9/28/2015

ang kalubian sa daplin sa
baybay nga
wala na matagad sa pipila
ka katuigan
naghatag sa usa ka talagsaong
kaanyag
sa mga patay nga dahon nga
nagtapok
diha sa lapad nga patag.
sa mga nag-antos
usa ka gikahinamang bisita
ang kamatayon
dili kini makita sa usa ka
bata nga nagdula sa iyang
tirador nga iyang gipunting
sa usa ka pungpong nga
bayabas sa taas nga sanga
diin usab ang usa ka abtik
nga manatad mipatong

sugdan na usab ang mga bag-ong tunob

ning atong panaw
moabot kita sa usa ka kakapoy

unya makita nato ang usa ka
payag
nga biniyaan og didto sa
kilid sa hagdan
mamahulay kita

ikaw manigarilyo
ako mokuyog sa usa ka pangagho

kini ang panahon sa
ting-ulan
basa ang dalan
lapok ang agianan

sa laing bahin
mopanaw na usab ang
hunahuna
sama sa usa ka pak-an
nga aninipot
sa atong mingaw nga
kagabhion

motak-op na usab ang
kangitngit
motimaw ang mga mata
sa kahayag
mosubhan ang ulan
motogtogaok ang manok
matulog ang tuko
mawa ang mga yamog
sugdan na usab
ang mga bag-ong tunob

anaa na usab ang laing sakayan gapaabot nga imong sakyan

ingon ani ang
pagpuyo sa usa ka kinabuhi

wala nay balikay
kon anaa pa man ugaling ang
mga bagakay
wala na ang pagbakay

kon anaa ang sayop nahulog
sa dalan
pasagdan lang kini sama sa
mga patay
nga sa ilang pagtudlo kanato
mas makamao pang
molubong sa ilang kaugalingon
diha sa usa ka
kamatayong malinawon

biyaan ang tanan
ang panaw kanunay nga andam

pagdali sa paglakat
kay sa unahang labat
anaa na usab ang
laing sakayan
gapaabot nga imong
sakyan

walay dahon sa biga

nabag-ohan ka lang
kon ikaw nabalaka kon
asa ang panaw
og kanus-a kini
mahuman

pila ka na ba ka
tuig nga
naglakaw nga
nag-inosara?
nga walay
gibitbit kondili
ang usa ka
taghoy
lamang?

nausob ang
plastada sa umaabot

dili na kini usa ka
babaye nga saya kaayong
miabot sa
suba aron maligo
unya samtang naligo
miawit kabahin
sa nahitabo tali kaniya
og sa iyang
hinigugma kagabii
samtang mitakdol
ang bulan
sa luyong bukid

karon anaa ang
tiguwang nga lalaki
nga naglisod pagtaak
sa lapokon nga
dalan
samtang kusog kaayong
mibuhos ang
ulan

walay payong
walay dahon sa biga.

9/26/2015

ang katsismosa sa hangin

nindot ang
hisgot hisgot sa
bentana
og kanako
sulod sa
duha ka oras
nakong
hunahuna kon unsaon
kaha nako
kining kadaghan
sa buluhaton

wa na nako
maambat pa ang
katsismosa
sa hangin


timbangan

ang timbangan
kinahanglang
ibalanse lang

kon unsa ang
kabug-at sa wala
mao sab ang 
sa too

balak, balaod,
sugilanon og
kamatooran
pako og sungay
langit og yuta
sala og pasaylo
kamatayon
kinabuhi
ayoyok og
buhok
bigote sa bungi
siak ug ginit

ang gugma sa Ginoo diha kanimo

wala gayod
mahutdi og mga
balod ang
dagat

ang iyang kaasgad
wala mawala

wala gayod
mahutdi og kahayag
ang adlaw
ang iyang kainit
mabati gayod
sa atong panit

wala gayod mahutdi
og panaw ang
mga suba
ang iyang agianan
walay kataposan
bisan gani mog moabot
na kini sa dagat
sa laing tampi
nagpaabot na usab
ang laing
agianan

