal sa
imong samad

ikaw ang
kanunay diha
sa kahilom

human sa
pipila ka adlaw

mobalik ka
sa imong
gipoy-an


sagdi lang
sagdi lang

molabay ra
ang tanan

magtambid
man god ang
kasakit ug
kalipay

pagkahuman
niini
anaa ang samin

mas nindot
ka nang
lantawon karon
kaysa
kagahapon

11/02/2013

PAGTANOM UG PAGPASILONG



gitanom ko
ang kadasig
diha sa usa
ka pulong

sa abonong
kasingkasing

mitubo kini
nananga
nanahon
milabong
ug nahimong
usa ka dakong
kahoy

kon mamunga
kini
maayo
kon dili man
ugaling
maayo lang
gihapon

wala koy
gidahom pang
lain

gawas lamang
nga ako
makapasilong

ug dinhi sa pulong
nga nahimong kahoy
kita magsulat
magbasa

pistahan ta ang
atong mga kahilom
ug yak-an ta
ang atong mga
katawa.

ning sayong kabuntagon


balik-balikon kog piyong ang
akong mga mata

bisan sa kataas sa mga oras
antoson ko kini sa makadaghan

hangtod nga wala na ako'y makita
diha sa itom nga tilon

nindot pamation ang tingog
sa mga piso nga gitawag sa inaan
humot ang inaso sa kan-on nga
bag-on gihaon

sa dili ko na makita
bawion ko kini sa akong madungog
ug masimhot
ning sayong kabuntagon

11/01/2013

dinhi sa lawak sa akong hunahuna

kon kanus-a ko nakab-ot
ang kagawasan

naunsa ba? karon ako nagpakadena
man hinoon
sa mga kamot nga
kanunayng nagsulat

dinhi sa lawak sa akong hunahuna
ako nabartolina

tinuyuan kini
diha sa  paghandom
aron unta matambalan ang
konsyensyang
samdan

aron ako maluwas
ako mismo ang mikandado
sa akong
kaugalingong prisohan

ang kinaiyahan

dili maglisod ang tubig nga
mayabo sa iyang sudlanan
kon kini matikay-ang

ang ulan kon moagas gikan
sa langit
wala may unsa pang
gibuhat

ang mga dahon nga mangahulog
gikan sa sanga
ang hangin nga mipalid niini
paingon sa dagat
wa say gibuhat

lantawa ang kinaiyahan
wala nato tudloi ang kasingkasing
nga mahigugma
walay nagtudlo sa iring kon unsaon
niya pagpanabdos ug
pagpanganak

miabot lang ang kinaiyahan ug
nahitabo ang tanan sa tumang
kasayon

unta mahisama kita sa kinaiyahan
wa kitay buhaton
ang tanan anaa lang sa tumang
kasayon
wa nato hunahunaa
wa nato damha
diay, nahitabo na.

sa mga lubnganan

wala na ang
mga puting alibangbang
patay na usab ang mga
pulang buwak nga
nag-alirong
ning mga lubnganan
sa akong
gihigugma ug gikamingawan

matag kilid
ang atubangan ug ang
mga tiilan

pulos na man
mga batong
gilumutan.

ang pag-una ug dagkot sa mga patay

gauna kog
dagkot sa akong
tulo ka kandila
alang kang tatay
nanay og
lolo,

gibutang ko ang
buwak sa kilid sa
ilang mga
lapida

maglibog kog
unsay buhaton kon
matagboan ko ang
mga buhi
nga hagbay ko rang
gipatay
sa akong
panumduman

karong mga orasaha
nahikatulog pa sila
sa ilang
kahubog
ug kalaog
kagabii.

10/31/2013

ANG ITOY NGA NAHINANGOP SA IMONG PAG-ABOT

gahalhal ang dila sa itoy nga nagpaabot kanimo
diha sa kilid sa labat nga kawayan  sa imong balay nga bungalow

sa kiwil sa iyang ikog ( kay wala na man kini inahan nga gihimong sumsuman
sa mga palahubog sa itago tang ngalang barangay dapit  sa bukana)
morag ang kamingaw niya diha kanimo daw labaw pas hilabihan

layo ka pa morag pulo pa ka dupa o kinse ba kaha
midagan kini paingon kanimo aron iya  kang hangpon sama sa usa
ka amo nga wala makauli sud usa ka semana

pagkaanindot sa maong itoy: puti ug hamis ug baga ang balahibo, 
lingin ang lawas nga morag nangka, dagko ang mga tiil nga morag palwa sa lubi,
gabitay ang duha ka dalunggan mga morag duha ka dahong laya  sa saging kadisnon
taas ang dila nga morag paypay nga dahon sa lantipay,
kusog kining miaw-aw nga morag nanghambog sa silingan nga siya na ang
pinakaswerteng itoy sa kalibotan sa mga iro

ikaw nga hubog sa imong pagkaikaw
dako ang ulo ug ang sulod gitahapan nga puros bakukang
mga kamot nga ang nakat-unan mao lamang ang paghawid sa hait nga itilikbas nga sundang
matang talinis ug tinan-awan samasusa ka bangkaw

naglibog ko, nganong diha sa usa ka nindot nga itoy nga mihangop kanimo
gibalosan mo man sa usa ka dakong sipa sa imong tiil nga morag dagkong pala

pagkalooy sa itoy, nalabay nalabay intawon gikan sa kalsada paingon sa labat nga kawayan
misyagit sa kasakit, mibahag ang kiwil nga ikog,  ug ang lingin nga lawas
maayong pagkabun-og

sakit nga pamation nga kini karon
atua sa ilalom sa dapog sa kusina
nagkurog, gigakos ang kaugalingon,
 nagtago
morag nagpalaban sa mga uga
nga sugnod
diha sa giluom nga
kahilom.