Showing posts with label Kinsa?. Show all posts
Showing posts with label Kinsa?. Show all posts

5/04/2009

Ang Katunggan Sa Borbon

Pagka-anindot nga sud-ongon sa kahoy’ng lapis-lapis
Sa iyang gitas-on siya mapasigarbohon
Diin daplin sa baybayon sa tanang kahoy’ng mabiay-biayon .
Panahon miabot, mipasipa kaniya
Hangin nga makusog, ulan nga masubra
Mikuso-kuso sa baybayon, ug sa mga kahoy mi-uyda
Unos nga masilagon, sa kapungot nagdala
Kabangis sa panahon, mipukan kaniya.
Bunga sa lapis-lapis sa balod gianod
Halapad nga kadagatan, latas sa dakong lawod
Padulngan unsa’y dangatan, wala siya masayod
Kalinaw sa panahon, maoy bugtong manalipod.
Bunga sa lapis-lapis sa halayong baybayon midagsa
Maampingong mga balud kaniya mipahiluna
Miturok ug nabuhi sa maabi-abihong luna
Midako ug milabong, sa yuta ug ubang kahoy gipangga .
Lapis-lapis ikaw karon, ang kinaiyahan nagmaampingon
Sa uban mong mga kahoy ikaw mapa-ubsanon
Sa gagmay mong mga bunga ikaw maki-angayon
Luyo sa kasakit, ikaw magmalampuson.
Sa tanang mga taga BORBON,
Sama kita sa lapis-lapis nga gipadpad sa kinaiyahan
Kay ang atong pangagamhanan wala nila igsapayan,
Kon unsa ang dangatan sa atong mga katunggan
Kon dili nato tamnan og prinsipyo nga gipadangat
sa atong mga kabatan-onan.

3/16/2008

Uwang

unang pagbasa kinutlo sa basahon ni Allen Ginsberg...


UWANG
(batbat sa usa ka bayot boang)
pahinungod alang sa mga taga Pier 1

akong namatikdan ang mga tang-ag utok sa akong henerasyon, nagusbat sa
tinonto, giguslang giang-angong way sapot,
gaguyods kaugalingon ngadtos lorega sa kadlawong dako
na ang-angan sa tama,
mga hinampak nga nagsunog sa karaang himayang koneksyon
ngadto sa mabitu-ong dinamo sa makinarya sa kagabhion,
kinsa kawad-on ug ginusbat ug sigag-mata ug
nanghinambid nanigarilyo sa kahibungang kangitngit
sa mabugnawng-tubig nga paurarayan naglutaw
sa ibabaw sa syudad nagbagotbot sa rakrakan sa zzubu,
kinsa giabrian ang mga utok padungs langit ubos
sa mga anghel ni Mohahmad nga nahagba
sa mga atop nga naghayag,
kinsa niagi sa mga unibersidad nga nagsudlot ang mata
gilamat sa mga mahayagong trahedya ni Esteban Escudero
nga gilangkuban sa mga magtutun-an sa gubat,
kinsa gipapahawa sa tunghaan sa mga buringog
ug namatik ug mga kahilayan ug binastos pahinungod
sa mga bintana sa kalabira.
kinsa ni uk-ok sa mga kagirong kwarto nga nagboxer,
nagsunog sa ilang mga diyot sa basurahan
ug naminaw sa Kahadlok nga nagpanikad sa bungbung,
kinsa nangagusbat sa ilang balungos
nga nibalik sa Balamban nga nagbakus
ug habak paras Sugbo.
kinsa nihabhab ug kayo sa mga pansayan ug nitungab
ug pormalin sa Kamagayan, kamatayon,
o gipurga ang ilang kalawasan matag gabie
sa mga damgo, sa mga drugas, sa makapukaw nga orom,
tanduay ug bule ug way kinutobang lagay,
di makomparang buta; dalan sa gisubawang panganod
ug kilat sa hunahuna nangambak padulong
sa mga buayang lampost sa Mandaue ug Recla,
nag-iwag sa tanang nag-urong nga
kalibutan sa Taknang nagpatunga,
Kachobong nagpatikig sa lawak,
hardin sa kahoyng lunhaw sementeryo
nisubang, kahubog sa bino ibabaw sa atop,
atubangang tindahan sa kabalayan
sa nagsakay-sakay nga sugang dagitabnong pantrapiko,
adlaw ug bituon ug kakahoyang nagkurog
sa nagsyagit nga mabugnawng kilumkilum sa Hunkera,
way nahot nga pagbagotbot
ug but-ang hari suga sa hunahuna,
kinsa gikadena ilang kaugalingon ngadto sa ubos
nga agi-anan alang sa way kinutoban nga sakay
gikan sa T. Padillia ngadto sa Lorega nga nagtama
sa papilit hantud nga ang kasaba sa mga ligid ug mga bata
nakahagba nilang nagkurog nga nabungi ug dila
ray way labod nga namad-an sa kaalam diha
sa masulub-ong suga sa tangkal,
kinsa nipatighug tibuok gabie sa submarinong suga sa Cordova
naglutaw-lutaw ug nilingkod sa hupas nga ilimnong kahaponon sa
mingawng More Disco bar, naminaw sa buak nga kinutoban
sa makapabungog nga bidyokihan,
kinsa padayong nagpangyamyam setenta oras gikan sa Plasa
ngadto sa BBRC sa Mabolo sa Parian sa Paseo sa Mactan Bridge,
nangahanawng batalyon sa pilosopong tabi-ang ni-ambak
paubos ngadto sa gawsanan sa bintana sa Kapitolyo lahos sa bulan,
nagpamaghot nagshagit nagsuka naghunghung ug kamatuoran
ug kagahapon ug mga pulong ug flying kick sa kalimutaw
ug kurat sa ospital ug prisohan sa gubat,
tibuok kaalam naibot sa tukmang pagdumdum
sa pito ka adlaw ug gabie sa mabituonong mata,
sud-an para sa Simbahan gi-itsa sa salog,
kinsa nawagtang ngadto sa kawanangang kahapsay
sa Busay nagbiya ug talimad-on sa lagpas
nga mga hulagway sa syudad sa Asturias,
nagpangagot sa walhong singot
ug Argaoanong makabalig-bukog ug labad
sa ulo sa Insik ubos sa widrowal sa sipa
ngadto sa haw-ang sa Bogo nga linimpyohang lawak,
kinsa nagbaklay patid labay sa dagkog lagay sa tungang gabie
sa terminal nagplano asa padung, ug gipadulngan
way biniyaan nga dughang guba...