wala mahutdi og
kaanyag ang mga bitoon
nga sama sa mga
mata sa bata
nagkutapkutap sa
langit

ingon ana ang
Ginoo
wala hutdanan

tulo ka kumpas


 i
sa dihang nagdalag na
ang iyang pamanit
sa dihang nabati na 
niya ang kahinay sa
iyang lawas

gihinabi niya si
socrates
milakaw siya 
sa dapit diin nagtagad
kaniya ang
mga mamati

gisugdan niya ang
kataposang tahas
gitudlo niya ang
kabililhon sa kinabuhi
ang hinungdan sa
kamatayon

ang mga namati kaniya
gibati ang
pagmahal sa usa ka
amahan ngadto sa iyang
mga anak

dunay nagpahipi sa
daplin
nga sama sa mga
nagpakahilom
misugid sud sa iyang
kaugalingon

("senyor
ulahi na ang tanan"
asa ka man
diha sa pagbuswak
sa buwak
sa imong kabuntagon,
asa ka man
niadtong kalagsik
sa kaudtohon?)

(adunay babaying
gipaak ang iyang dila
nga midugo
ug dayon niyag
tulon sa 
aslom nga dugo)

ii

kon wala lang unta sila
mataha
diha sa kamatyonon

mosyagit unta siya
aron maghimo og
salida

mangluwa unta
siya sa iyang atubangan
aron
mogawas ang 
matood
aron makita ang
lama sa uga nga
dugo
sa miaging kamatayon
diha sa tunga
sa iyang dughan

iii

apan ang tawo
nga giilad
anaa lang gihapon
ang pagpailob

wala nay pulos ang
mga pulong nga
mahait
sa tawong samdan
nga karon
natumba sa dalan
nagkisikisi
sa iyang kataposang
oras
nagdugo ang baba
nagsimag ang mata
nga mikumpisal
sa iyang
mga sala diha sa
wa mangilabot nga
haring adlaw

duha ka lutsanan

sa kanunay
abri ang simbahan
matud mo

sa kanunay manirado
ang pultahan sa lawak
matud ko

duha ang atong
lutsanan
sa kapit-os sa atong
mga panglantaw

ikaw sa simbahan
ako sa lawak

og kitang duha nanglupad
sa mga pako nga dili nila
makita

samtang nagwali ang pari
samtang ang salog nagpakahilom
duha kitang
namupo og mga katarungan
nangabi sa pagtulun-an
kon unsa ba gayod ang
gustong ipasabot kanato
sa atong kinabuhi

sa akong pagyubit niini
dili mo ako madungog
kay ang mga pulong dili
sama kanato
walay baba, dila og ngipon

dili kini sama sa piniritong
pirit nga gipanugilon sa
atong mga silingan pinaagi
sa baho nga miawas gikan 
sa init kaayong mantika

ako sa kanunay magpakahilom
lamang
sama kanimo
nga kon sutaon diha sa pagsita
mopahiyom ka lamang


dili nako makita ang sulod
sa imong kasingkasing
sama usab kanimo nga 
nagpabiling buta bungol
amang
sa akong kahimtang

ang pagpanirado sa lawak
nagpatubo sa kahilom og kini
sa kanunay namunga og kalinaw

sultihi ako kon unsa ang
unod sa wala sa pari
kon asang dapita sa mga
sacramento sa mga kapitulo
og mga bersekulo sa mga
himno og sa mga awit
sa mga salmo og sa mga
pulong nga wala usab 
malitok dayon, sultihi ako

kon asa ang mga hinungdan
sa atong pagpakabuhi.

