1/31/2013

Galutaw-lutaw Sa Hangin


Aduna bay balak
Nga galutaw-lutaw
Sa hangin karon?
Buot nakong
Dakpon.

Akoy
2012.1.31

1/30/2013

thetan

nakalimtan na nato
ang gahom sa hangin
mitapot kita
ning panaad sa
mga lapok

usahay mabati nato
ang tayhop sa
gahop gikan sa
dahon
apan kalit ug kadyot
lamang kini

aduna kita'y maaninag
nga kita kanhiay usa ka
balahibo

gaan, puti, pino,
unta gipangita nato ang
gahom diin kita
nahitusok kaniadto
sa wala
pa ang mga katuigan

Bathala lang gihapon

kon ihatag kuno
pagkabulahan ko

kon di kuno ihatag
mas bulahan kuno ko

ang tanan
gimbut-an ni Bathala

makahiubos
hunahunaon

makalagog
wala koy labot

bisag gubot na kos
lukot
nakit-an pang
akong lubot

unsaon ba paghikalimot
sa gipasapasang
bunot?

kapalpakan

singkwentay dos
ka mingagi

duha ka kagiw
upat ka
kaga

pagkahuman kog
ihap

daghan kaayo
ang wala

ang walwal
ang
supalpal

1/28/2013

sa dihang nahimo ka usab nga yawa

ushay dha s
pghikalimt mo
kn uns k g ds-a
k gkan

moingn k
nga ikw an
Gnoo

ug sa wlay ktaha
giayo mg
ksaba ang
buang nga bbaye
nga nngahoy sa
imng klubian

gbitbit sa usa ka
dkong bgkos sa
mga ugang palwa
sa lbi sa panahon
sa usa ka dkong
hlaw
imo siyng
giyawayawa

ug dhang hgayona
milbtik ang imng ikog
nga bangkw
diha sa imng baba
nga kaban
nga ang dila
usa ka
hait kaayo nga
pnyal




balak alang sa akong labaw

kalkag ang buhok
uga ang laway
liki ang wait
tangkag ang dunggan
morag kadaghan
sa graba ang
kugmo sa imong
ilon nga palwa


daghang muta ang
mga mata
opaw
yakmo
pangag
bahong pan-os
asgad
daghang kiki
baga ang kagid

alkitrang
kapalaran
mao kana
 ikaw


ako kini:
hamis ang panit
taas ang ilong
humot ang aping
puti ang ngipon
linaw ang mga mata
morag birhen nga
sapa
bawod ang pilok
tam-is ang pahiyom
taas ug barog
mestisong tisoy

katahaan
bantogan
giampingan sa
katilingban
bulawanon ang
mga
panan-aw

ako ang tanang
pagdayeg
gihakot nako ang
tanang kadaogan
giulanan sa kwarta
gibagyohan sa
kasikat
nakab-ot ang
langit
nabasnig ang
mga bitoon



ug ngano man kini?

kay ako ang
tagsulat
busa ako ang
kurat
himoon kog
tinood ang mga bakak

ug ang mga bakak
mahimo ko usab nga
mga tinood

bisag unsaon
kayakayahon

gawasnon ang hunahuna
gamhanan ang mga kamot
sa papel nga imo
usab nga makumot

apan usahay inig tikyop
na sa kahayag
inig ngulngol na sa piang
inig ngutngot na
sa panuhot
mawa ang akong
gahom
ug ako mahimong
walay pulos

moluhod ako ug
moampo ako sa
labawng tinood
sa usa ka Matood
nga maoy usay
tigsulat kanako

balak sa akong asawa

alas 3 sa kaadlawon:

unya na
unya na
unya na lagi

alas 5 sa buntag

unya na
unya na
unya na lagi
tangtanga

ipasok pa ang
gahi ug
tambok ug
taas mo
nga balak
diri sa
sabakan sa akong
kauhaw
ug kamingaw

alas 7 sa buntag

wala koy kape
wala koy pandesal
naintonsis ang
akong pamahaw

de-stresser

sud sa
CR
gikan sa
pagsugod ug
ung-ong
sa imong dako
ug taas nga
tubol
hangtod sa
pagawas niini
ug pagkahulog
didto
sa puti nga
bowl
pamatia pag-ayo
ang imong
hagkot nga
ohhhhhh ug
ahhhhhhhhh.

