7/31/2016

mabaw

ang kahanap
sa kinabuhi nahisama
sa gabon didto sa
bukid nga akong
gitagoan

hinay kining miabot
unya kitang duha morag
nabutaan

ikaw wala na nako
makita
abi kog kadyot lang 
kadto
sama sa gabon nga miabot
dayon mibiya ra usab
dayon sa pipila ka
segundo lamang

nagmahay ko nganong ikaw
mikuyog sa gabon unya
nawala ka na kanako hangtod
sa kahangtoran

gibasol ko ang imong gugmang
mabaw ra kaayo

nakasabot ko pag-ayo niini
maong wala ko misulay pagsalom
 kay
sayod ko nga kini dili 
matugkad
sa akong tudlo sa iyang
kamabaw

unsa kahay imong ikasulti bahin kanako

kon masayran mo nga ako nakaangay sa kamatayon sa uban
unsa kaha ang imong hukom bahin 
kanako?

kon masayran mo nga ako miingon nga "igo nila" samtang gibalita na
usab ang laing mga numero nga gipatay didto sa Tondo, ug sa uban pang mga lugar diin gibalita ang pagkatag sa mga adik ug druga, sa mga tulisan ug mga kawatan, unsa kahay imong ikasulti bahin kanako?

kon mahibal-an nimo nga ako dakog pagdumot sa mga politiko nga hagbay rang nangawat sa kaban sa atong kalibotan, ug sa mga gamhanan nga midaog-daog ug nangilad sa katawhan, unya sud sa akong kasingkasing gusto nako nga unta gipangpatay na lang kini silang tanan, unsa kaha ang imong ihingalan kanako?

 ikaw, oo, ikaw

nga hugot nga miingon nga bisan kanus-a, ug bisan asa, wala gayod gihatag ni Bathala sa atong mga kamot ang pagkutlo sa kinabuhi

bisan kon kini mao ang kinabuhi sa nagkutlo usab sa kinabuhi sa imong minahal?

sayon ingnon nga ang pagpanimalos dili alang kanato, apan, sulayi lang, kon dili ba usab ikaw sama kanako nga sa dihang milantaw ka sa TV unya gipusil ang giila ug gibantog nga "killer", unya samtang nanihapon, miundang kag ingkit sa fried chicken, aron mobungat nga "da! igo na niya! gaba na na, gituaw  na gayod sa mga kalag! mayra!"

dayon nimog tungab sa imong bugnaw kaayong coke 

unya imo nang gikalimtan nga ikaw usa sa mga maayong mitubag sa akong law exam kabahin anang pangutana kon unsay ipasabot sa  "due process".


pangutan-a ang istrikto nga hardinero palihog

nakaangay ka sa
kaanindot sa iyang hardin
sa mga buwak

sa kaanindot sa naglinya
nga mga kahoy nga morag
kawhaan ka mga kaluha

walay milapas nga sanga
walay nasalaag nga dahon
walay balikog nga gamot
walay nalamog nga sagbot

pangutan-a kon ngano

adunay hardinero nga 
nag-atiman niini nga
istrikto kaayo nga sa
matag adlaw atua kanunay
nagbunglay sa mga
sagbot nga sa matag buwan
namul-ong, misukod sa mga
milapas dayog gamit sa
iyang sanggot aron 
putlon ang wala mitupong

pangutan-a ang hardinero

kon aduna bay mga pagbati 
ang mga dahon nga gitipi
ang mga sanga nga giputol
aron magtupong aron nindot
tan-awon 

alang kining tanan kanimo nga
gusto nga ang tanan hapsay
ug nindot gayod lantawon 

pangutan-a kon sila gisakitan
ba? kon sila nakaangay ba
sa kaanindot nga imong nakita?

pangutan-a kon ang mga dauban
wala ba gibatig kakapoy sa kalayo
nga siging siga sa kabuntagon 
hangtod na gani sa kagabhion?

