10/31/2015

ang mga pungpong
kawatonon

kon dili madala og
katkat

ilang bun-on, og
didtong dapita

mibidlisiw ang
kalooy....
ambot ug ngano nga kon imong
tinod-on ang balak mawala man
sab ang iyang pagkabalak,

dula-dula lang ang tanan maoy
ingon sa bata nga bus-ok kaayo
ang kalipay sa dihang milupad ang
shatong human sa maayong
pagkaigo sa bunal...
si mayang
kanunayng makadungog
matag buntag
sa awit sa tamsi nga pipila
na kagabii
iya untang kitaon aron
sutaon ang pagkamatinooron
sa maong huni,

kanunayng apiki ang panahon
paspas ang mga oras
kanunayng manira ang bentana
nga nag-ung-ong sa
dagat

ang punoan sa bayabas napuno
sa dahon
unya sa silong niini sa tunga
sa sanga

atua ang salag.
ang buhok sa bayot nga
kabayo
gipataas sa iyang amo
nga henete nga dako kaayog
pagmahay kaniya
sa bag-o pa lamang nga
nadawat nga kapakyasan,

mitaas kaayo ang buhok
apil na ag sa iyang ikog nga
mitabon sa manggiulawon nga
bunal og kuyos kaayo nga itlog
usa ako ka dakong bato sa dagat
nga gipas-an sa pangpang
nga kanunayng nagpaabot sa
hangin gikan sa halayong dapit
nga wala pa sukad maabot sa mga
pako sa tukmo

sa akong paghibalag sa bulan
miingon kini sa kagabhion nga
ang akong kilid morag lumo sa
baka nga giihaw kaniadtong pista
sa balangay nga dakog pagmahay
sa iyang gidangatan

" dili siya hingpit nga bato,
ayaw siya kalisangi sa iyang
katig-a", gitubag mo ang adlaw
nga naglatag sa iyang kainit
didtos kabukiran og kapatagan

walay motoo kanimo, ang mga
kakahoyan pinaagi sa ilang mga
gamot, nagpabilin sa ilang mga
nahibaw-an

ang ulan miangkon nga sa liki
sa maong bato mibuhagay ang
tubig nga ilimnon sa mga kabaw
og mga karnero

ang tiki nga pak-an nga mas
nakakita sa kamatooran naghisgot
sa dugo nga mibanaw sa agtang
sa batong gamhanan, apan unsan
man kini niya pagsugid?

putol ang iyang dila unya ang
iyang baba wala may pultahan
ang bangaw nga miabot
kagahapon didto's akong baybayon
usa ka entrada sa akong kabuntagon

sa kilid niini anaa ang barko nga
mibalik sa iyang agi
misulay og liso sa iyang lubot aron
matunong ang iyang ulo sa iyang
saktong padulngan

linaw ang dagat unya ang mga balod
morag mga batang boutan nga 
mibalik sa ilang inahan nga nagtagad
sa kahaponon

ikaw nga misalom mitunga dayon
ingon ka nangita ka nako
nag-inosara kong mitagamtam
sa kalami sa sashiming  salmon
sa rai-rai,

kasagaran ning mahitabo samtang
milantaw kos mga nanglabay nga
sud sa akong dughan
kanunay ko usab nga gihusgahan

(unya ko na iasoy ang tanan kon
andam ka na sa pagdawat nako)

ang tanang tawo baya pareho ra
diha sa kalaog diha sa way laing
gihunahuna kondi ang kaugalingon
lamang,

gisabot ko na kini isip usa ka
tulumanon, apan

abi mo , sa dihang milabay ka
sa akong atubangan nga wa ka
kabantay nako

nakanganga ko, unya dunay
naghunghong nako nga kana siya
ayaw usiki,

unsa ka? bililhong bato o
balaang liso?