upat lima upat

hala sunod kamo
sa sulog sa akong
unos

kasing kasing nga
buslot
palad nga
morag mapa
sa hapon nga
wiriswiris ang
direksyon

hala sunod pa
kamo
sa sayop ko nga
ihap

upat lima upat
duha tulo duha
usa ka lakang
duha ka
atras

gisi nga sampot
abagang 
gukdunon sa
plantsa
balikog nga
tiil
luy-ang
mga tudlo
karsadang
lapalapa

hala sunod kamo
kanako
paingon kita
sa usa ka dakong
perdisyon
sulngon nato
ang dakong
panon sa
kapakyasan
mikigsandurot kita
sa mga
pildihonon
makigsalo kita
sa mga
walay mga kamot
ug bukton
makiglantugi kita
sa mga
nangaamang
atong tabangan ug
lantaw ang mga
nangabuta

upat lima upat
duha tulo duha
paingon sa panaghiusa
diha
sa dukot nga
wala.


kapitan sa barko

ayaw kahadluki
ang salimuang

dayga kanunay
ang imong mga
pagbati

sakay sakay
sa balod sa gugma

kon malunod
langoy sab
panalagsa

kon malukapa
ayaw palupig
bangon

tunla ang kahiubos
usapa ang
giingon nilang
kaulaw

lig-una ang
ang imong mga
timon
kay ikaw ang
imong
sakayan

ikaw gihapon ang
gibantog nga
kapitan
ug silang tanan
mao lamang ang
mga pasaherong
tabian

[nga pwede nimong
ibalibag
ug ilawog sa
dakong
baba sa
halab nga
unos

inig-abot sa
dakong
bagyo]

kataposang hunat sa usa ka bato diha sa habog nga pangpang

ning sayong kabuntagon
pagkamalinawon sa
panahon

walay kisaw ang mga
dahon kay
wala man say kisaw
ang hangin

morag mga
istatuwa ang mga
kahoy
nga naglinya
sa mga
karsadang
patay

madungog nako
ang mga tunob
sa kanding
ang mga kanaas sa
mga pako
sa salampati sa ibabaw
sa atop
nga nipa sa among
balay

nanudya na usab ang
mga kalag
sa akong mga kaliwat

"asa na ang imong mga liwat?
asa na? asa na?
ngano ba nga hangtod karon
nagpabilin kang
usa lamang ka pantalan?"

ngano bang usa ka lamang
nga bato diha
sa kilid sa habog nga
pangpang?

unya sa akong atubangan
mibatog
ang usa ka dakong
agila: hait ang iyang tinan-awan
morag mga hanting
ni Lolo Inting
sinaw ang mga kuko
morag sundang ni
Tatay Isko

dili ko ikaw anak
dili ko ikaw apo
wala mo kami hatagi ug anak
wala mo kami hatagi ug apo

gisumbag ko ang akong dughan
giduko ko ang akong ulo
magpabilin akong bato
diha sa usa ka habog nga pangpang
dili ko mabasol
ang mga istatuwang kahoy
diha sa mga dalay nga
patay

kining akong palad
gisulat na sa papel nga langit
gitestigosan kini sa
daghan kaayong mga bitoon
gihabolan kini
sa dakong lawod sa kangitngit
mawa kini
sa panan-aw sa akong mga
kagikan
ug bisan unsa kalawom
sa kahilom
dili na gayod kini matugkad
sa usa
ka paghinumdom

balak sa sayong kabuntagon

ang mga damgo
sud sa kagabhion
nahumol
sa ispisong kangitngit
nangatikig

inig mata mo
bation mo
ang ang kangilngig
sama sa
nahikatulog nga
mantika
sa humba diha
sa kaha

imo kining initon
tanan
sa paghinumdom

hangtod nga kini
mahilis
ug imo pa gayong
padayonan
hangtod nga ang
tanan
moligti diha sa
kainit
diha sa tumang kainit
anaa ang
patag kaayo nga
kahilom

niining panahona
matubo diha sa init
kaayong mantika
ang mga balak
sa imong
kabuntagon

