2013/03/26

kadtong tiguwang nga igsoon sa inyong inahan

adunay gihimo ang
Bathala

siya ang tighugas sa
mga basong
inyong giimnan

ang tighipos sa mga
wala makaon

ang tig-ihap sa mga
kutsara ug
tinidor

ang tigtawag sa mga
ngalan
sa mga pag-umangkon

adunay gihimo si
Bathala

nga ang kalipay nga alang
kaniya mao lamang
ang pagpanghugas
ang pagpanghipos
ang pagpanawag

mamatay kini siyang
mag-inosara unya kamong iyang
gimahal ug
giakatahan pag-ayo
wala na dinhi

puhon ug maghugpong kamo
balik sa maong lugar nga iyang gihugasan
sa mga baso
ang inyong mahinumduman mao lamang
ang tubig
unya ang inyong mga ngalan nga iyang
gipanawag kaniadto
inyong gihimong
kataw-anan

Panginhas dire