pangutan-a ang mga abo diha sa
yuta, ang mga dahon kaniadto nga
buhi, ang mga sanga nga kaniadto
lig-on? pangutan-a ang aso nga
gihalad didto sa langit?

ang duha ka gilansang sa krus

duha kadtong
gilansang sa krus

ang usa walay
sala
ang usa makasasala

dunay nalipay
duna say nagmahay

kadtong misyagit sa daplin sa karsada

pieta, pyeta,
paita, ...punyeta!

ginadili ang 
pagpatay

balikbalika 
ginadili ang pagpatay

ingna sila
iapil kadtong gipatay
nga nakapatay
nga karon ilang gipatay
kay lagi nakapatay
man ug pipila ka mga
patay

pieta, paita, punyeta
gipatay nila ang adik
nakong manghod

punyeta! 

sugo sa panahon pid-ok sa kinaiyahan

ang pagpamunga sa
hunahuna
mao ang imong 
kabubut-on,

kon hinog na kaayo
ang bunga unya dili
nimo kuhaon
sa walay  pagdikidiki
mahulog lang usab
kinig iyaha

mao kana ang sugo sa panahon
ang pid-ok sa kinaiyahan

kabahin ni angie....

oo, kauban ko
ganiha si Angie
usa na ka tuig 
nga nabalo, kalit
nga namatay ang
banang bankero
'stroke' man kuno,

dili na kaayo
tigtingog kining
bayhana
ingon sila
humok na kaayog
ilong

sa tumang kaguol
midaot siya
wala nay ganang
mokaon o
mopalit ug
bag-on sanina

wala na say ganang
mogawas sa balay
gani kon mogawas
man ang iyang tuyo
mao lamang ang
paghalad ug buwak
ug pagdagkot ug
kandila sa lubnganan
sa iyang gimahal.

walay kasubo nga
morag taklubo nga
kanunayng manira
sa iyang balayan

walay babayeng 
magpabilin sa tumang
kasakit
kay sa kadugayan
sa panahon
mapul-an ra gihapon
ang kasubo mismo
diha kaniya dayon
kinig pahawa

oo, kuyog nako si
Angie kaganiha unya
ang among gihisgotan
mao ang bag-ong 
miabot nga kahayag
sa usa ka tinipigang
kalipay.

ang wala pagbuhat sa angayang buhaton

karong adlawa
gibuhat ko ang dili ko
unta angayan nga 
buhaton

imbis mananom ako
giani ko man hinoon

imbis mobasa ako ania
nagsulat man hinoon

imbis magpakahilom
atua haskang kisawa

imbis mamasol atua
misalom

ang angayang buhaton
nagyaka
gikapoy ug pinaabot
gisapot

ang libro nanira man ugaling
apan nagpakita
sa iyang dunggan
aron unta mabantayan
o aron ba ako
maymayan

karong adlaw sa  dili pagbuhat
sa angayang buhaton
ako lamang gipakita kanila nga
ako ang hari sa akong kaugalingon
ako ang magbuot
kon unsa ang buhaton

gisupakan ko ang akong pamalaod
gigun-ub nako ang akong balaybalay
gilugdan ko ang akong mga mata
gikumot nako ang akong kasingkasing

ambot nganong karong adlawa
nakaingon man ako nga ako nalipay...

ang halas nga bungol

inig abot sa kahaponon
sa dili pa kaayo 
motugpa ang kangitngit
akong tugonon ang mga 
adlaw nga unta ugma mobalik
sa sila hangtod sa laing
ugma ug daghan pang mga ugma

akong ingnon" ayaw ako ninyo
kalimti,duawa ako, kay daghan
pa akog mga buluhaton
daghan pa akog mga damgo
nga wala mahuman"

apan mipahawa na ang usa
kaganiha
unya mora kining halas nga
bungol

di ka kahibalo kon nakabati
ba kini kon mobalik pa ba kini
bisag ikaw mismo iyang paakon.

mao ba?