dili na tikig ang
kasingkasing
ug sama sa humba
ang imong
simod misinaw

pagsugod sa usa ka umaabot nga romansa

daghan kog gisaad
sa akong
kaugalingon

nahiubos na ako
sa akong
mga gibuak nga
mga pulong

samok dinhi sud
sa balay
sa akong kaugalingon
nagsumpaki
ang kalag ug
ang unod

gubot kining
pag-inosara
nagsumbagay
ang mga
dili nimo makita

ikaw nga anaa
sa akong
atbang nga
nanambid samtang
nagbasa sa
mga timailhan
sa kabuntagon
dungan sa
paghigop mo sa
imong kape
mipasiplat kanako
sa usa
ka init kaayong
pahiyom

ug medyo naulaw
ang mga
palaaway nakong
mga hinipos
ug karon
naghiusa una
sa pagbalos sa
usa ka
pahiyom
nga sama usab
kainit
sa akong dughan

mora kog
gisulsulan nga
miingon
"kana, kana
pwede na kana
siya!"

ug sa kalit
lang
nawa ang mga
dagkong balod
sa akong
dagat
mihubas ang
dakog baha
sa akong
lapad nga suba
ug ang bagyo
nahilis
sud sa dakong
lawod
sa akong
hunahuna

pamalandong sa dihang nakadungog ko sa usa ka amo nga nameste sa iyang tigtrapo sa sakyanan

unsa kaha no
kon ako
nahimo na lamang
nga usa ka
tigtrapo sa
sakyanan sa akong
amo
unya inig kabuntag
ako ang
tigdawat sa
daghang kaayong
peste ug yawa
nganong ang sakyanan
dili mokiblat sa
kasinaw
kon maabtan sa
adlaw?

kon mabali na ang
panahon
unsa pod kaha
ang akong
buhaton?

ang dahon sa mayana ug ang gamayng ulod

sa usa ka
dahon sa laya
nga mayana
mitungtong
ang
usa ka
gamayng ulod
nga gianod sa sulog
sa sapang
hubag

didto sa unahan
sa usa ka kisaw
silang tanan
nasawsaw

kaming mga kasag sud sa tayaon nga balde

sa sud sa baldeng
tayaon
didto kaming mga
kasag
gihipos
nagduot sa kaguot

ako nga
abtik
gibitad paubos
sa kasag
nga sinahan

wa ko palupig
nagsangka
ang among mga
kuyamoy

nabalian kog
tulo
nabalian sab
siyag
lima

ug kaming duha
puros
nangahulog
didto sa
kinaubsan

nagpunay
lang gihapon
ug
kinawrasan
sa among
mga kuyamoy
ug
pingki pingki
sa among
mga paak
nga habol

ang tawong baga kaayong sunglass

dunay tawong
baga kaayong sunglass
naglingkod sa
bangko
didto sa suok nga
dapit sa
airport sa
jakarta

misulay kog sugod
sa usa ka
pangutana

wala siya mitubag ug
dayog lakaw
ug lingkod sa laing
bangko
didto sa unahan

1/27/2013

ang akong kaugalingon


 Kining WakoHisabti
ania dinhi apan dili nako kaayo
matataw

bagang gabon ang iyang
Lawas
unya nagpungko sa
tunga sa patag
nga gialirungan
sa Duha ka Bungtod

wala ako'y nadunggan nga
mihagit kaniya ug
away

gidungog man god nga kinsa kadtong mihagit kaniya
sa wala pa gani kahulbot sa iyang sundang
kalit lang kining naigo sa Liti
ug nasunog

makalilisang ang aso
ug mikurog ang bungtod
mibukal ang
sapa ug naapil kamatay ang
mga isda

tungod kay lagi kini WalaManHisabti
wala gayoy makahisgot


 walay makasukod kang
WalaHisabti
ug sa iyang lawas nga
mga gabon ug panganod
ang imong makita
mao lamang ang
kalubog sa Unahan

ang kasakit nga iyang nahatag
sa Tanan
dili na maihap
daghan ang gilubong nga buhi
nahutdan ug lungon
ang balangay

ako karon ang misulay
pakigbisog kaniya
ug sa matag abot sa kangitngit
gisulayan ko ug dagkot ang gamay kong
kahayag

gigamitan ko sa mga numero
sa paninguha nga kini siya masukod
gitimbang nako
aron masuta kon aduna ba gayod kini
siya'y kabug-aton
gialsa, gibitad, gisakyan,
gihikap
aron sutaon kon aduna ba usab
kini siyay kainit

kon kini ba siya sama sa panapton
mabira ba
kon sama sa pisi mainat 
kon sama sa tartanilya
mahimo bang
masakyan paingon
sa akong kaugalingon

dugay na ang panahon
gipuy-an ko kining WaHisabti
nahikap nako
apan walay klarong porma
nabira nako apan
walay katas-on walay kalapdon
gisakyan ko apan
wala ako gihatod
wala ako'y naadtoan

akong ginganlan kining 
WakoHisabti


WalaSiyayPangilabot
Mao kana ang iyang botbot.



