ang rami ug ang tikarol

lahi na ang tumong
nausob na ang kaugalingon
mikuyog usab
sa panahon

wala na ang gipangitang pabuto
sa disyembre
ang padidit sa bungtod gamit ang
sinaw nga palwa sa lubi
ang kinawatkawat nga pagkaligo sa
suba nga gidungog nga gibuhiag buaya
ni baut

karon ang tumong mao na lamang ang
kalinaw diha sa pagbuhat sa angayang buhaton
wala na ang pagpili kon unsa ang gusto
anaa na ang pagbuhat sa naandan

nahisama ka sa isda nga rami sa usa ka
linaw kaayo nga sapa 
nga tin-aw kaayo sa kaudtohon nga mihanggab
sa hangin hangad sa kahoy diin ang usa ka
sanga niini gitugdungan sa tikarol

siya sa habog ikaw sa ilalom sa tubig
unya karong higayona kamo
nagkatinutukay