7/31/2013

ang anaa dinhi ang atong mahinumduman mao nga kusog siyang mohagok ug sakit gayod kaayo sa dunggan busa gusto natong mopalayo. Daghang kahiubos. Daghang mga wala pa masulti. Gustong putlon ang tanan. Mangitag kagawasan kay ang gahuot nga dughan mao na man ang prisohan. Sa dihang nagtinga na siya, sa hinay hinay mikamang ang kamingaw. Hangtod nga siya namatay. Mitulo ang luha. Gikumot ang kasingkasing. Unya nakaingon ka nga nganong karon man lang kini, nganong mora mag dili na usab ako kamaong mabuhi nga ako na lang. Nganong gusto mo naman usab nga mamatay aron mokuyog kaniya nga kanhiay gikahiubsan mo nga kanhiay nasuko ka kay kusog kaayo siyang mohagok?http://s3-ec.buzzfed.com/static/enhanced/webdr02/2013/7/29/11/anigif_enhanced-buzz-16860-1375111395-10.gif

ang akong gihigugma mao na lamang ako

dili na ko ganahan anang laing sugnod. sakto na kadto. kon ako pang balikan pa wala na ang kainit. ania na ako dinhi.nindot dinhi. kontento na ako. ang kahaw-ang hagdanan ko kana. ang kamingaw pultahan. ang mga pagbasol mao kana ang agianan sa akong panaw diin naghandom pa ako nga makaplagan pag-usab ang akong kaugalingon. kon ikaw maghandom pa usab kanako, kalimti ako. wala na ang kainit. ang kabugnaw nga nahibilin, ako kanang balonon, sa akong layo pa nga panaw. ang akong gihigugma, mao na lamang ako.http://s3-ec.buzzfed.com/static/enhanced/webdr01/2013/7/29/11/anigif_enhanced-buzz-27163-1375111053-41.gif

sa wala nimo masulti kaniya.



nagkita ta
ang atong gipanagsultian haskang layoa ra sa atong mga ipanulti unta. Palingoglingog. Ang isulti unta bahin sa usa ka nindot nga salag sa tamsi nga maayong pagkahaluna sa sanga sa dum-on. Tago man kaayo. Unya putos sa kalinaw. Apan unsa ba ang gibungat? kabahin naman noon sa napalit nga isda sa  merkado nga dubok na kaayo unya ang hasang itom pa sa dag-om didto sa kasadpan.Dunay gamayng kahilom, panukad na unta kadto sa pagsulti kabahin sa gitago nga sulat sa ilalom sa katre nga wa nimo tagad mahatag. Apan nahutdan ka sa kaisog. Wala man god ang bino. Wala man god ang imong dagon nga bato sud sa imong sapatos. Busa, hangtod karon, nanimahong pan-os ang imong baba sa mumho nga wala nimo matulon kay mitapot sa imong tilaok. Nanimahong patay ang imong kasingkasing. Ug bisan ikaw gustong mamaypay aron dili ka malanag sa wala nimo masulti kaniya. http://s3-ec.buzzfed.com/static/enhanced/webdr06/2013/7/29/11/anigif_enhanced-buzz-15835-1375111314-16.gif

Gikapoy ka na ug basa

http://s3-ec.buzzfed.com/static/enhanced/webdr02/2013/7/29/11/anigif_enhanced-buzz-16305-1375111222-6.gif ang dayalogo ni plato ug ang trahedya ni sophocles ug ang mga baki ni aristophanes ug ang mga panganod ana sa sulod sa aparador wala nimo mautingkay. Busa nagyamayama ang kahilom ni socrates. Nagpunay ug alipasa ang mga baki ni aristophanes. Ug ang mga panganod nauga nga morag semento diha sa sulod sa baga nga samin. Si Sophocles dako gayod kaayog pagmahay nimo ngano nga ang iyang trahedya wala kalabang paingon didto sa imong mga silingan.

Gikapoy ka na ug basa. Hapit na maupos ang kandila ug ang kahayag niini imo na lang iiwag sa kangitngit diha sa imong gahanap nga agianan.



apil sab kos mga gidimalas sa natad sa gugma
kadtong maayo nakog pagkalup-og nga bisan unsaon nakog bangon wa jud kabangon nga bisan unsaon nakog palimotlimot wa jud ko kalimot unya sa dihang makatulog na ko damgohon ko siya nga akong gihagkan unya gikuramos kog gakos nga hugot kaayo unya giayo niyang usap ang akong dila unya sa dihang hapit na ko magawsan, nakamata ko kay kahion lang diay kaayo bugnaw kaayo ang kagabhion haw-ang kaayo ang palibot, ug sa pipila ka gutlo na lamang unta mamatay na gayod ako sa kahiubos ug kamingaw. Maayo na lang gani kay nangawras ang akong paboritong iro sa akong pultahan nga akong giabrihan unya ang iyang ikog siging gakawaykaway.http://s3-ec.buzzfed.com/static/enhanced/webdr03/2013/7/29/11/anigif_enhanced-buzz-25898-1375111102-19.gif