Ang kasilag sa kasag



ang hanap nga damlag
maoy tagsala sa iyang
kahig-waos

kainit sa adlaw
mitabon sa
tabunong balilihan,
daw kuko nga mikawras
sa akong kahiladman

buhi! buhi ! ang kasag
bisan nahilayo
sa dugnit niyang
pugaran

ni-abot sa kasadpad ,
wala panumbalinga
ang katugnaw
sa nagkalanay
nga batunaw


ang kasag ug ang iring

gusto sa iring
nga unta naa siya'y
upat ka
paak sa usa ka
kasag

ang gusto sa
kasag
nga unta
makatilaw siyag
iring

balhiboon
humok ug unod
kusog motambling
unya labaw sa
tanan

siyam ka
kinabuhi

patas

pagkahugaw sa mga
karsada sa jakarta
misuroy mi's mga suok
nga wa mo makita
itom ang tubig sa
kanal
luspad ang mga dahon
sa kahoy

gikahimuot ko kini
wa ta mag-inusara

matapos gyod ang tanan

sa kataposan kuno
ang tanan lumsan

kadtong nagpabilin
mga ok-ok nga nakalupad

ayaw'g kabalaka
silang tanan sunugon

1/21/2013

ayaw na lang tubaga

unsa kaha ang larawan sa
usa ka
sulundon?

sulundon ba ako?

manamin ko, subayon ko ang
mga kunot sa usa ka sulundon
bation ko pag-usab ang
kurog sa iyang mga kamot
ang pagkitiw sa iyang mga tudlo
ang paghambin sa pagsupak ug
pagtago niini diha sa hapin sa
pagpailob

kadtong mitaas ang imong kilay
kadtong nawingig ang imong panglantaw
kadtong nanghiwi ka
kadtong gibutang mo ang kabug-aton
sa kilid sa lamesa ug
sa wa nila damha gituyo mog wakli
ug dayon nahulog kini
ug nabuak sa salog nga semento
ug nadungog nila ang kusog
nga warak sa mga baso
ug wala kay tingog nga mibiya
samtang
nagpanawag ang mga buak
nga unta imong
hiposon

sulundon ka ba?

gisunod sunod ka ba sa mga masupilon?
gibuntog ka ba sa pagkatalaw?
nasunog ka ba sa pagkasumo sa imong kinabuhi

sulundon ka ba sa usa ka suguan nga kapalaran?

kataposang pangutana:

gusto mo na bang mamatay?

alang sa nagbasa gikan sa tagsulat

kay mobasa ka man
nan sulaton ko na lang

ania ang gasa
sa wala nay paghunahuna

ning kaadlawon
nangumbitay pa ang kwaknit
sa langob kong
dughan

sulirat ang mga mata
nagbitay
nanghawid sa mga

ugat sa akong
kasingkasing

morag nagpasabot
nga unta
sama kanila
balihon ko na unta
usab
ang akong panglantaw

ang sakto himoong sayop?
ang pagdaugdaog dili na ambaton?
ang tul-id hiwion?
ang limpyo hugawon?

hangtod kanus-a pa ba
nga ang mga bakak
tinud-on?

adunay mga bukog sa
isda kining
akong tutunlan

adunay dakong gakit
ang nasabod
sa sapa ning akong
kalimutaw

adunay lungag ang akong
ngipon

sakit ug sakit lang gihapon
hapdos ug hapdos lang
intawon

pagkaswerte mo nga ikaw
nagbasa
pagkabalaan mo nga wala
kasabot

layo ka sa peligro
luwas ka sa disyerto
wa ka maapil sa dimalas
lahi kag pangagpas

tulo ka panultion

 i


ang tiki
gikan sa kisame
nahug sa salog

ug kita miingon

anaa gayo'y
panahon nga
ang tiki
mohalok sa
salog

ii

ang mga tuloy
sa dagat
gibanlas sa
mga balas
sa baybayon

ug kita nakaingon

na tan-awa
ang Diyos
manggihatagon

iii

wa damha
nagkita ra gayod
ang idlas
nga kasili
ug ang balaybalayon
nga luwag
sa kusina

ug kita nakaingon

di matagna ang
panahon
magkita ra gayod
kita
gihapon
 

pangutana sa gugma

kon mobiya na
ang kasuko

kon ang kapungot
molalin

nangutana ang
gugma

kon angay pa
ba usab
siyang
magpabilin?