sumala sa atong nadungog didto
sa mga hungihong inig abot sa taas
nga pangedaron

ang bana ug asawa managsoon na
lang kuno
nga kon maghubo ang asawa samtang
ang bana natulog moingon kinig
"hoy, panapo!"

unya ang asawa usab kon maligo ang
bana moingon, "hoy! pagdali diha"

o kon madakin-as ang asawa masuko
ang bana duyugan sa " kadangag ba nimong
tigulanga ka!"

nga ang maong panag-uban wala na
ang kanhiayng lambing ug kabalaka
wala na ang pilit nga katam-is
o kaha ba ang lamiang dukot diha
sa nahurot na nga kan-on kuyog sa
saktong kaasgad sa kagubkob nga 
nokos.

ang akong mga ig-agaw nga pasahero
nako sa sakyanan balik sa Olingan human
sa among salu-salo miagik-ik og katawa
nga sa akong pangagpas walay pagsupak
sa akong sugilanon, nga gipaagi lamang
sa usa ka kataw-anan nga pagsugilon

si Karen nga nagkiang kay natunok ang tiil
sa lansang unya taas kaayo ang blood sugar
mao lamang ang morag nasuko, mipasaring
nga " Oi, tawon, ang akong bana dili baya pod
ingon ana".

(paaron-aron mora pog wa mi kabalo sa tinood)

ako sab, mitubag sa usa ka pangutana" Mao ba?"

ang taphaw

adunay panagbugkos nga
luag
pakiglambigit nga
taphaw

ganihang hapon gahisgot
ta kabahin sa tunok sa imong
lapalapa

kabahin sa sakit nga layo sa
tinae
apan hinonoa nakapakiang sa
imong tiil

nakaguba sa imong adlaw
nakabungkag sa atong panagtupad

wala na nako gipasulod pa ang
laing taphaw kay alang kanimo 

ang akong kasakit lahi sa imong
kasakit

sa kanunay  ang akoa mao lamang
ang taphaw

luag ang akong pagmahal
lugti ang akong saad

suhi ang akong panglantaw 
dili madala sa usa ka hilot

ang kausaban

mikatkat ka sa bukid
mitindog sa pangpang
 sa unahan ang dagat 
dayon nimog syagit,
 syagit sa kusog kaayo
nga syagit,

human niadto mipuli
ang kahilom

walay nahitabo sa palibot
ang bukid bukid lang gihapon
sama sa mga pangpang
sa dako ug lapad nga dagat

ang kausaban mao lamang
ang pagkawala sa imong syagit
nga gihilis sa kawanangan

awit sa kasubo sa sayong kabuntagon

ang mga lumot sa bato
ang mga mayanang pula
ang mga dahon sa mga 
kahoy didto sa lasang
ang dakong bukid ang
halapad nga patag

namati sa imong kasubo
sa dihang giawit mo kini
sa sayong kabuntagon.

kadtong dili kiss and tell

lami higugmaon ang
blanko

ang bongbong nga
walay sulat

ang papel nga puti
nga gilatag sa lamesa

ang habol nga walay
mantsa

ang mga mata nga
gatanga nga walay

gipaabot sa talan-awon
ugma o bisan kanus-a

gusto nimong higugmaon
ang walay ikasulti pagkahuman

ang mga ngabil nga walay
pulong dili manugilon

pagsugod na usab

hapit na nako
nalimtan ang katarungan
nganong
unta ako kanang likayan
apan karong buntaga
samtang naghinuktok
ako atubangan sa
bungtod diin misaka ang
adlaw
nakita ko ang kahayag
nga nagsulti na usab kanako
nga kitang duha dili alang
sa usag-usa

lig-on nga katarungan ang
gikan sa kahayag
busa karong adlawa
sugdan ko na usab ang
paghikalimot kanimo

7/30/2016

cascades

daghang manubo sa
akong ulo kon balikbalikon
na ni Honeylette ug
patukar sa cassette
ang The Last Leaf....