ang salmon sashimi didto sa rai-rai-ken

http://ts3.explicit.bing.net/th?id=H.4994459621656246&pid=15.1
mas lamian ang
sashimi nga salmon
kay sa sushi
nga california
maki

nindot ang bulok
sa unod ani
unya ang
kahumok ug kabugnaw
mabati kaayo sa  akong
dila nga hagbay rang
nagkisikisi nga
motam-os niini
 labi
na ug makatutok ko
sa puti kaayong paa
sa usa ka seksing
nga nagpasaring-saring
unya
ang short haskang
puoka

ug ang kahalang sa
wasabe
nagdilaab diha sa
akong tilaok
lapos na sa gahuot
nga lawak sud
sa akong dughan


kada bakak, naay nawong

 

gahimo kog daghang nawong
tungod kay ang gabii, ang kabuntagon, ug ang
kaudtohon siging panawag kanako
unya puros sab bakakon

kada bakak, naay nawong
kada nawong naa ang lain laing
pasundayag

ako siyang gisultihan
sekreto nato kini ayaw gayod ipanabi unya
ingon siya
my lips are sealed apan wa ko magdahom
nga iya kining tumanon ug

tuod man adunay laing nanawag
nakadungog kuno kabahin ani ug bahin adto

ug sekreto lang pod namo kadto
ug mao say akong ingon i can keep a secret 
my lips are sealed

daghan na ang akong nawong
pagkaanindot tan-awon nga akong gipamutol

ug akong gibitay diha sa bongbong sa among
atop nga kon moulan magtulo ug ang tanang

mga nawong mangabasa apan kay puros
dili matinuoron nan di na pod nako ambaton

samtang ako nga nahinanok sa bugnaw nga
kagabhion gihabolan ang lawas nga karon

nagmalipayon kay wala nay nawong nga
moatubang sa akong kasub-anan.

ok ka lang ba?



nasulayan mo na ba ang wa katulog sa tibook gabii
hangtod pa gani sa kabuntagon tungod kay wa ka kabungat sa imong gugma?

 

nga ang imong gugma morag tawong nagloko diha sa banig unya dili kabangon
tungod sa kahadlok ug sa kabalaka nga basin ug pakyas lang kini gihapon?

nga sa dihang mihirit ka ug "i love you" wa katingog ang imong gihalaran
unya midagan sa "CR" kay kasukaon?

unya paggawas mitutok kanimo nga haskang sukoa nga ug di lang ikaulaw
ikaw unta iyang sagpaon?

haskang sakita jud, unya ikaw gustong moambak sa kinatumyan sa building
aron malata ang imong ulo human kini mabusdak diha sa kalsada nga morag watermelon

ok ka lang ba?

wa pa ko kasulay niini, busa giluom ko na lang ang tanang gugmang walay kahungawan
sud sa dughan, akong pabuthon nga morag mga rebentador

dili ninyo kini madunggan, kay ang akong gihalad kaninyong tanan mao man lamang ang
pahiyom nga balaan.

nanimaho kang aplod diha sa imong kabakakon

 http://ts4.mm.bing.net/th?id=H.5045500987965679&pid=15.1

sa laing bahin
ablihan ko ang bintana nga nag-atubang sa adlaw

pagkaanindot sa bukid nga morag mga totoy ni maria
nga bag-o pang nadalaga nga kanunay kong lantawon
kon maligo na siya sa sapa

pagkaanindot sa mga buwak nga misalod sa kainit
sa adlaw diha sa ilang mga dila

pagkaanindot sa mga kahoy nga nangabre sa ilang mga
kamot aron hangpon ang hangin og adlaw

sa laing bahin
aduna akoy kasingkasing nga makamaong mosamoma sa
imong gugmang hilaw

nga bisan sa kaaslom akong gipakahimong
manggang makatubod pa gihapon sa akong laway

gihigugma ko ikaw apan bungol ka man
gipakita ko kanimo ang kaanindot sa akong adlaw ug sa mga bulak ug sa mga kakahoyan

apan patay ka diha sa imong mga limod
ug nanimaho kang aplod diha sa imong kabakakon

ako nga kamaong mohubo kanimo


 http://ts4.mm.bing.net/th?id=H.4988493946160079&pid=15.1
karong gabii
gusto nakong huboan ta ka

sa imong sapot sa imong panit
sa imong unod hangtod nga ang

mabilin mao na lamang ang imong
mga bukog

unya tagsatagsaon ta kag hapnig
ang mga bukog nga tiil diha sa

kilid ug ang mga bukog sa kamot
diha sa tunga unya ang imong

kalabera akong ipagawas ug
ibutang sa altar ug akong dagkotan

sa kandila nga gitagkosan ug
itom nga tanod

molantaw ka nako nga walay
mata ug moingon ka nga pagkawakoy

puangod nganong gibuhatan ka sa
ingon unya mangadye ko nga unta

ikaw mahimong tawo nga unta ikaw
mahimong tinood kay sa atong

unang panagkita sa wa pa kita
huboi mananap ka naman dako

unya ang imong kinaiya ug mga
pinulungan makabukog namang daan.