balaang luna

dinhing dapita
ayaw paghisgot og kayat

ginadili ang atngal
labi na ang totoy

huboa ang imong
sapatos
sandalyas o
tsinelas

kay dinhing dapita
balaan

lantawa ang kalayo
nga dili mapalong sa
hangin

10/30/2015

sa akong nahibaw-an
ang tanang anaa dinhi
naay gamit,

kadto kunong nagtindog
lang unya walay gihimo
gawas lamang sa pagpaabot
nanerbesyo usab

kining akong duha ka totoy
duha baya ka isla sa akong
dughan
naghatag og kalinaw sa
duha ka rayna
nga karon nagdumot sa
usag-usa

og kining akong ikog
nga mubo
dili pod makaabog og
langaw
apan makamaong maghimo
ug bangaw

kalag-kalag

samtang gilantaw ko ang mga
kandila,
nahinumduman ko ang mga
luha,
kadtong lugar nga kaniadto
di ko na gayod 
gustong balikan, kadtong mga
maoton, 
misaad ko kaniadto nga dili
na gayod kini mausob pa sa
akong kinabuhi,
nga dili na gayod mahimo pa
kini kanako,

pagkahilom sa pagkahurot, 
naghatod kanako balik kanako
mga matang nakakita na
sa kabag-ohan,

usahay dili ako sakto, kadtong
lugara adunay halaman, adunay
mga tiguwang,
dili baya pod sila laog, o
nagtuyo nga ako pasakitan,

nadungog ko ang hunghong,
"lantawa kuno ang imong kaugalingon?
naunsa ka ba karon?"

kon wala pa sila didto, mahimo kaha
ang ikaw karon?

napalong na ang mga kandila
nahurot na sila sa ilang mga luha

sud sa langob ning dughan
miabot ang hangin dala ang kahayag

10/26/2015

juan, palihog daw bi
himoi kog balak, kanang
morag buwak nga mikatay
sa labat,
nga naghimog entrada
paingon sulod
sa balay nga

malipayon, unya pakapini
og mga aninipot sa lalom
nga kagabhion
nga nag-alirong sa kahoy
nga kamatyonon,
og kon mahimo pa nimo
palihog og dugang sa
bugnaw nga hangin nga
imong isulod diha sa bentana
nga kanunayng nangabre
nagpaabot
sa awit sa kaadlawon
nga misaad sa adlaw nga
bulawanon

10/25/2015

ngano kaha nga
hayahay man ang
pamati bisan ikaw
lang ang anaa
naghandom sa mga
milabay nga sakit
pa kaayo
apan kadtong dakong
bukid nga imong
giatubang nga
nag-ambo sa lapad
kaayong dagat
dayon gipayongan
sa mga panganod
mora mag nakaluag
sa imong dughan
unya ang hugot
kaayo nimong kwelyo
wala na
naghatag og
kahasol kanimo

nakita mo ang nawong
sa kalibotan
malinawon gihapon
wala kaila kon unsa
ang kasakit
BALAK SA TIKALON
apan lagi kay ang akong
pusod
gitagkos man ni nanay
sa bongbong sa among
balay didtos
Olingan
na, bisan unsa pa kaanindot
ang iceland
ang denmark ang austria
pati na gani ang romania
og bulgaria
pastilan, ang kamingaw nako
sa amoa
dili na gayod maantos maong
gikalimtan ang
mga sausages og beer sa
Munich
ang salad sa salzburg
ang di masabot apan lamiang
pagkaon sa Sofia

gihandom pa gihapon ang
barbecue sa bacolod ang
inun-nan sa dipolog ang
lechon sa cebu
og dayon mas migwapa ang
pilipinas
mas humot og mas lamian pas
kagubkob nga chicharon
ayaw pag-atubang sa
aso
kay maglisod kang
ginhawa
ayaw hikapa ang kalayo
kay dili ka kaldero
ayaw pagtanga kay dili
ka statuwa ni joxe
hiposa ang imong pahiyom
kay dili ka si mona
kon mahimo
pagpabilin nga ikaw lang
kanang dili laing tawo
kay mas tinood ka unya
ang tinood, kabawo ka,
matahom kanunay
ang pagsayaw sa
huni sa kabuntagon
ang pagpasalamat sa
labawng Makagagahom
ang pagbati sa kabugnaw
sa hangin nga kaganina
milalin
ang pagtagbo sa adlaw
sa usa ka pahiyom
ang pagdayeg sa lamian
kaayong pamahaw nga
giandam sa imong minahal
mao kana ang wala
kanimo karon....
nagtoo ka nga
dakong sayop ang karon
nga kinahanglang
daghan pa gayod kaayong
usbon
nagtoo ka nga wala buhata
sa mga nauna kanimo
ang angayng buhaton
gibasol mo sila sa kalisod
sa mga nag-antos
gipanghimaraot mo ang
mga gamhanan
gusto nimong tay-ogon
ang atong gisakyan
aron mangalunod kitang
tanan
aron daghang malumos
og mamatay