birthday alone  lang man
god siya gihapon.... ug

she does not really
know how i feel....

kabahin sa dili dali nako makalimtan

ang di nako dali
malimtan kadtong
giingnan ni papa
si nong kasyo nga
nag-alot sa akong
ulo nga ako na kuno
ang bag-ong Tiago
sa Purok Uno

kabahin ni mama
kadtong miingon 
siya nga dili gayod
kuno tinood nga
dili ang iro nilang
Konsay ang nakahabal
sa among iro nga
ginganlag Samsam

hinoon balewala
pa gihapon kanako
kon kinsang sunoy
ang tinood nga
tag-iya sa dose ka
itlog sa among
himongaan nga
pution....

kataposang dahon

wala mawili ang
sanga sa kataposang
dahon nga
nahulog sa tiilan
sa kahoy

 nga gisilhig
sa tiguwang ug giapil
ug sunog didto
sa nataran paaso 
sa punoan sa mangga
aron kini mamunga

balak alang sa irong mikaon sa iyang dila ug ikog

nakakita ka na ba sa iro
nga mitukob sa iyang kaugalingong
ikog?

makita mo nga gutom gayod
kaayo kadtong iroa kay sa dihang
naputol na ang iyang ikog
wala niya kini ambata kay iyang
gitagamtam ang kalami sa
iyang natangag didto sa iyang
baba

nagdugo ang iyang ipok
apan iya ra kining gisaghid
sa lapok

sa dihang nahurot na ang kaputol
sa iyang ikog
gisulayan niya ug paak ang iyang
tiil apan lagi kay kinahanglan man
kini niya sa pagdagan
iya kining giundangan

sa dihang gutom na gayod
kaayo siya
iyang gikalingawan ang
iyang dila

kay kaha sa iyang
kwenta walay pulos ang
iyang paghot
nga bisag unsa ka kusog
ug unsa ka lanog
wala gayod kini nakahatag
ug kahadlok sa iyang
mga kaila nga
laog....

kabag-ohan

ang mga wakwak nga
gipanghadlok kanato ni
nanay nakatabang kanato
sa pag-amping kanunay
diha sulod sa balay,

ang mga engkanto sa
punoan sa balete nakasalbar
sa dakong galastoon unta
didto sa hospital

manok nga itom manok
nga puti upat ka mameso
nilikit nga tabako ug ang
banggiitang balyan nga
nagpiyong diha sa iyang
mga gamhanang yamyam

naulian na ang kabuang
ni nong kasyo human sa
halad
nawala ang ugahip ni
gorio pinaagi lamang
sa tutho gamit ang luwa
ug mama

ang kapobrehon matootoohon
apan ayaw ka kay kon wala 
pa kining mga hitaboa
mag-unsa na lang kaha kita?

makalumos ang pagkawala sa
paglaum
makawalag gana sa pagpakabuhi
ang mga dili pa nato
madawat nga kamatooran 

didto sa atong gamay nga
balangay
kitang tanan nag-angay-angay
ug subad sa kahadlok, kalisang,

diha sa gamayng mangkok nga 
kalipay
atong gibahinbahin ang mga
mumho 

ang panapton nga daan atong
gitabastabas aron matabunan
ang atong pagkawalay-alamag
kon unsaon pagtintal nga moabot
sa atong kanihit ang gihandom
nga maayong kabag-ohan

ang panahon walay pagbati

di makonsyensa ang
ulan kon ikaw mabasa
dili sab magbasol ang
suba kon mobaha unya
midagit sa bata nga
nalumos dayog kamatay.

ang panahon walay 
pagbati, unya kon
nausob ka man, unsa
bay iyang labot?

adunay bag-ong
gianak, sama ra usab
adunay kalit lang
namatay, adunay
kainit nga miuga sa
basakan, adunay hangin
nga mikuhag daghang
balay, adunay dakong
balod mga lilo nga
mitangag sa barko
nga puno kaayog
mga pasahero

bisan unsa pa ang
mahitabo, sa kanunay
wala silay labot
sa bisan unsang
katalagman nga
kanato gidangatan

talan-awon sa sulod sa kumbento....