kwadrado ug sinug-ang



http://ts3.mm.bing.net/th?id=H.4708466385159930&pid=15.1ang akong nawong
kwadrado sukwahi

sa imo nga sinug-ang
nga kon akong tutukan

ug sabton mahimong
pulang kasingkasing

nga sa una gigunting
sa bata gikan sa

kwadradong papel
nga akong nawong

ayaw kahadlok kay
dili ako lawak dili ako

mahimo nimong karsel
kay ning atong dula

di ko nimo masudlan ug
di sab ka nako himoong

sug-ang sa akong
haw-ang nga kahimtang

kwadrado akong nawong
mahimong larawan sa sulod

ang sug-ang nga ang lubot
sa kalayo dauban

sulog sa hunahuna didto sa uma ni babie


 
ang mga bato gustong
mahimong ligbos

mubo lang man god
ang kinabuhi sa ligbos

sama sa lamok nga
sabaan babaye ang ngalan

sa kisaw sa sapa nga
anad ang isda nga

gisipatan sa bunga sa
nipa nga gustong mokawhat

sa bulan sa iyang ulohan
nga kutsilyo ug buhok

ang lingkoranan sa suba
nga bukobuko sa kabaw

namati naniid kon kinsa
ang sunod nga madakin-as

sa lapok nga agianan diin
ang reyna mao ang

undok sa bag-ong
gipamutol nga amorseco

nga gidayandayanan sa
mga tubol sa kanding

7/29/2013

ug kon kanus-a siya humanon sa kapalaran

adunay mga relasyon nga morag
liso nga gibulad, unya nauga, unya gisabwag
sa kadaplinan,

wala man unta gituka sa langgam
nga kamaong mosayaw
apan unsang katarungan nga
wala man mogitib diha sa yutang
giabonohan

adunay panaglambigit nga
tagnatagna lang
gipiyal sa mga paghukom sa mga bitoon

nga ug molambo, ok lang nga ug kon
mapakyas
ok lang pod gihapon

mao kini ang panimpalad sa mga tawong
kahibalong mabuhi sa tungatunga sa lawod sa kamingaw

buslot ang sakayan, guba ang bugsay
gialirongan sa daghang mga iho
gisagpa sa dagko kaayong mga balod
giputos sa tumang kangitngit sa mga dag-om
nga mga panganod
gitulon sa mga tilaok sa baba sa kagabhion
nga walay pagkaugam
apan wa na kaila kon unsa ang kalisang
ug kabalaka kon kanus-a
siya humanon sa kapalaran

apan sa kalit, ang bombelya napundir.

lahi baya ang chat kay lahi usab ako kaayo didto

gawasnon man god kita sa atong isulat labi na kon dili mo madungog ang akong tingog
kon kini masulub-on ba sama sa usa ka sip-on nga wa pa mahinog ug dili kagawas sa ilong nga huot kaayog bangag,

labi na nga dili mo makita ang akong panagway, kon kini gubot ba ang buhok, katulgon ba ang mga mata,
itom ba ang kalimutaw, tangkag ba ang dalunggan, baga ba ang ngabil o talinis ba ang  liog, nipis na ba ang kilay, o misamot ba kalapad ang akong apapangig o daghan bang balod ang akong mga pilok

ang chat man god usa ka dako kaayo nga pagtakuban diha sa mga pulong nga walay nawong walay lawas ug walay tingog

nindot usahay nga ikaw mahimong usa ka bigaon nga tiki ug ako usa ka gamay nga lamok nga kamao sab nga mokiringkiring unya ang atong lugar sa dakpanay ug pangagpas mao ang kisame nga gisug-an sa bombelya nga hapit na  mapundir

nagsigi ko ug likay-likay sa imong taas nga dila, unya ang akong paglupad morag nagpasaringsaring nga aduna usay pangandoy nga unta ako imong matukob

aron pagkaugma malipay
(ang tawong nagsulat sa iyang balak sa atong ubos diha sa iyang computer nga
gipaypayan sa yabag ug abugon nga electric fan) kay wala na ang lamok nga uwagan unya
ang tiki naghinuktok sa tumang kamingaw kay ang iyang kabigaon
walay undang nga naghandom nga unta adunay lamok nga masaag na usab sa iyang kisame
 aron iyang himoong panihapon sa iyang kakiat.

nindot hunahunaon nga mitutok ang kunuhay (trying hard) nga magbabalak didto sa kisame tunong gayod sa
tiki nga nagmingaw,
unya sa dihang hapit na silang duha magtinutukay, o
magkasinabot ba kaha nga sabton na lang unta ang ilang mga pangandoy nga wala matuman
ug magdungan silang dakop niini karong gabhiona

apan sa kalit, ang bombelya
 napundir

ug diha usab, naundang ang atong chat
nga walay lami kay bisag unsa na lang ang gilantugian
bisag walay klarong
kapaingnan

morag black-out nga wala
masibya sa radyo ug pamantalaan.