4/03/2007

Usa Ka Pagsil-ip Sa Mabini

Sugang neon, kidlap-kidlap, wala, nay
kinabuhi, ako, ikaw, kita, sayaw, mardigras
dinhi, bantawan, gugma, kaluoy,
Pagbati, bulawan, serbesa, ladies drink,
Panty, bra, brief, condom, agulo
sumsoman, kalag, magdudula, kita, ako, kinabuhi,
diaspora, dakbayan, dakbalay, ngitngit, hilak,
kasubo, balik, balik, balik,
sa, sabakan, kon, gugma, mo, di, na, wagas
pamatia, silaba, bakho, uha,
puya, sulod, basurahan,
putos, plastik, sama, nimo,
ikaw, ako, lang-og,
martsa, ngadto, bantok, dalan,
kagahapon,
karon, ugma,
ikaw
ako,
wala,
na,

3/14/2007

PAGTAPOS SA BANSAY-BANSAY

PAGTAPOS SA BANSAY-BANSAY
Ending a Training

Karon gitapos ta ang bansay-bansay.
Now, we end this training

Kadiyot, makamuot
For a moment, entertaining

Aron mabulawan ang lapokon tang umahan.
To turn to gold our muddy fields.

Ug unya dalitan nyo ako
Ang you will offer me

Sa lamian ninyong pagkaon,
Your palatable foods,

Laylayan nyo unya ako
Then you will sing for me

Sa saloma sa sanag nga adlaw
The song of a bright day.

Hubugon nyo unya ako
You’ll make me drunk

Sa mga mabulukong pungpong sa inyong pasalig
With the colorful blooms of your promises

Nga ang amo unyang giawit
That what we sing

Dili madala sa baha sa kalimot
Will not be carried away by the flood of forgetfulness

Ug ibanlas sa honasan sa kawad-on
And swept in the sandbars of nothing.

Ayaw, ayaw, intawon
Don’t, please don’t

Ako hatagi sa alak sa malimuton.
Give me the wine of the forgetful.

Kadaghan na ako malup-og
Many times I have fallen

Sa mga bulak sa dila
To the flowers of the tongue

Sa libuan ka gradwado sa pagbansay-bansay
Of a thousand graduates of trainings.

Igo na nga ipabalon ninyo kanako
It is enough that you send me

Ang inyong mga katawa ug pahiyom
Your laughter and your smiles

Gaposon ko unya kini
I’ll tie them down

Uban sa inyong gidamgong kauswagan
With your dreamed progress.

Nabilin ko na ang tipik
I have left a part

Sa akong hunahuna
Of my brains.

Bubui unya kini sa panlimbasog
Water them with your struggle

Iyawat, iyawat
That someday

Sa atong utrong panagkita
When we meet again

Maghakopay kitang malipayon
We will greet ourselves happily

Tungod sa mga damgong nakakita na
Because our dreams had finally

Tinood nga kalambuan
Found true progress.

(Linconan, Bonifacio, Mis. Occ.)