apan bisan pa niini
ako pa gihapong giampo
ang mga masaaron
diha sa imong
kabatan-on
andam pa gihapon ang
pipila ka sako sa bugas
nga sarang lung-agon
alang kanimo Ondoy...
ang ilang katabang
dugay na kaayo nila


katabang pa kini nila
sa ilang lola


all around, mogarden
moluto, modaro pa gani

karon maoy iyang
caregiver kay lagi wa

man siya maminyo unya
wa sab siya's bisag anak

na lang sa gawas, nga
unta moatiman kaniya sa

iyang katigulangon.
unta di ko motoo anang

forever. Apan naa pod
diay. Forever ulipon.
balak nga aslom
sa hinay hinay
giabis niya ang manggang
hilaw
pino nga slices
dayon iyang gitusnob
sa mawos kaayo
nga ginamos
dayon niyag hungit
sa iyang baba
unya lami kaayong
lantawon ang iyang
ngabil nga
nabinlan sa basa
sa una

ug sa dihang giusap
niya ang mangga
og iyang gitulon
nahulma sa iyang
mga mata
ang aslom kaayon
pahiyom
lipay kaayo ang tindera didtos
reykjavik
nga nakadungog sa among
pagbinisaya
dugay na diay siya sa iceland
naminyo, nanganak,
naanad na sa kabugnaw og
kamingaw
kitang mga pinoy, labi na ang
mga bisaya
kon magkita sa gawas
grabeng magkahinangpanay
morag mga gansa sa kasabaan
ang kakusog sa katawa diha dala
sa kahinangop morag bojong
sa bohol, unya di na kabantay
sa paglabay sa oras
maong nabyaan na intawon sa
bus...
didto sa museum sa sofia
samtang naglantaw mis mga
bulawan nga kalaha og mga
kopa sa bino nga giadornohan
sa mga dyosa og prinsesa,
sa siging libot-libot nagtagbo
ra gyod ang duha ka bol-anon,

kadtong usa naminyo nag
bulgarian, unya kadton usa
naminyog kano, nga karon
puros mga turista,
nagsugod sa pahiyom, kay
morag parehog barong og kolor
dayon miingog, "pinoy ka?'
dayon asa ka sa pinas? ah,
sa bohol ko, ah, ako pod sa bohol,
kaila ka ni Nonoy kadtong
negosyanteg bugas sa jagna?
ah ako tong ig-agaw, ....
mitaas ang estorya, haskang
lipaya, unya ang tour guide
nga siging explain sa ilang
civilization nga kurat, ...
miyam-id sa kasaba, wa kasabot
kon unsa ang kalipay sa duha
ka bol-anon nga kon unsang palara
nagkahibalag sa Sofia.
kon ang imong
ginabuhat sumpay sa imong
pusod
nan, kon giputol man ugaling,
pangitaon gihapon kini
sa naputlan,
dili man god kini malimtan,

apan dunay mga butang nga
sumpay sa atong
kasingkasing og kalag
ba kaha, nga
kon putlon man,
seguradong ato kining
ikamatay,
maong kadtong miuna sa
paghawa, kon mahimo atong
sabton,
naputlan lang intawon, maong
wa kasugakod.