sayang lang

wa ko na handoma
nga sulaton pa ang kinamub-ang balak

sayang lang.

diha sa imong hamis nga kahayag

sa dihang nagkahimamat ta
abi nako ug malimpyo ang kalangitan sa iyang mga dag-om
nahimo na man hinoong bato ang dagat
ug ang mga isda nahimong mga barko nga nag-iyahay ug
pangandoy nga maoy makatag-iya sa nahibiling
asgad nga yamog sa gagmayng mga kutay didto
sa baybayon

ang hangin nga midunggo sa akong agtang
troso nga gianod sa baha gikan sa lasang
nagdugo ang akong dunggan nga morag
lubog nga busay nga naigo na usab sa imong
mga pasalig

wa na ako malooy pa sa akong kaugalingon
wa ko man usab kini kasilagi kay mora lang
hinoon ako ug nangluwa sa langit unya milanding
pagjkahuman ang kalas-ay diha ra pod
sa akong aping

karon mao na ang tukmnag higayon sa panamilit
bun-og ang mga apapangig sa mga bitoon
ug unya ang daghang uwat ang bulan sa iyang
bungol nga nawong

karon ingna ko kon lami ba ang pagdagmal sa
akong mga kumo sa  kangitngit diha sa imong gipanghambog
nga hamis nga kahayag?


nasabtan mo na gayod ang tanan

sa kadugay
kamao ka nang mobalit-ad, ang imong mga bukog kamao na nga mahimong unod,
ang imong likod lahero na nga mahimong atubangan
ug sama sa atubangan, kon mobalit-ad pa gayod, mahimo kining likod,
usahay, lantawon ka nilang walay ngabil, ug dayog dagan kay kuno dili ka ingon nila,

ang ilang kahadlok, gikatawa mo kini nga mag-inosara,
dayog sayaw nimo sa imong kaugalingong musika nga gimugna sa imong kaugalingong
libreta diha sa kilid sa bukog mo nga kwerdas

gibali bali nimo ang ilang gitawag nga reyalidad, nahimo kang majikero, ug sa kadugayan
sa dihang nawala na sila sa pasing, mibilib sila nimo isip usa ka banggiitan nga tawo,
dili masakitan,dili madutlan sa ilang mga pagbiay-biay,

baga kuno imong nawong morag pader sa dato nga insik nga supplier og shabu sa mindanao
nga bisan unsaon nilag pusil, di na jud madutlan,

kini nahitabo sa dihang nakat-unan na nimo ang ilang mga binuang, sa dihang wala ka na  mitoo
sa ilang mga pasalig, sa dihang maayo na nimong pagkapiang sa ilang mga bukbok ug kulata

unya kay kamao ka mang mobangon, unya natakdan ka man sa tiki nga ug maputol ang ikog
kamao man sang mosumpay pinaagi sa hunahuna lamang, diha sa gamayng pagpailob sa
mga dag-om hangtod nga kini miulan,

gibalit-ad baya sa kamel ang iyang tiyan aron malatas niya ang kainit sa disyerto
gibalit-ad sa lalaki ang iyang ikog aron mailhan nga siya tawo ug dili unggoy sa lasang,
gibalit-ad baya ni dodong ang iyang kamisin aron maabtan niyag balik si inday sa iyang payag,
gibalit-ad baya sa abogado ang iyang mga papeles aron lang modaog sa kaso
gibalit-ad ko usab ang akong lubot aron masabtan mo ang imong nawong
ug daghan pa, ug ubay-ubay pa gayod

gibalit-ad ko ang tanan nga mga yano, aron unta ako nimo hisabtan
gipasabot ko ikaw nga diha sa pagbalit-ad, masabtan mo ang usa ka kamatooran nga
diha sa pagbalit-ad sa pagsabot

sa pagsabot nga ang tanan dili baya nato masabtan, sukwahi sa paningkamot sa syensa ug sa
literatura nga ang hapsay ug maayong pagkaplantsa maoy gikinihanglan aron masabtan ang tibuok
kalibotan nga dili ra ba gayod kana ang tinood

kay kinsa ba ang nakatungkad sa kinailawman sa dagat
ug sa kinatumyan sa kawanangan?

wala.

karon kon moingon ka, unsa ba kining giyamayama niining tawhana, nga wala man akoy nasabtan niini?
kon miabot ka na nianang punto sa kalibog, ug sa kasapat, dawata ang akong dakong pasalamat.

nasabtan mo na gayod ang tanan.

7/27/2013

TAMBAG SA GIMINO (KADTONG NAWALA UG GABALIK BALIK SA IYANG GIAGIAN)

sunod sa tambag
sa sinati sa mino
akong gibalit-ad
ang akong sapot
sa kagahapon aron
nako
matultulan ang
akong
karon.