ANG ATABAY SA KARAANG OLINGAN


sanglit layo man
kini
wala kaayo
matultuli sa
kasagaran

didto ang akong
kagikan
nagtimba sa
kaimnan

wa sukad kini
nahutdan
nagpunay ug
tubod
ang
kabanggiitan

sa kanunay
gipamati ko ang
iyang
kangiob
ang kamingaw
ang kalalom
sa iyang kahilom

1/20/2013

sapang nakisaw

pagkamalinayon unta sa sapa
diin naglutawlutaw ang usa ka
damgo

nganong gihulugan man kini nimo
ug tunok
sa pagkawalay puangod?

nasamdan ang tubig
nalisang ang mga kinhason
nanglukso ang mga isda
nakisaw ang sapa sa kalinaw

lubog na ang tubig
lapok na ang ilalom
ug ang imong gilubong dinhi
siging pangayo ug
panabang

1/18/2013

didto sa 3rd floor sa Legal Department

alas 9 sa kagabhion
ako na lamang dinhi ang
nagtikawtikaw

hilom ang mga baba
sa balaod
wala mapalong ang
ilang mga
kahayag nga
naglinya sa taas
kaayong
agianan ning balay
sa kamingaw

ang dilaab sa kisame
gikan sa usa ka
suga nga gihawla sa
usa ka
kwadradong lungag

unya sa kiliran niini
anaa ang
kabog nga nagbitay
ug
nahikatulog sa iyang
binali ng
panglantaw

pagtilaw sa kasakit

gitilawan ko ang
dugo sa
akong kasakit

gitusno ko ang
akong tudlo ug
gitilapan ko kini
sa akong dila

natakilpo ko
sa kaaplod
mikurog ko sa
kaaslom

apan
ang kapait niini
nakapalig-on
kanako

wala ang katam-is
wa ko na gani
mabantayi ang
kasagarang
kaparat

ang gibalikan mong karaang balak

gibalikan ang tingog
gipamati pagbalik

abi mo ug kasikas
lamang kini sa mga dahon
sa kanipaan
nga gihadla sa hangin
didto sa
suba

wa nimo damha
sa kadugay sa panahon
nga imo kining
gipanghimakak
nahimo kining tibuok ug
lalom

nga bisan ug habolan mo
kini sa kalimot
lanog lang gihapon
sama sa timbang nahulog
didto sa atabay
sa imong kagahapon

1/17/2013

Pughawng Balon



Pughawng balon
Sa palad mitugdon

Kinsang bataa 
ang nakabuhi niya? 

Sa daplin sa dalan 
 ko ba siya buy-an?

Dapit sa basurahan?

O dal-on nalang kaha sa apartment 
aron mahimoan og balak?

Intawon, 
Gihikot siya sa pultahan
Kay ang yabe nalimtan.

 Akoy 
2012.1.17

1/16/2013

ang mga pader nga wala makita

gibuhat nila ang mga
pader
gisulod ka nila
sa ilang
mga lansis
gipatas-an nila
ang mga
bongbong
gipalig-0n
ang mga
haligi
ug anaa ka
naglingkod
naghinuktok
ug sila nga
nanglabay
bisan sa imong
syagit
ug panabang
walay nakita
ug walay
nadungog
hangtod nga
ikaw
wala na usab
makakita
ug makadungog
kanila

ang akong pangagpas

gilakat mo ang
usa ka
gamayng agianan

mipadayon ka
sa pipila
ka adlaw
sa pipila ka
tuig

miabot ang
panahon nga ikaw
wa nay
kapaingnan tungod
kay
natapos na ang
kalay-on
sa usa ka
dalan

wa mo damha
nga ikaw
anaa na nagtindog sa
kinatumyan sa usa
ka bukid
ug ang tibook kalibotan
imo nang
makita

miundang ka kay
wala na ang
dalan
natapos na

maghandom ka pa
ba ug mga pako
aron luparon mo
ang angay nga
abtan?

