4/12/2016

didto sa bukid sa sibutad

nagpabadlis intawon si
emak, sa iyang palad kay suma
pa sa tiguwang nga babaye
didto sa bukid sa sibutad
nga gidungog nga maayong
mananambal buayahon lagi
kuno ka unya pati ang imong
bana imong tugbon kon dili
mausab ang lakat sa imong
palad, gibabagan ang usa
ka linya sa usa ka kudlit nga
maoy makapausab sa dagan
sa imong kapalaran,

ang iyang bana nga sabungero
naglantaw, samtang nagtakilid
kilid sa giagay-ay nga pultahan
dapit sa lugar diin ang pugaran
sa iyang inaan nga jolohano
nangitlog, ...."kon kabalo pa
lang ko nga dili manganak ang
akong asawa,' maoy iyang sulti
sa iyang kaugalingon nga seguro
ang tiki ra ang nakadungog,
"mas maayo pag gitaban ko na
lang kadtong bigaon nakong
silingan nga walay ugam ang
bulog sa kaulag",..unya mora
siyag tika nga nag sigig
tsk,tsk, tsk, samtang mibali
sa tukog sa lubi dayog 
panghingiki.

ingon ka, naa pay kamunggay
ang iyang lagos, unya pula kaayo
ang iyang dila sa iyang 
mam-on. 

ang dagom nga iyang gibadlis
tayaon. apan wala ka nay kahadlok.
ambot kon nagtoo ka ba kaha
nga basin ugma mausob na
ang dagan sa imong kinabuhi.

No comments :

Post a Comment

Lami ba?