7/25/2013

di na ko magul-an pa bahin ana

karon karon lang
mitingog na pod ang
tuko

akong giihap

ang kataposang
pagtuko

mao lang gihapon
di ko
magmalamposon

apan
sinati ko na kana

di na ko
magul-an pa
bahin ana

tungod sa katam-is

pagkahuman
mangatug ta sa
ibabaw sa
kasagbotan

ilalom sa kahayag
sa bulan

bisan sa kakapoy
madungog pa gayod nato
ang mga tunob
sa sulom
nga nanglakaw paingon
sa atong
tiilan

ang awit sa akong sabon

gibilaran
ang kisaw ning isdang
tunukon sud
sa akong
dughan


gadugo ang
akong
kasingkasing

puno sa kahadlok
ang kagabhion
miapaw ang kalisang
sa kaadlawon

apan kwidaw ka
di ko ganahang
mahimong
bug-at alang
kaninyo

busa sayo sa
buntag
didto sa banyo
madungog
pa gihapon ninyo
ang taghoy sa akong
sabon

sa likod sa imong balay

adunay gaingon nga kini nindot
ug ikaw misabat, nindot, ug silang tanan, miuyon nga nindot gayod

unya imong gikab-ot, gikuha, gidala, gitangag sa inyong balay, kay
lagi nindot,

ug silang tanan, nasina, kay ikaw ang nakatangag sa nindot, nga karon
ania na sulod sa imong lawak

apan, sa tinood lang, dili nindot, wa makalipay kanimo, apan
nahinaykan na lang, busa, nindot, nindot, gibalikbalik mo ang pagsultig nindot,

apan, sa tinood lang, dili gayod nindot, ug naghinuktok ka, kay dako ra kaayo
ang imong sakripisyo, aron makuha ang nindot,

kinsa bay mag-antos niini,kundi ikaw man lang, busa, gibalihan nimo ang bintana
sa likod sa imong balay ug didto,

ang nindot gilabay.

7/23/2013

"you're fired", at least sa facebook lang.

wala ko
naglisod nga ako kang gi
block

sa facebook, kay nakaatik ko
nga ako lang man god
ang siging ga "hi" sa imoha

unya ang imong bawos "hi" lang
pod gihapon

unya kon maghisgot kog bahin sa imoha
di ka maghisgot balos sa ako
kon naunsa na ko

ikaw , ug ikaw lang ang importante
sa imong kaugalingon

ang imong kawsa, ang imong
hunahuna

nga mora bag ako, dili na usab ako,
dili tawo, dili gani butang, kon dili
hagawhaw lamang sa
akong kaugalingong kamingaw

"shit!" kataposang hukom nako,
karon ako ang magbuot

"you're fired", at least sa facebook lang.

it-it

kahinumdom ka pa ba

sa it-it?

wala na sila karon dinhi

sila kadtong mga gagmayng

langgam

nga ang balahibo sama

sa bulok sa langit

nga kamaong mosukol

sa mga uwak

nga nagpunay ug dumot

sa iyang mga pispis

didto sa tunga sa

iyang salag

gagimok pa nga puting ulod gikan sa usa ka dahon

molutaw gayod
ang gaan

pagkagaan
sa gibati nga samtang galakaw ka sa usa ka sip-ot nga dalan nga hapit gani di maigo ang kabaw

hapdos ang abaga nga misabod sa kilid

apan tungod kay gaan kaayo karon ang imong gibati

milutaw ka sama sa usa ka  tamsi sa ibabaw sa taas nga punoan sa lubi

samtang ang imong taas nga sungo

gabitbit anang gagimok pa nga puting ulod gikan sa usa ka dahon.

unya ang salog nga kahoy gabok na usab kay gianay.

unsa to? ang home kuno kadtong tua didto?
so wala diay diri?

kon tua didto, pwes mao diay kadtong
atong balikan pa
o ato ba kahang adtoon

pagkapait.

kay dunay uban nga wa nay balikan pa
ug wa na usay
adtoon

walay home, apan aron lang mabuhi
o magpakabuhi

mugnaon gayod ang home
kay wala na didto


diri na lang sa akong kasingkasing
nga akong gisapupo samtang ako galuko
sa gamay kaayong banig
sud sa lawak nga kahon
ngitngit, bugnaw
unya ang salog nga kahoy
gabok na usab
kay gianay.

kon kanus-a magmalamposon ang balak sa iyang mga tinguha

kon dili ka
makapahiyom
nan, wala
ang balak
molampos sa
iyang mga
tinguha

kabahin sa akong pulong nga dili hait

kining
akong
pulong
dili hait
 
pundol kini
dili kadulot
sa kahumok
sa imong
unod
 
apan patyon ka
sa kagilok
bisan
sa usa ka
mubong
higayon lamang

alang kang jondy sa dihang miingon siya nga sa edad nga 34 despite sa iyang PhD, learner pa gihapon siya sa natad sa pagpamalak

wa man god graduation ang balak
samtang manahon pa ang mga sanga sa kahoy
ug mogitib pa ang mga kahayag sa buslot sa atong mga payag
nan, mobalak jud ta gihapon

7/22/2013

tugbang mo na ang kahilom

sa sayong buntag
nanghugas kos akong mga kamot

human nanghilam-os
nanamin

nanudlay, giusob ang
pinahapay

mipahiyom sa
kaugalingon ug

dayog ingon, "milampos
ka bay!"

