12/15/2015

balak alang sa mga panganod

ang mga panganod
sa kanunay naglaag-laag
sahay mohapit sa bungtod
mitambay apan
dayag sa iyang pamatasa
dili kini magdugay

karong adlawa sa imong
pagbisita sa halayong bukid
sa payag nga sama nimo
usab nag-inosara
nakita mo na usab sila
ang mga lutaw ang mga laagan
ang mga dili magdugay nga
sa unahan morag mga
nangahilis nga
yamog diha sa dahon silong
sa kabuntagon inig abot
sa mga gihay sa
adlaw

manampiling ka sa bentana
ning pagputol mo sa hinay nga
pagkamang sa panahon

unta nahisama ka sa mga panganod
igo lang molantaw sa kalibotan
dili magdugay
mosimhot sa makadyot sa mga
kabuntoran
dayon og pahawa
nga dili gani magsaba
walay panamilit
walay kawili
walay gibilin og usab
walay gidala bisan unsa

No comments :

Post a Comment

Lami ba?