andam na ba ang imong
mga kamot
sa paghikap sa usa
ka langit nga
walay unod?

wala pa'y miingon kanimo
nga wala kay
mahikap didto
gapas lang ang tanan
hangin lang
nga milabay sa imong
agtang


1/15/2013

kitang duha

gidagit mo ako
ug nagpadagit sab ako

walay
problema
di ba?

mag-unsa man god
ang halok
kon usa lang ang
nawong?

sama sa pakpak
kataw-anan kon diha mo
lamang kini
idap-g sa bongbong

dagita ako
kay dagiton ko usab ikaw

sama sa pagduot mo kanako
moduot usab ako
diha kanimo

mao kini ang buhat
sa kalipay

asa man god ang
sala
di ba anaa lang kana
sa hunahuna?

gugma batok gugma
pagkahamubo gayod
sa panahon

ug bisan sa paghisgot
lamang
dako na kaayo ang
atong giusikan

yataki sab

abi mo
gusto ko unta ikaw tabangan

luwason gikan nianang
lapokan
tapad sa kabaw
nga
malipayon sa
iyang luna
nga tunaan

dakog gahom ang akong
mga kamot
nga sa imong hunahuna nagkumkom
lamang nianang
bato sa
panimalos

abi mo
gusto ko ikaw'ng tudloan
unsaon nga
sila
makakat-on ug kahadlok
sa pagyatak
sa imong
dughan

hadlokan ka man
god
abi nimo ug makuha mo lamang ang imong gusto diha sa
pahiyom

sipyat ka
wala matukod ang mga utlanan
pinaagi sa
talidhay lamang

daghan nang dugo ang mibanaw
sa suba
aron lang ang mga buwak
mamuswak

ang kalinaw
giduladulaan lamang nilang
nagyatak kanimo
ihatag dili
ug ikaw misalig nga
kini
dili nila
yam-iran

ako sa akong kabahin
midalikyat nianang
luna sa
kadaotan

gihagkan ko ang nawong
sa gubat
ug gipangko ko ang
korona sa
kasakit
gitutukan ko ang kamatayon
ug
gisapsapan ko ang iyang
agtang
aron lang
makab-ot kining
patag
sa kalamboan

dili lamang sa hawid
madala ang
kadaugan

kon yatakan ka
aron makakat-on siya
pwes
yatakan mo usab
siya

hangtod nga sila
magpanuko na
sa
pagtutok kanimo

sa dihang nagsugod ang salimuang

ang hangin
nahisama sa tubig
nga nahisama sa
nabali nga pangpang
nga nahimong
panganod
ug ang bangaw
wala mahimong
tulay
sukwahi sa ilang
gipanulti

ang kahoy nga
balite
nahimong
mga sapa
nga nahimong
mga buhok
nga nahimong
mga langgam
sukwahi sa ilang
gipanagna

mao kini ang
sugod sa iyang
pagsalimuang
ug ang utlanan niini
mao ang
lubnganan nga
gitubuan sa daghan
kaayong mga
buwak

wala na mosukwahi
ang
giingon nilang
sangpotanan

1/14/2013

sa paglabay sa panahon kabahin sa imong tinagoan

tungod kay daghan
kag gitagoan
pwes daghan ka
usab ug
gitan-ogan
ug pag-abot sa
kalimot
kining tanang
mangahinog
mangalata sud sa
imong
lubnganan

ang mga kabulakan
sa tupad mo
mamuswak usab

ang mga alibangbang
ug alindanaw
mobatog
unya pagkahuman
sama
sa mga panghitabo
igo lang mihalok ug
dayog 
panglabay

aduna pa  ba kahay
mahinumdom kon unsa kadtong
nangahinog?