tangag mo na ang
kalinaw sa ngabil

gawas sa lawak
ngadto sa kalibotan

sa tunga ning
kagubot

tugbang mo na
ang kahilom

7/20/2013

ug makahimo nimong tinood nga gamhanan

usahay
magpakalig-on kitang tanan sa mga bakak
ug nasayod kita niini

dulaan nato ang panahon
sama sa usa ka dakpanay

motago ka, motago sab ko
kabalo ta nga kining pagtago-tago adunay dakong kalambigitan sa atong pagpangita sa atong mga tumong

unsa ka, unsa ko
asa ka paingon, ug asa sab ko
sayod kitang tanan

kita nato ang pagtuyok-tuyok sa kinabuhi
kasagaran walay tumong
gani daghan kitag gibuhat nga tungod sa kalaay nagmugna kitag dula nga patyon ang mga oras
ug malamposon kita niini

kahinumdom ka ba sa pagligid nato sa daplin sa bungtod
gibalik balik natog sakay ang palwa sa lubi
gipatay nato ang oras
pinaagi sa pagdahili, pag-abot, pagbiya, pagsaka, pagkanaog ug diha sa panahon nga kita nagkuyog
nagpunay kita ug katawa

inig abot nato sa tagsatagsa ta ka pinuy-anan
wala na kitay gana
inig abot nato sa atong lawak
di na gani kita katulog
inig abot nato sa atong tagsatagsa ka kaugalingon
bation nato ang tanang kahadlok

ang problema kay wala na kitay kapaingnan
wala na kitay lawak nga adtoan pa
wala nay laing pultahan nga tong ukbon
unya layo na kita kaayo sa atong kaugalingon
di na gani nato madungog ang atong tingog

anaa ang kalisang nga hilabihan
apan sama sa tanang panghitabo
kon imo kining atubangon
kini mao ang tinood nga makapalig-on
ug makahimo nimong
tinood nga gamhanan

ilang tubag mga pahiyom lamang

misaad ako nga bisitaan
ko ang mga kamatyonon
aron lang unta pagdasig
kanila sa mga sugilanon
nga akong
natigom

ug ang mga nangamatay
nga maayong pagkahaluna
sa ilang mga lubnganan
akong dagkotan sa pipila
ka mga kandila
silhigon ang mga laya
nga sagbot
ug mangaliya ug pipila
ka mga pangadyeon
alang
kanila

misaad ako
sa pipila ka higayon
ug karon ako
ang nahimong
banggiitang
bakakon

apan mangayo ako kanila ug
pasaylo
duyugan sa gadupa nga
mga kamot
ug galuhod nga
mga tuhod

ang mga patay
nasayod na niini
ug ang mga kamatyonon
kon ila kining
mahibaw-an
kahibalo ko nga ang
ilang tubag
mga pahiyom
lamang

usa ka maanindot nga kabuntagon

pipila ka gabii
wala ako makatulog

ang akong kaugalingon
diay usa ka dakong suba
nga wala magsubay sa iyang
dayag nga agianan

aduna diay kini agianan
usab sa ilalom sa yuta
ug sa ibabaw sa mga panganod
ug wa ko kini sukad makita
sa pipila ka tuig nga
nagpunay ug buka
ang akong mga
mata

katingad-an
nganong sa dihang
nagtukaw ako sa
kangitngit
mas daghan na man
hinoon akog
nakita

nagbasa sa singot ang
akong tibuok lawas
nangitom ang akong
mga kalimutaw
nagubot ang akong mga
buhok

sa pipila ka gabii
nga akong tinuyoan
sakay sa mga pako
sa kangitngit ug
kamingaw

nagdungaw kanako
ang mga anino
sa kahoy
diha sa abri nga
mga bintana

apan dili mo kini
maatikan
kay sa unang pag-abot
sa kahayag
kaligoon ko ang akong
lawas
sabonan ko kini pag-ayo
unya ang akong mga
buhok
akong sudlayon
unya suoton ko ang
mga limpyo ko
nga sapot


dayon inig gawas ko sa akong
lawak
magpaila ako kanimo nga
usa ka
maanindot nga
kabuntagon

magtutudlo sa imong kaugalingon

ang pag-inosara
usa ka banggiitan nga magtutudlo
daghan kag makat-unan
unya dalhon ka niya sa mga
lugar nga ikaw mokurog
ug makulbaan
mosamot kadaghan ang imong
mga pangutana
nga ikaw lang usab ang iyang
patubagon

kon sakto ang imong mga tubag
ihatag niya ang tumang kalinaw
sud sa imong kasingkasing
unya kon matugkad mo pa gayod
ang iyang kalawmon
bation mo ang
kasuod mo sa imong kaugalingon

mawagtang ang mga kahadlok
mawala ang mga lugar nga imong
gilikayan kaniadto

unya makaingon ka sa imong kaugalingon
nganong karon ko pa man lang kini matugkad
nganong karon ko pa man kini
matubag ug sakto

human sa pipila ka adlaw diha sa disyerto sa imong
kinabuhi nga ikaw lamang ang nagtikawtikaw
ugma
andam ka na pagpanaw
unya bisag asa ug bisag kinsa
wa ka nay kahadlokan

diha man god sa pag-inosara
gihadlok ka sa imong kaugalingong anino
kay abi mo ug dili kadto ikaw

karon, nakasabot ka na
ikaw na kini, mas lig-on, unya
magtutudlo sa imong
kaugalingon