hangyo

kon itugot sa
mga bitoon
sa akong
kagabhion
mokuyog ako
sa kalay-on
og sa kahilom

palihog
Langit
pakihulog lang
og usa ka bitoon
aron ipiyong ko
ang akong mga mata

aron mabungat ko
ang akong
pangandoy aron kini
sa ugma
bisan og sa sunod pang
ugma
matinood unta

usa ka haya

wala nimo madungog
ang bag-ong awit sa tamsi
sa may sanga sa bayabas
tupad sa mga pungpong
nga hinog niini

wala nimo mabati ang
bag-ong kabugnaw sa 
hangin nga milatas pa
og mga kabukiran
aron lang modapat sa
imong aping

wala nimo makita ang
talagsaong kahayag nga
gikatag sa adlaw gikan
sa duha ka bungtod didto
sa unahan

nindot ang paglatag sa
kahayag diha sa dughan
sa kabukiran og sa 
paa sa mga kapatagan

wala kay nadungog wala
kay gibati wala kay kahingangha

nahisama ka kang monica
nga gihaya didto sa gamalinda.

paghimamat

gakubakuba
ang kasingkasing
sa dihang
migawas ka sa
pultahan samtang

ako ania
nagpaabot sa gawas
alang sa
atong
pakighimamat og

sa dihang gitunol mo
ang imong kamot
sama sa usa
ka pahiyom gidawat

ko kini og karon
ania kitang duha nagkuyog
sa usa ka lakaw
sa usa ka kagabhion
sa atong kinabuhi

pagkadako gayod
ning kalibotan
samtang ang mga bitoon
walay kakapoy
diha sa iyang
kahayag

9/25/2015

panahon

tungod sa kataas pa
sa panahon
wala nato gibuhat ang
angayang
buhaton

sa dihang wala na ang
panahon
wala gihapon nato mabuhat
ang angayang buhaton

apan bisan unsaon
diha sa pagkatuali puhon
ang sal-an mao 
gihapon ang
panahon

sobra, kulang,
ang panahon

pagsandurot

dili malikayan nga makapangutana ko kon
nganong wala ninyo ako giapil sa inyong kalihokan

adlawan ni mitos, kamo kamo lang ang nagsalo sa
bam-i, inom sa beer na beer, hulagway sa lechon

sadya kaayo ang inyong mga dagway, durong katawa
si Chandri, gituboy ni Audy ang baso sa pula nga bino,
tupad ang tambok nga nawong ni Louise sa nagtangag
og mansanas nga lechon,

lisod pod segurod ipamugos nako ang akong kaugalingon
diha ninyo, pero sa kadugayan nahunahuna nako nga basin
og dili lang gayod ako mahiuyon sa inyong kalihukan

ingon ana gyod seguro, dili magsandurot ang hulmigas og
ang pabo, ang it-it og ang uwak, ang manok og sawa.

sagdi lang, ania ako, wala gihapon mabugkag, wala matabas,
nagpabiling tiunay sa akong kaugalingon, usa batok sa tanan.

9/24/2015

kalayo

giilad kos
dakong kalayo nga
imong gitukod
sa tungatunga sa
lawom nga
kagabhion

gihimo kang
maanyag
diha sa nagdilaab
nimong
buhok og lawas

misugsog kos
kalayo
gisimsim ko
ang kainit

human sa dakong
dilaob
kalit kang
nawala

sa tiilan sa pagbasol
ako ang 
abo...

9/23/2015

paghubad sa mga damgo

kon magdamgo ka
ug bitin
dakong suliran ang
imong karon

kon ang pagsigig tubag
sa usa ka pasulit 
dunay usa ka parte sa kagahapon
nga wala nimo 
mahan-ay

kon mahulog ako sa pangpang
nawala na gayod ang akong
pagtagad sa kaugalingon

kon maglangoy ako sa lawod
sa dagat
nawala ako sa akong tinood nga
adtoan

kon anaa ako sa usa ka linaw kaayo
nga lanao
tungod seguro kana kay sa kaadlawon
anaa gihapon ikaw 
tupad kanako

