9/23/2013

lingaw-lingaw lang gaw

di ko ganahan anang tigi

ang mga mata sa hurado
morag mga mata ni batman
giputos
sa ilang kaugalingong
pagpihig

dayon ang akong mga mugan
ilang gibutang sa tadtaran
gipino-pino
dayon gisulayan ug luto
unya kon di ganahan
sa baho
ayay! gilabay sa iro

unya manugilon pa nga bisan
ang iro
wa gani ganahing mokaon

ayay! pagkapait sa akong
obra

di sab ko ganahan anang
sukod-sukod nila sa akong
pagkamangihomoon
nga mora bag gisubay nila
kon kining yuta nga akong
gipuy-an titulado ba kaha
kay ug kon wala
etsapwera ka
ug ugma ka na lang kutob
kay ikaw
gayod mopahawa

duha lang ang kapaingnan
ning ilang tigi-tigi:
kon modaog, sikat,
dayon matubuan kag sungay
sa imong kagalot

kon mapildi, ayay!
mora bag giputlan kas imong
liog ug
dayog kamatay!

mas maayo pa ning
lingaw-lingaw lang
hulip sa kalaay
pagsukip sa nipa sa
buslot nga balay
pagtapak sa buslot
nga salog
pagtaod sa hagdanan
nawad-an ug usa ka
ang-ang

pagdakop sa alibangbang
ug dayon paluparon pag-usab
gikan sa palad

paghikap sa buwak ug
pagsimhot niini
sa walay pagbudhi
pinaagi sa pagputol
niini

lingaw-lingaw lang gaw
walay laraw, walay baraw.

No comments :

Post a Comment

Lami ba?