7/14/2013

mga panultion sa usa ka kontrabida

ang pagtabang usahay
dili katabang

ang imong gitabangan
misamot kalisod misamot ka laog ug kahakog
gikubalan angduha ka palad
sa sigig dawat anang
imong mga limos

unya kadtong kusog sab mangayo
aron kunuhay itabang sa naglisod
mao man hinooy
mitukob sa imong gihatag
ug didto sa tago durong buhakhak ug katawa
kay nakailad
na usab ug laing unggoy
nga gakurbata

ang mga mangingilad
sigi sab nang simba
ampo, dupa-dupa
maglakaw pa gani nga magluhod
nga gilantaw sa mga
tawong magdayeg kaniya
paingon sa altar
sa santissima

sigi sab nag  han-ay sa mga salmo gikan sa
bibliya
unya sigig wali nga kon "ikaw manghatag
ikaw usab pagahatagan" ug kapili pa pilo-piloon nga mga
balod sa grasya ug mga himaya

apan siya mismo
sulayig subay
wala say gihatag bisag
usa.

7/13/2013

wa ka masayod misulod ako sa imong gahangos nga ginhawaan.

nanuktok ko
miabri ka dayog
sirado nako sa pultahan
nangabre na sab ko
bisag wa ka manuktok

sa unang pag-abri
makita mo ang akong
gisuot nga asul nga
purol ug itom nga
sinina

miyangongo ka
mitalikod ko ug
misulod sa laing
pultahan

nanuktok ka
miabri ko
lain na ang akong
itsura
katunga sa akong
lawas
walay sapot
mora kog
milupad sa tunga
sa balay

mipiyong ka sa
imong mata
diha sa pagsalig
nga ako
usa ka tawo
ug milingkod ko
ug milingkod ka
usab ug imong
gihikap ang akong
nawong

nahilis ko
ug imo akong
gipangita
diha sa nahibilin
nga sapot
sa dili sinaw nga
salog nga
kahoy lamang


adunay laing
pultahan
ug imong kining
giabrihan

naglaom ka nga
atua pa ako didto
bisag hangin man
lang
bisag taya na
lang sa
usa ka gibang nga
sundang

apan wala na ako
didto

wa ka masayod
misulod ako sa
imong gahangos
nga ginhawaan.

ang mga hunghong diha sa bongbong

pagkadaghan sa
buluhaton

pagkagamay sa
panahon

kon makawat pa
unta ang panahon

ug masulod sa
akong kahon

mahuman ko pa
unta

ang akong sulaton
alang kanimo

apan gamay na lang
gayod

ang nahibilin sa mga
adlaw

busa magpabiling
hagawhaw na lamang

ang mga pulong
ug dili na gani madungog

ang mga hunghong
diha sa bongbong

7/11/2013

ug nganong di ko ganahan mobasa ug taas nga balak

nanuktok na ang akong bagag nawong nga
itoy sa pultahan kay gustong molaag

misyagit na ang anay nga gigutom nangita sa
iyang lawog

ang  karabaw itugway pa sa sabsaban ug
ang kanding mimihi na kay gihuktan

ang mga layang dahon kinahanglan na gayod
nga silhigon, tapokon ug dauban aron maasohan

ang mga punoan sa mangga nga namulak na karon
ug ang mga amor seco nagpaabot na aron ibton

busa unsaon ko na man lang kaha pagbasa ang
imong balak nga haskang taasa?

ang mga hugasonon sa kusina nanawag na
ug ang kutsilyong habol nagsiging panakla.

7/10/2013

Medyo....

pasayloa
kay dili ko na ikaw tandugon

tan-ogi ang imong
hilaw

paabota nga kini
mahinog pag-usab

dayon tawga ang
akong ngalan

pakitabang sa hangin
ug mga
dalugdog
ug mga kilat

basin ug ako
mahadlok ug unya
modagan
balik sa imong
mga
paang mibilangkad

mapasaylo mo
pa kaha
ang akong
dila?

sagyad

ANG pulong kanunayng
kuwang

maong ang anaa dinhi sa sulod sa dughan
nagtabisay ang laway
mora sab ug
kuwangkuwang kay lagi
dili niya
masakpan

ang quintessensya sa iyang
buot ipasabot ang ngipong buot niyang
ipaibot

maong
gasakit ang bag-ang sa ganana nga
being

galupad ang ispiritu
luya ang lawas nga nasugapa sa
daghang
jewelries

unfinished business kuno
maoy tattoo sa braso ni
Bruno

MAONG

dili tungod kay aron
imo kong basahon sama sa usa ka
Bisaya
sekondaryo lang kana
apan aron akong mabasa ang akong
Kaugalingon sa
Matag Adlaw
Aron ang akong umaabot nga kahaponon
Nindot aron ang akong kagabhion mas masabtan
pa gayod nako ang kangitngit niini kon dili moabot
ang kahayag
sa bulan ug sa mga bitoon

Maong

Ania ako
nagasulat kanunay
Kanako..