kitang duha wala nay habol diha
sa kabugnaw sa kaadlawon

diring dapita

mas malinawon ang
atong pagtinalikdanay sa usa
ka higdaanan

mas ganahan kos akong
nakita diring dapita

damgo

damgo sa halas nga mipaak sa akong
kumagko
human ako nahulog gikan sa pangpang

damgo sa usa ka tigmo nga wala nako
matubag
sa akong gukod sa kahayag

damgo sa akong pagtiglom sa dagat
sa pipila ka oras

kon mahigmata ko diha sa nagkaduhingos
nga singot
molargo kog adto sa kusina
hutdon ang gisukad nga pamahaw ni
mama

kon unsa man ang kagahapon nga sama
sa hukot nga dili nako matangtang
sa akong kakapoy
ako kining gibiyaan

patay nga halas, dagat nga lawom,
wala na ako mangilabot pa kon unsa ang
dangatan sa ugma

tagolilong

adunay kahaw-ang nga dia sulod
kanako
nga dili gayod nimo mahikap
kay ug imong hikapon
kon imong masakpan ako
mahimong tagolilong

nga bisan ako dili na usab makita.

manununod

kabalo na ko
nganong si Blues
bisag mapiit iyang tiil
dili motingog


apil na si Gladys
nga bisag kusion
dili gyod mosyagit

liwat sila sa ilang
Papa nga dili na motingog


sa ilang Mama
sa pipila na ka tuig nga
nanglabay

alang kanimo nga dili mangilabot gayod kanamo


pagkadagko sa mga balod sa dagat
morang kadak-a sa imong balay didtos
sta maria
nalisang ang mga pasehero
apil mi
gipanglabay ang ubang mga karga
sa dagat
misarasay ang dakong barko
hapit di makabalik sa iyang lugar
maygani kay gibuligan pa gihapon kini
sa maayong kapalaran
durong iyak sa mga bata
ang mga babaye nagkabuang kon unsay buhaton
ang mga tigulang wala na naningkamot kon
unsaon pagluwas ang kaugalingon
ambot unsang swerteha nga kalit man lang
miundang ang kusog nga ulan og hangin
og ang mga balod
nahapsay man nga morag plantsadong
kamison sa
dagat

gisulti ko kining tanan niining akong gisulat
unta alang kanimo
apan dili na kami manugilon niini
kon magkita man ugaling kita

bisan kanus-a wala ka gayod nahimong
apil sa among kinabuhi
dili namo malimtan ang imong mga pulong
kaniadto
nga ikaw walay labot kanamo

kon nalunod pa ang barko og kon kami sumala
sa among kapalaran
mawala man ugaling og dili na gayod makit-an pa
dili namo igsapayan
nga ikaw wala gihapoy labot sa among
gidangatan

busa kon aduna ka may maayong nabuhat o
nahatag sa among kinabuhi
dawata lang  usab ang among pasalamat
kon sa usa ka higayon
mabasa mo kining akong balak.
giandam na nako
ang tanan
ang akong kaugalingon
ako na nga
giunag lig-on

ugma kon adunay
sunog ang mahitabo
sa atong balay nga
gipuy-an
dili nako sugpoon ang
kalayo
pasagdan ko kini nga
mokaylap
hangtod maugdaw ang
tanan

iphon ko ang mga aligato
tapokon ko ang mga abo
hiposon ko ang mga
agipo

gipanagna na ang akong panaw
ang pagbalhinbalhin nga
walay kataposan

miingon ang mananagna nga
ikaw
dili na gayod mokuyog kanako

mao kini ang akong pagpangandam
lig-onon ko ang akong kaugalingon
og sa sunod nga hugna sa akong
panaw
kauban ko na ang mga alindanaw

dili na ako motoo sa pasalig
nianang balay
nianang hardin
nianang atabay

halad alang sa kalamposan


mga buwak nga
bungi
mga pagkaon nga
pan-os

sobra sobra sa
langaw
gikulinitan sa
mga ulod
gipasagdan sa
gatigmi na nga
mga bakukang