nindot tan-awon kadtong
higayong  gihungit ang usa ka
gut nga baka sa iyang baba
nga iyang giusap dayog tulon samtang naglantaw ang gigutom

dayon mihigda siya sa salog 
unya mipaibabaw ang usa nga giuhaw
ug miingon nga ayaw ka hadlok dayon niyag
tanom sa iyang ngabil sa usa ka init nga halok nga nagbaga 
sa tumang kaulag.

boracay memory

lahi na gayod
ang dagan sa panahon
kay didto's boracay
sa dihang miabot na
ang gikahadlokan nga
bagyo wala may puas
sa selfie ang akong 
amigo nga si mario.

matod pa niya
dunay kaanyag ang
bagyo
sa iyang likod
nga dili mo 
makita sa iyang
atubangan

lima ka kalipay

sa tinood lang
human sa kadugayon nakong pagpalayo
(kay lagi sumo man usab nga sa tibook nakong
kinabuhi mag-ayag ako sa mga adlaw diri lamang
sa akong duha ka palad sa samang lugar diin ako
natawo ug gani diin man usab seguro ako mamatay)

inig kanaog nako gikan sa eroplano lakaw dali gawas
sa airport sakay paspas sa sakyanan nga mohatod nako
sa balay mga kinse kilometro gikan sa syudad hangtod
na sa habog nga labat sulod sa gate nga puthaw dayog
sulod sa nataran--

sa tinood lang ang mga malipayon kaayong mag-ambak
ambak, magdagandagan sa kahimaya sa akong pag-abot
mao ra gyod silang pretty, si boggie, si bonnie, si sammy ug
si verna,

oo,nindot nga talan-awon 
ako ug ang akong lima ka iro nga samtang wala ako
gipakaon sa akong silingan,

akong mga suod nga kalipay, unya abtik sab kong
panira dayon sa gate sa balay kay basin ug makagawas
unya makapaak na usab kining mga 
iro nga buluyagon....

bahin ni A.

siya lang daw sa iyang
bag-ong  balay nga
gitukod dapit sa suok
nga lugar sa dili pa
maabot ang kalubihan
sa baybayon

bisan pa kuno ug wala
pa kini kaayo mahuman
iya na kining gipuy-an
nga siya lang usa ,..

mihatag siya sa iyang
numero nga ako sang
gidawat unya duna
siyay gisulti sa wala
pa siya milakaw kay
kuno duna siyay dinalian
nga buhaton

nga ambot ba, lahi
na, imbis ganahan ko
ania, gilood na man
hinoon nga kon di ko
moginhawa ug lalom
magpabilin ang akonG
pagkakasukahon....

kamay

salamat sa imong
katam-is
salamat na lang una
karon mobalibad
una ako
pasayloa, 

ayaw kahiubos
kanako
baliki ang kaniadto
nga gisaloan
ta ang atong katam-is
wala ta manangpit

baliki kadtong
akong pagtam-os
sa imong katam-is
baliki ang imo
sang pagtila sa akong
katam-is
bisan gani karon
magtubod pa man
ang atong laway
maghalhal ang atong
mga dila
sa paghandom sa
katam-is

apan karon pasayloa
balibaran ko usa
kanang imong
katam-is
antoson ko ang
pagtago sa akong
dila sud sa akong
baba
higot sa akong
alingagngag

miabot na ang
kabidli
sa usa ka saad
nga unta 
dili una kita mamatay
diha sa katam-is
nga unta dili ta nila
masurahan
nga atua ang duha
namatay sa ibabaw
sa tibugol nga
kamay

alang sa akong secret admirer

bisag dili nako siya makita
sulod sa iyang kotse nga heavily tinted
sayod ko nga siya naglantaw kanako samtang 
milabay ko sa iyang atubangan

sayod ko nga iya kong gihingut-an gikan sa
tumoy sa akong buhok hangtod na sa kinatumyan sa akong kiting