7/08/2013

pagkabugnaw gayod sa tubig

daghang dili masabot
nga atong gisulayan paglitok

ang pagkabugnaw sa pagbati
usahay
dili na masubay pa ang mga
gamot

tiglom na kini sa pusod
sa panahon
ug dili na mkuykoy bisan
unsaon

gisulayan ta kini paglitok
sa usa ka pulong: tubig pananglitan

tubig nga gikan sa busay
nga misubay sa
iyang dalan sa duha ka kiliran

nga bisan unsaon natog tugkad
kon unsaon pagsumpay
dili na gayod mahimong
sumpayon bisan pag karon
nga kita nahigmata na sa
dugayng katulugon

pagkabugnaw gayod sa tubig
nga mikupo sa atong kalawasan
nga nahulog sa atong mga tiilan
nga mibalik na usab sa sabakan
sa giuhaw nga kalibotan

7/07/2013

DIHA SA AKONG GIPANULAT SA PAPEL

ang akong matuod nga
kauban
mao lamang kining akong
pagpanulat

mas duol man god ang akong
kamot sa
mga letra nga miumol sa pulong
ug ang akong mga pulong
mas tinood sa dihang
migawas na kini sa akong
baba

nagpanakla kanunay ang
akong dila
unya ang akong kasingkasing
nga nalipay kabahin niini
gusto untang
gakson ang mga papel....

DIHA SA MIBIYA KO SA LUGAR NGA WALA KO GANAHI

SA dihang mikanaog ko
sa hagdanan
unya gigunitan ko ang
hawiranan

mao lang kadto
ang nahibaw-an kong
matuod,

hugot nakong pagkahawid
aron dili ko mahulog

DAYON akong
gibuhian
midali ko pagpalayo
ug wa na mobalik.

NABALDA ANG PAHUOT NI NOY PAKITS


NABALDA ANG PAHUOT NI NOY PAKITS

sa panulat ni Atty. James F. Lobedica
Capitol Site, Cebu City 

Ang pulong huot talan-awon sa butang nga manghugot. Pahuot, buhat kini nga makatagamtam ug huot. Sukwahi sa talan-awong luag, tugalhab ug magbuka kon dili na huot.

“Manoy, unsa may imong gibati. Sigurado ka? Ato ning ipadayon?” sukna ni Dahlia.

“Day, ganina ra kong nagtan-aw nimo. Nanghugot man gud ang akong gibati. Naglain ang akong lawas. Sa akong paminaw misaka akong kabuhi padulong sa pabawnan. Pero, karon nga nakaduol nako nimo mura’g naalim na man pud.” sa hilom si Noy Pakits, nalingaw.

“Pagtarong diha Noy ha. Ayaw pagluhag ha kay ako pa ning isul-ob. Kaluoy baya nimo oy. Basin ug masakiton ka. Gakag-at ka man lang gud tan-awon.” maampingon si Dahlia.

“Day, ayaw lang tawon ko tawaga’g Manoy. Manakit man pud akong hawak nimo. Ako diay si Pakits.”

Namulong si Noy Pakits. Dala pinugos ang pagpadako sa iyang tingog aron tabunan ang pangedaron niyang wanggit.

“Ayaw pagluhag.”
Nabati ni Noy Pakits ang kalumoy sa kamot sa babaye. Daw gihilantan siya. Mipatigbabaw ang pagduwa sa kanindot sa iyang hunahuna.

Hala Manoy, unsaon man niini. Ayaw lagi pagsige ug lihoklihok. Nakuyawan ka?”

“Ah wala, nakabati lang ko ug pagpanghugot. Huothuot.”

“Sus, sa pagsugod ra ni Noy Pakits.”

Sa tukmang panahon diin mahatagan na unta ug katumanan ang pagpahuot aron makuhaan ug sukod sa presyor ang iyang dugo, sa kalit lang may tingog nga misampit.

“Lo manglakaw na ta. Wala man silay tambal sa pangagod dinhi nga ipanghatag. Kining imong gipuwestohan mao kini ang lawak alang sa mga lalaking magpakapon, mga lalaking dili na gustong makapaanak.”

“Imo diay’ng  apohan ni  si Noy Pakits?” nakapangutana si Dahlia nga usa ka nars ngadto sa apo ni Noy Pakits nga si Tolits.  


“Unswaaa?” nagdali’ng mibarog si Noy Pakits. Nahibulong. Tinuod, sa pag-aninaw pa niya sa palibot, mibad-ay sa iyang mga mata ang karatola. “ALANG SA MGA LALAKING MAGPAKAPON, ARON WALA NAY KAPKAPONON.” (katapusan).