bisan gani ang
mga lagong
nga gikan sa karbon
giyam-iran

samtang gipagawas ko ang akong

hugaw

mihigda ka sa katre mitutok sa kisame


gibungolan mo ako sa tumang kahilom

dili nako ikalimod nga miabot na ang panahon

nga unta ako usab manudya


gidamgo ko ang laing panimuyo

ang palasyo sa layong panganod

ang kabayong pak-an ang karwahing 

bulawan


ayaw ako ug hulgaa nianang imong mga luha

bisan gani ang yuta dili naman madutlan

kon sa kusog nga ulan siya mabasa....

alang sa mga damgo nga
wala makab-ot
gihalad ko ang akong
mga bag-ong
kamot nga karon
nagsugod na og hawid
sa mga
tag-as nga kuhit

alang sa mga bayabas nga
hinog
nga wala nako maabti sa
iyang punoan
nagpasalamat ako sa mga
batang sipat nga abtik kaayong
mikatkat sa labat

salamat usab sa mga kwaknit
nga naghatag og kisaw
sa akong kagabhion nga
malinawon

9/22/2015

ang pulong nga unta
wala nako masanta, kanunayng gibasol ako sa unta,

unta siya na unta, unta kaming duha na unta, kalipay na unta,


unsa kaha? dili kaha ako madugta? dili kaha siya mangluwa sa akong sapa?

unta nakuha ko na ang lawa-lawa unta nakab-ot ko na ang langit, unta unta unta....

apan hinoon, buhi pa man gihapon ako bisan sa mga unta.

tul-id nga dalan, oo, wala kaayo ang gabunok nga buhawe nga kalipay,
apan wala usab ang tsunami sa kaguol, oo, wala ako nabuthan sa hubag,

apan wala say nana ang akong dughan, wala sab ang lama sa akong sala,
wala ang mantsa sa nangka, wala ang tusok sa tunok,

ilabay ko na ang mga unta.
gunitan ko ang kini og kana.
wala nako nakaplagan
ang akong gipangita, ako

ang mabasol nining tanan,
kay kon unta, kon balikan nako, ako

kon wala lang unta nagpataas sa akong
kuko, mahikap ko na unta pag-ayo ang akong

gusto, akong gihagpat pagbalik ang kagahapon,
atua na siya, gihagpat pa nako ug dugang ang mga dahon

sa kalamunggay, atua na pod unta siya, andam mogakos kanako,
apan, nahadlok man lagi ako basin bakak siya, og basin ako usab laing bakak

busa, gipasagdan ko lang ang tanan, samtang ako, naglingkod sa hagdan, milantaw sa tanang
nanglabay.

naghinuktok ko karon sa bintana, milantaw sa nanglabay, nangagho, kon ngano ba kaha nga ako wala man gayod mitoo?
ang mga mais
daghag dalunggan

ang mga isda
nagtukod og
eskwelahan

mikatawa ang
hippotamus

miiyak ang buaya
atubang sa pitaka
ang mga lagyo
walay kasubo
ang mga dug-ol
anaa ang kapuol

maong karon
ikaw sa wala
ako sa too
kon kinsa ang
tunga
ako na kana

mga aninipot

usa ka hugpong sa
aninipot sa kagabhion
sa kanipaan
nagagilak gilak samtang
ikaw mibugsay
sa atong sakayan

ang mga kamingaw sa
bakhaw
takulahaw

hangtod kanus-a kaha
matantang ang tungaw
ang karapata sa itoy
ang kakatol sa suntoy?

hangtod kanus-a kaha
mawa ang panganod 
sa ayoyok ning bungtod?

hangtod kanus-a kaha
mawa ang sulog ning
atong luhaang walog?

hangtod kanus-a kaha
mawa ang kitik sa patik?
ang uwang sa iro ang
aw-aw sa kagabhion?