1/13/2013

kabahin sa tigulang nga wala makapanagang sa iyang kaugalingon

ang tiguwang, di kamaong managang
sa iyang kaugalingon,

gipasumanginlan mo siya sa sala nga dili kaayo tataw
mga ginagmayng butang nga dili makatay-og sa dako kaayong kalibotan nga imong gipuy-an
hupong ka dinhi

ang mga kasaba napuros paghukom lamang
walay makita nga bisag gamayng siwil nga kamatooran

mibagyo ka, gipalid ang tanang mga balay nga anaa sa dughan sa maong tiguwang
wala siya kasinggit sa dihang mitamparos ka
walay mobalitok kanimo

nag-iyak ang panahon
miduyog

giuli niya ang sukli, namutos, imong gilungkat ang tanan
wala siyay gitago

ako nga naglantaw lamang walay nahimo
dili na usab ako kamaong moiyak
wala ako makapagang kaniya

sad-an ka
basin kaha ug sad-an ka
kinsa ba'y masayod

daghang lingla ang mga adlaw
daghang gitago ang kangitngit sa kagabhion
ang akong mga mata walay nakita

ako nakahukom sa tungatunga sa dako kaayong unos sa akong kinabuhi
ako, ang labing sad-an

sa akong pagpakahilom, ang akong mga kamot nakagapos,
uga ang akong laway, agipo sa kalayo ang akong mga pulong

ang akong baroganan
kiwa
wala usab ako masayod
nakalimot kaha ako?

unsa ba ang akong nahikalimtan
sakit
dili ko na kini sangpiton pa
mawiwi lang
ang mga samad nga unta
hagbay rang naalim

1/09/2013

kadtong bakak nako sa imong suod nga higala




 sa usa nako ka suroy
natagboan nako ang imong suod
nga higala kaniadto

tiguwang na usab siya
naniwang ug daghan na ug kunot
ang iyang agtang

(durong pamuwak ang mga
punoan sa mangga nga
naglaray sa maong
karsada
unya hinay kaayo ang
tayhop sa hangin
nga gikan sa baybayon
diin ang barko para
sa Dipolog
midunggo ug sa pipila ka
oras 
molarga na usab)

ingon siya sayang nga kita
kuno wala magdayon
nga unta bagay man kuno
kaayo ang
atong mga pamayhon

ingon ko wa koy pagmahay
hilaw pa kaayo ang akong 
gugma kaniya
unya dako pa usab kaayo
ang akong pagduda

(sud sa akong dughay
anaa ang pagtoo nga
dili tiunay ang akong 
gugma kaniya)

tul-id lang gihapon ang akong
lakaw
sa panahon sa kahaponon
dili ko hubog
wala ko magsamparay

apan sa dihang miulan ug kalit
unya kusog kaayo
 maayo nakong pagkabasa

ambot ba
aduna koy gibati nga di nako 
masabtan
mora kog piso
nga gibiyaan sa
inaan

aduna pamulungon ang akong
dughan
nga gusto nakong litokon
apan dili ko gayod malitok
bisan ning
kahaponon
ngadto sa imong suod nga 
higala:

kadtong bakak nga morag uwat
ang dili pa gayod nako madawat.











dyotayng kalibotan



sa klase
kabahin sa pamalaod
pagkadugay modagan sa mga oras

morag kulang ug kaon
ang kabaw nga 
nagbira sa
kangga

sama ni Bamba
nga daot na ug mata
kanunay
ang pagpanghuyab
nga kon imong
birahon
ang iyang gininhawa 
nga pisi
haska na gayong
taasa


apan kon
kwentahon nako ug
tinood
pagkataas na sa 
milabay

ning samang lawak
ang galingkod na karon
mao ang anak
sa akong
tupad kaniadto

nga sus ginoo
pagkalimbongan

apan
ambot ug unsang hitaboa
nga kasagaran
mao man hinoon
ang
malamposon 

(nasina lang kaha
ako?)

daghag katigayonan
lapad ang basakan
galawod ang kalubihan
bantogan ug
banggiitan sa atong
katilingban

(lantaw duko sa
kaugalingon)

ako ania
nagpabiling nagtudlo
kon unsa
ang angay ug unsa
ang husay

ning kalibotan kong
dyotay

salimuang sa 12:02 udto

unsaon ko kaha pagbakwi
ang akong mga gipanulti kabahin
sa gugma?

nasulti ko na kini ug sama sa mga
lugas
nanubo na
nahimo nang mga dagkong kahoy
sa
atong duha ka mga lasang

kon bakwion ko kini
ipakisama nga ako magdala sa akong
mga binaid nga atsa
ug unya sugdan ko ang
pagputol sa mga dagkong
lawas niini
ug unya kon hapit na kining
matumba
modali ako ug dagan kay
basin ug
ako ang mahagsaan

daghan na ang namatay kabahin niini

naunay sa kaugalingong lit-ag
nakaon ang kaugalingong paon
unya ang taga misabod sa tutunlan
nga bisan unsaon
og langkat
wala gayod maugkat

hinoon, unsa bay akong
kabalak-an

wala, ug wala na gayod
ako'y kawilihan

ugma, mahimo ko kining
bakwion

kinsa ba usab ako nga
imong basolon?

