8/18/2016

balak alang sa kamingaw ug pag-inosara

dugay mong mailaila ang
nawong sa pag-inosara

sa una mong lantaw
makaguol, dayon makahadlok

duna gani panahon nga ikaw
mikurog

unya miingon ka basin ingon
ani lang gayod 

ang matood kanang inig kahuman
sa usa ka panagtigom ikaw

na lang ang magpabilin diha sa 
balay unya madungog mo na 

ang haguros sa hangin ang tunob
sa tiki diha sa kisame

makabungog mora kag mabungol
ambot kon nganong dili mo man

madungog ang awit sa langgam 
didto sa kahoy nga naglumlom 

sa iyang mga itlog didto sa salag
sa punoan sa santol?

basin ingon ana lang gayod ang
sa una, apan kon maandan mo na

morag wala na lang ang kamingaw
usa ka hitabo nga molabay lang o

kon bisan magdugay mora na lang 
usab kinig kuyog nimong iro nga

moayong mokawil sa iyang ikog kon
ikaw moabot na 

seguro wala na nato matugkad ang 
sapa sa kalag wala pa nato masunod

ang sulog sa mga pagbati, labi na
kon sa imong hunahuna nga kon wala

na siya imo kining ikamatay nga mora
bag ang imong kasingkasing ug ang

iyaha usa ra nga sama sa inyong mga
tinai nabugkos kini sa usa ka tinubdan

nga pusod, nga ang inyong kaugatan
morag mga gamot sa kahoy nga atua

sulod sa yuta dili na gayod mahibaw-an
kon asa ka og kon asa usab siya.

No comments :

Post a Comment

Lami ba?