(kon isda man ugaling siya mahimong sumbalikan ko siya
himbisan sab nako siya
 hangtod nga mawala ang iyang kisikisi)

dili ko ikahadlok ni ikalisang ang iyang sigi na nga gibuhat kanako.
kay kahibalo kos iyang patyanan

tungaw nga ania  naghatag kanunay ug katol
sa akong itlog

unta kon magpaila lang siya kanako hatagan ko gayod unta siyag
kalisang sa pagtangtang niini

mahuwasan kos kakatol
samtang siya makatabok na usab sa pikas labat diin ang mga mata dili
na libat.

ang utok sa lalaki

anad diay kuno kitang mga lalaki
anang paghunahuna sa wala, 

kon mamasol, naa ang paglabay
sa taga nga gatangag sa paon

balikbalikon, hawid sa kawayan,
lingkod sa tampi, wala lang

ang milabay nga babayeng
dakog paa balikwaot ug hunahuna.

ang mga isda sa suba

ang mga isda sa 
suba nangitlog, 

damtag pu ka adlaw
nangapusa

kusog ang sulog
silang tanan bulag

bulag, wa say
nangita kon asa.

Ma Rosa

ang akong butag mao
ang There came a Spider.

nasaag baya kos IMAX
adtong Looking Glass.

nahangol kos sine.
seguro tungod kay dugay
na sab
nga nawala kanako kining
bisyoha.

 Sakit
na kaayo ang akong mga
mata.

dia pay kalag nga gihasol
hasol ni Ma Rosa

kadtong nawong  ba nga
milantaw sa tibuok kalibotan
baba nga durong kaon
sa fishball

diha sa taliksik nga ulan
dayog kahulog sa mga
luha.

mga brilyanted asgad
gianod sa sulog sa kapalaran

badlis badlis, ekis ekis.

pasayloa

dili ko ganahang mosulat
og taas nga balak sama nga
di sab ko ganahang mobasa
sa imoha.

 Di ko ganahang 
mahago.
 Di sab ko mohago
nimo.

pasayloa kining tawong 
gadali kay kalibangon.

sa balay sa mangla

nagpayong kita ug
puros itom

kitang tanan silong
sa adlaw

dunay kahayag nga
makamaong moawit

sulod sa dughan
tagkos sa ugat

akong gipangita sa
sa balay sa mangla

ayaw pagpalabi sa imong gibati

lalom ug habog ra
kaayo ang imong kagabhion

ayaw palabii ang imong
gibati

ning  imong pagpanirado
sa pultahan ug sa mga bentana

unsaon mo kaha pag-ambat
ang kabuntagon nga anaa sa

gawas, kuyog ang mga buwak
mihangyo nga unta tugutan

mo sila, bisan kadyot lang,
sa paglipay kanimo.

7/29/2016

pahinungod sa viagra

ako siyang gipauyonan
sa iyang hunahuna nga ako
dugay na untang
namatay


 sa dihang nahimugso
ang viagra.....

gikan sa opisina

natapos na usab
ang adlaw

daghang ania
kanako ang nawagtang

giyupyop na usab
kini sa kahaponon

ako ang aso nga
milabay sa punoan sa
kahoy

ang abo nga anaa sa
salog sa korte

lantaw lang

dako gayod kaayo
ang kahiubos
ni alejandra sa dihang
gidala siya ni paulo
ngadto sa ibabaw sa
bungtod
sa La Suerte, 

kabawo ka ba
nga ang ilang gibuhat
didto
mao man lamang ang
paglantaw sa 
tibuok nga bulan nga
gidayandayanan sa
liboan ka mga
bitoon?

bisan kinsang 
magbabalak nga 
banggiitan
masuko gayod

ang tanga nga gugma
mas bugnaw pas
kamot nga patay
diha sa mga tudlo
nga nangatikig