1/08/2013

hala hakhak


1/06/2013

tanghaga sa usa ka pagsulat

sa kanunay wala kay
kasayuran
kon unsa ang akong gibuhat
sa dihang
gipatik ko kining mga
pulong

anaa ang mga tanghaga
sa akong
mga tudlo

ang akong mga mata
nagsimag sa
kalayo sa kalipay

gilantaw ko ang akong
kaugalingon
nga mitaod sa iyang mga
pako
sa likod sa iyang
dughan

milupad ako
apan wala ako'y giabtan

yano lang kining akong kalipay
nga angayan mong dili  mo mahibaw-an
kon unsa
kon ngano
kon asa dapit
kon kanus-a

kasilagan mo lang ako
sama sa paglikay-likay ko sa akong
mga panaw

ang akong agianan usa ra
wala pay mga tunob dinhi

ang ulan dinhi mao ang
nangahulog nga mga dahon
sa usa
ka hagbay na nga
patayng
kahoy

limpyo na unta

sa dihang nadag-ag ako
nakita mo ang akong mga pangos
nasamdan ang akong tuhod
ug midugo

wala kay gibuhat

ug ako miampo sa ulan
aron ako
mahugasan

miulan

nalimpyo ang akong
mga bukton
nahugasan ang akong
mga buhok

limpyo na unta

apan dili kini mao ang
gipangita ko nga katapusan

nakita ko ang tunaan sa
kabaw
ug dayon
miambak ako didto
ug milunang ako
sa lapok


pasayloa, ako, akong sala, sa wala pagbuhat

gilantaw ko lamang ang
nawong sa
sala
gitutukan ko ang iyang
mga mata
gihunahuna ko ang
kahamis
sa iyang lawas
ang kahumot ug
kahumok
sa iyang mga
paa ug
kamot
sa matag adlaw
maoy akong giduaw
inig mata ko
sa kaadlawon

gihandom ko kini
matag gabii
disir ako matulog
gidamgo ko ang
sala
gisulod ko siya
sa lalom kong
katulugon

apan wala ko kini
buhata
wala ug wala ko gayod
kini
masukad
sukad
hikapa

oo, gidulog ko kini
apan
wala ko gayod kini
mahagki

ang iyang mga ngabil
nagpaabot kanako
ug ang akong dili ania
tig-a nga yuta
ug sa kauga
nangliki

walay ulan ang akong
kalibotan
walay nga liso nga
migitib aron mamahimong
mga tanom
nga mamulak ug unya
mamunga

busa pasayloa ako
sala, ang akong sala,
diha
sa wala pagbuhat

1/04/2013

ang nagpabilin nga kalipay

WALA'y dili malimtan

ang tanan kutob lang gayod
sa buhi
pa siya.

 Inigkahuman, magsugod
na ug paghikalimot

sagunson nga kalimot
hangtod
ang tanang mapapas

ang kamatayon gamhanan

apan mas gamhanan
ang kalimot

sulayi kini sa pagtultol sa
lugar sa imong
kabatan-on kaniadto

subaya ang dalan

adunay motan-aw kanimo
ug  imo usab nga
tan-awon

wala kay mailhan
ug wala usa'y makaila kanimo

mangutana ka
kabahin sa mga ngalan

magpanglingo silang tanan
mora bag
ang tanan nahanaw
walay gigikanan
walay gamot

ug busa mobalik ka sa agi
kay usa lamang ang
naa sa imong hunahuna

aduna kay padulngan

ug mao lamang kini ang imong
nagpabilin nga
kalipay

1/01/2013

class reunion 2012 (davao city)

ang pagbalik kutob
lang kana sa pagduaw
sa hamubong
higayon lamang

lantaw sa mga nangagi
pahiyom gamay
dayon biya
nga walay bitbiton
bisag
usa na lang ka
gaan kaayong
pulong