gidamgo ko gihapon ang
linaw sa lanaw
ang kasuod sa yamog
sa dughan sa dahon

9/21/2015

oi, alas singko na man diay
wa na ta masayod sa pipila ka lugas
nga oras nga nangatagak
sama sa mga dahon
nga bisag dili pa laya
gidagit na sa kusog kaayong hangin,

naunsa na ba kita? ngano ba kaha?
unsa bay pulos sa atong binuhatan?

mauga ang suba, malaya ang mga dahon,
maputol ang mga sanga, makubit ang isda,
mapalid ang mga panganod
mobalik ang gabon, mokurog tas kabugnaw,

gipangita mo ang kadena, ang sumpay
sa pusod, ang tanod sa kinabuhi,
ang mga ulat ang mga samad,
ang bunga sa adlaw, ang gisi nga walay
tahi, ang rason

kay ngano nagamit ba ang lohiko
diha sa atong mga kinaiyahan?

9/20/2015

ang mga nangahulog
mga nangausik
mga milikay sa
panagtagbo
ang mga dili na
mahawiran
ang mga nanglusot
sa imong tudlo
ang mga naluwa na
ang gisuka
ang mga nawagtang

biyai, kalimti,
dili para imo kadto
kanimo makadaot
biyai, kalimti,
sa lugar nga giandam
alang kanimo
ginadili na ang paghandom

halad sa atong kaulag

ang layog mong
sampot
anaa milakra lang
gihapon sa
katre nga tugas

diha diha sa
tunga nianang
alugnan
nagpabilin ang
handomanan
sa halok nga wala
midaplas sa
imong aping

diri sa akong hunahuna
ania pa ang huni sa
sa habol nga imong 
giwakli
sa gaaso mo nga lawas

init ang imong mga kamot
nga mibira sa akong
mga bukton
paingon sa gabilaab
mo nga pus-on.
pila ba ang kamaong
mosuwat? gamay lang
apan sa gamay nilang 
gisuwat
daghan ang nayagyag

daghan ang nangahulog
sa gamay kaayong
sudlanan og busa
ang mga bunga anaa
nagpasad sa dalan

nga  ug kon dili kini puniton
bisan na lang gani sa mga
gutom og bulingiton nga mga
bata sa kadalanan

mangalata kini
manimaho
amagon
mangawala sama lang
gihapon kanato kita

nga nagtoo nga sa atong
pagsulat moabot ang kahayag
madan-agan ang kagabhion
ug dayon makita ang mga
anino sa kalangitan didto
sa kilid sa kabungtoran

pila lang  ba ang makamaong
mosulat
ang makamaong mosulti sa 
matood
ang gustong masabtan ang
tinood ug tinood lang gayod lamang?

wala ako maapil niini

kon imong basahon ang akong gisulat
usa lamang ako ka dayo nga nagpalabay
sa akong kagabhion diha sa daan og
gubaong balay
nga hagbay rang gibiyaan sa mga
tag-iya 

niining higayona
gipabati ko lang ang mga lumalabay
wala nako handoma ang matood

kay kon matood man ugaling kini
magpabilin kining matood bisan pa 
og gisulayan ko ang
nindot kaayong pagpamakak

ang mubo
mitindog
gustong
kab-oton ang
langit

ang tambok
midagan
gustong gukdon
ang 
kahangtoran

ang niwang
misuksok sa 
gamay nga liki
sa kahayag

ang taas 
miduko
gustong muyokbo
sa gaugdo nga
kabilin
sa kabayo

ang taas ug
suwang
nakighinabi sa
ikaupat nga
pagsubang
sa bulan

ang dakog
apapangig
nakigdulag
tikigtikig
didtos gubang
kamalig

ang pikot ug
mata
gilumping ang
mga lata
nga gihipos
sa daang 
maleta

ingon ana
lang
ang pagbansay
magkadugay
magkabagay
ang tiunay diha
sa buak nga paak
sa usa ka lambay