10/23/2015

gipapili siya
sa kaalam o
salapi

gikuha niya
ang wala pa
diha kaniya
kaniadto
gihandom ta ang pag-abot
sa kagabhion

anaa ang panagkita sa duha
ka nagkahinigugmaay
sa silong sa kahoy
nga gitagboan usa sa
nagpista nga mga aninipot

ang matag gutlo sa pag-abot
sa kangitngit
naghatag og awit sa kahinam
unsa na pod kaha ang
mahitabo sa gugma?

karon ang kagabhion
mao ang pagpahira sa mga
bentana
ang pagpalig-on sa mga
kandado sa mga pultahan

anaa ang kabalaka
dili sa mga wakwak sa hunahuna
dili ang pagpanghadlok sa
mga pungak

mas gikahadlokan na ang mahimo
sa mga tawong
sa ilang dalan misimang
diha sa pagbuhat sa mga
daotan

ang anino sa punyal
gihayagan sa bulan
ang pagboto sa mga pusil
gikurogan sa mga ngabil

wala na ang gugmang
gisilip sa mga bato sa sapa
wala na ang kahinam sa
mga awit sa gangis
sulod sa atong kagulangan

pagpahinumdom

mas nindot ba gayod
kaha ang mga
nakatalikod?

mas balaanon ba kaha
ang wala pa nato
makita?

ang mga dayag usahay
labian ra kahayag
busa kini sila
nakapabuta kanato

anaa ang nawong sa
usa ka babaye nga gitabonan
sa seda nga panapton

anaa ang iyang lawas nga
gihabolan sa banagbanag
nga mas nakatugaw sa
imong malinawong kasingkasing

unsa ba ang naa sa likod sa
adlaw
unsa ba ang gitipigan sa
tibuok nga bulan?

anaa ang wala nato sukadsukad
gisugilon
nga bisan sa atong pag-inosara
dili nato malitok sa atong
kaugalingon

dili ba kini ang mga katarungan
sa atong laing pagbangon sa
sayong kaadlawon?

anaa ang atong kahibalo sa wala
pa nato mahibalag
dili ba kini ang magtudlo kanato
sa saad sa atong padulngan?
dili man unta
makalakaw
dili sab pak-an
busa dili
makalupad

gigapos siya
sa bato
sa hagdanan
sa baybayon

sa kilid sa
suba
sa gamot sa
mga kahoy

gamhanan nga
lumot
ang tanan napandol
diha sa kalimot

sa mga gugmang giatay

ang tanan nakong
makita sa palibot

ikaw, ikaw lang
gihapon

milakaw ko
nagpahilayo apan
ang akong makita
didto

ikaw, ikaw lang
gihapon

gusto ko ikaw nga
mahikalimtan
apan diha sa kalimot
ikaw lang gihapon
ang mahinumdoman

buhi ka
ang akong gilubong
sa kalimot

hangtod karon
wala gihapoy gahom
ang kalimot

walay hari
nga mopatay sa iyang
gihigugma

ikaw, ikaw lang gihapon
og ako ang imong
ulipon

10/20/2015

huez

mitutok siya
dugay
bisan sa layo
nakita niya
ang iyang nawong
sa mga
mata sa naglaray
nga mga
piniriso nga
naghandom nga
mahuman na ang
ilang dugay na
kaayong mga kaso

naglamog ang
kaguol og ang
kahadlok

didto sa kalimutaw
sa kamatayong gaungaw
siya mao ang kagaw

sistema sa hudikatura

walay paniudto ang
mga piniriso
samtang ang korte
nagtuki kabahin sa
ilang mga kaso

miantog ang fiscal
misirko ang PAO
gikab-ot ang langit
gilukot ang hangin
gitago ang kahayag
gikumkom sa palad

nagtanga ang huez
nanawag ang mayor
apil ang gobernador

apil na si san pedro
ang iyang manok kuno.



hulmigas nga
gamay
nga pulahon nga
mikamang
sa salog nga mibitad
sa lugas nga
asukar
nga hilomong
mitultol sa ilang
balas nga
palasyo nga dili
sama kanimong
walay undang sa
pagnegosyo
dayog bagotbot
sa usa ka
impyerno

