naghisgot ka man god
og lasang
wala sa atong plano
milabay kita sa lasang
mibalik
gilantaw ang daghang mga
kahoy
og nanganaog kita sa
sakyanan
aron sudlon ang gusto
natong mahibaw-an

misulod kita sa baba sa
lasang
gisubay nato ang iyang mga
tinae 
nangawala ta sa nagsanga
nga dalan
og sa atong kakapoy
namahulay kita lingkod
sa dakong gamot sa
habog nga kahoy

mihigda ka atubang sa langit
gianinag ang talithi sa kahayag
nadungog mo ang mga pulong
sa mga dahon
sa sulog sa suba sa pikas nga
bungtod

nagpalabay lang sa oras
unya pagkahuman
mamalik na usab kitang tanan
sa laing lasang

ang syudad nga puno sa bato
puno sa tawo apan dili tawo