10/19/2015

sng ihugas sa hugaw dili tubig

kon himoon ko ang
alom
ibutang ko kini
taliwala sa imong
agtang

aron dili lang kini
alom,

kon iputak ko man
ang matood dili ko lang kini
nako ibungat
kanatong duha

mas maayo nga kini
ipanugid ko sa taboan diin
kini madunggan sa tanan

kay dili lang kini kamatooran

adunay gamit ang tanan
dili lang sa gibutangan

gusto nako ang ang alom
mahimong isla diin
ang magpuyo maghinigugmaay

og ang kamatooran
unta mahimong usa ka dakong buhawi
nga mobanlas sa kadaghanan
mobaha

og sama sa kaniado pa
dili mahimong walay mamatay
adunay mopatay
adunay mapatyan

kay suma sa kinaraan
ang ihugas sa hugaw
dili tubig....

reykjavik

sa ilalom
ang kainit
sa ibabaw ang
kabugnaw

puto, tira-tira
bibingka
bikong gilatikan
ang imong
yutang natawhan


10/18/2015

romania:kabahin ni dracula

wala man diay
bangkil

wala say dugo
nga mainom

nindot lang
ang sugilanon

dili ganahan ang
katawhan

nga kini wagtangon
usa ka sugilanon

bali

nabali na ang
panahon
karon asa ka man
mikapyot?

sa akong kamot nga
tubig
sa akong abaga nga
hangin

nganong
gibali mo man
ang panahon?

gimahal ko ikaw
ang imong larawan
mao lamang ang akong
gibalikbalikan

nabali na ang panahon
mas tinood ang larawan
mas malipayon ako
kon wala ka na

giwalis mo ang saya
nakita ko ang tanan
unsa pa ba kaha ang
akong basolan?

kadtong nagbasol nganong wala gikuyog sa unos

nganong gibiyaan mo ako?
hunat sa isla
sa usa ka dakong unos
nga kagabii pa lamang miabot
unya
sa kaadlawom
mibiya,

gubot sab ang isla
adunay giputlan sa liog
gibalian sa tiil
batang gilumsan
dalagang gilugos, kinsa

ba ang dili ganahan mokuyog
bisan sa unos
dinhi?

bisan gani ang bungi
wala na kabungat sa iyang
pahiyom

10/17/2015

kon natuali man
ang kolon dayon
kabuak

wala lang kini

dili nato sabton
nga natapos na ang
kalibotan sa laing
kolon

daghan pang kolon
ang matuali og
mabuak

dili na kahadlokan

si Tikboy

ang iyang tubag mao nga
nanobra ra kuno ang mga lingkoranan
busa
gipamaligya niya kini apil na ang mga
karaang baso
kutsilyo
tinidor og kutsara


ang halin kulang ra aron mabalik
ang kaanyag sa salog ning balay
nga imong gibiyaan

ang mga kurtina kuno daan na
busa giapil kining dispatsa

naglingkod ang imong sinaligan
atubangan sa dagat
niadtong gabhiona sa dihang bag-o
pa lang mitibuok ang bulan

nag-inom og kape nga daghang
asukar
nagpabulhot sa iyang paboritong
marlboro
nga mora bag iyang gipaulit ang
gamayng kalamdag sa langit

sa dihang nawa ka na

wala ko na nasimhot
ang kahumot sa adobong baboy
wala na mitubo pa ang
siopao
ang mga misetera sa gawas
sa balay
sa kilid sa mga bintana
og sa pader
walay mga buwak
mingaw kaayong pamation ang
kahilom sa mga kahoy nga
wala nay mga dahon
ang mga kapayas sa kilid sa labat
kalit lang nga nangalata ang
mga gamot
dayon nilag kahapla
sa gauga nga yuta

gipangutana ko ang
kamanghoran mong anak
dayon niyag pasumangil
sa hukom sa langit

laag-laag

milupad ko gikan sa manila
paingon sa doha
tugdong sa reykjavik
laag
lupa na pod sa
copenhagen
latas sa  munich
baktas sa salzburg
hangtod na sa croatia
serbia
lapos pa ganis romania
hunong sa bulgaria
lupag balik sa doha
hangtod miabot sa manila
balik

sa way pabor-pabor
dabest gihapon ang
barangay dos
sa akong katipunan

hinanok akong katulog
sa duyan nga uway